Fianara 13

Akore ty Fomba Ahita’ao ty Fivavàha Marina?

Tea-Ndranahare va laha fa kila fivavàha, sa raiky avao ro tea’e? (1)

Ino ty anto’e nampisy fivavàha maro biby manao aze ho Kristiana? (2)

Fomba manao akore ro hahaìza’ao ty Kristiana vata’e? (3-7)

1. Raike avao ty fivavàha kristiana vata’e tò natsanga’i Jesosy. Toko’e ho raike avao kea henany zao, ty fivavàha misy ty mpivavake vata’e ami’i Jehovah Andranahare. (Jaona 4:23, 24; Efesianina 4:4, 5) Ampianari’ty Baiboly, fa vitsivitsy ty olo manorike lala maifitsy ho ami’y fiaìna any iny.—Matio 7:13, 14.

2. Fa nambara’ty Baiboly, fa hisy fampianara diso, ndreke fomba tsy kristiana hilitsy moramora anati’y fiangòna kristiana ao, laha fa maty apostoly reo. Hisy hitào ty mpino hanorike ty aze, fa tsy hanorike an’i Kristy. (Matio 7:15, 21-23; Asan’ny Apostoly 20:29, 30) Zay ro anto’e ahitantsika fivavàha sankaraza’e, samby manao aze ho Kristiana io. Fomba manao akore ro hahaìzantsika ty Kristiana vata’e?

3. Ty famantàra mampiavake biby ty Kristiana, le hoe mifankatea vata’e roze. (Jaona 13:34, 35) Tsy ampianary hihevitsy ty vatatena’e ho anabo karàza mihoatsy ty hafa, roze. Tsy ampianary halày olo baka an-tany hafa kea roze. (Asan’ny Apostoly 10:34, 35) Tsy militsy ami’ty aly roze. Mifanday manahake olo niharo troky ty Kristiana.—1 Jaona 4:20, 21.

4. Fomba hafa ahaìza ty fivavàha marina ty fanajà laliky ty Baiboly atao’ty mpikàmba ami’e ao reo. Eken-droze fa Safà’Andranahare ty Baiboly, sady inoa’e ze raha volàni’e ao. (Jaona 17:17; 2 Timoty 3:16, 17) Amin-droze, le manan-kàja mihoatse ty hevitsy ndra ty fombafomban’olombelo ty Safà’Andranahare. (Matio 15:1-3, 7-9) Miezaky mampifanarake ty fiaìna’e ami’ty Baiboly roze. Ka zay ty anto’e anorihan-droze ze raha torì’e.—Titosy 1:15, 16.

5. Toko’e hanome voninahitse ty anara-Ndranahare kea ty fivavàha marina. (Matio 6:9) Nambara’i Jesosy tamin’olo hafa ty anara-Ndranahare hoe Jehovah. Toko’e hanao ho’zay kea ty Kristiana vata’e. (Jaona 17:6, 26; Romanina 10:13, 14) Ia ami’ty olo tanà raike ami’ao, ro manambàra ty anara-Ndranahare amin’olo hafa?

6. Toko’e hitory ty Fanjakà’Andranahare ty Kristiana vata’e. Nanao ho’zay Jesosy. Niresake avao mikasike Fanjakà io ie. (Lioka 8:1) Nanirake ty mpiana’e mba hitory hafatsy io ami’y tany toy iaby ie. (Matio 24:14; 28:19, 20) Mino ty Kristiana fa ty Fanjakà’Andranahare raike avao ro handay fiadàna, ndreke filamìna an-tany etoy.—Salamo 146:3-5.

7. Tsy toko’e ho nama’y tontolo raty toy ty mpianatsi’i Jesosy. (Jaona 17:16) Tsy militse ami’y politiky ndreke ty aly ara-tsosialy misy ami’y tontolo toy rozy. Halavìri’e ty fandesam-bata noho fomba, voho fihetsike manimba hita matetike ami’y tontolo toy eo. (Jakoba 1:27; 4:4) Misy fivavàha ahità famantàra Kristiana vata’e tò reo va hai’ao ami’ty manodidy anao eo?

[Sary, pejy 26, 27]

Mifankatea, ndreke manàja ty Baiboly, noho mitory ty Fanjakà’Andranahare ty Kristiana vata’e