TY FIAINANTSIKA KRISTIANA
Mahafalifaly ty Fitoria ty Vaovao Soa
Fa nisy fotoa va iha nahatsapa hoe sarotsy ty mitory? Fa nahatsapa ani-zay ty maro amintsika. Ino ty antony? Vasa manohitsy na tsy midary antsika ty olo maro amy faritany eny, na matahotsy hiresaky amin’olo tsy zatsy antsika tsika. Mety hihena vatany aloha ty hafaleantsika lafa tratsini-reo. Fe Ndranahary falifaly ro ivavahantsika ka teany ho azontsika tavy ty fanompoa azy. (Sl 100:2; 1Ti 1:11) Manino ro tokony hahafalifaly antsika ty fitoria? Retoa misy antony telo.
Voalohany, mampitamà raha soa ty hafatsy andesintsika. Ndre tsy manan-draha tamany loatsy aza ty olo henanizao, le azontsika atao ty mampahery an-drozy amy “vaovao soa mikasiky raha soasoa marè” iny. (Is 52:7) Fe mahafalifaly antsika koa vaovao soani-Fanjakà-Ndranahary io. Lafa handeha hitory iha, le vetsevetseo tse ty fitahia handesini-Fanjakà-Ndranahary an-tany etoy.
Faharoe, mahasoa fiainan’olo ty vaovao soa torintsika, sady mahavy azy hifandramby soa amy Ndranahary. Mianatsy miala amy fahazaran-draty rozy ka afaky mitamà ho velo zisiky farany. (Is 48:17, 18; Ro 1:16) Manahaky olo miasa amy fanavota olo tra-doza rey tsika. Mety tsy ta havota ty olo sisany, fe mbo mikaroky ani-ze mila vonjy avao tsika.—Mt 10:11-14.
Fahatelo, sady vatan-draha marè, manome voninahitsy ani-Jehovah tsika lafa mitory. Lafovily aminy asa ataontsika io. (Is 43:10; He 6:10) Ameany fanahy masy mihintsy aza tsika mba hahavita ani-asa io. Anatini-vokatsini-fanahini-Jehovah ty fifalea, ka azonao atao ty mangataky fifalea aminy. (Ga 5:22) Hanampy antsika ie, ka tsy hatahotsy mihintsy tsika fa hahasaky hitory. (As 4:31) Ka ndre manao akory ndre manao akory ty fihetsikin’olo amy faritanintsika eo, le ho falifaly avao tsika lafa manao ty asa fitoria naniraha antsika.—Ezk 3:3.
Aia ty fihetseham-po teanao hanana lafa manompo? Ino ty azonao atao mba ho falifaly avao?
HENTEO TY VIDEO HOE HO FALIFALY NDRAIKY IHA LAFA MIANATSY NOHO MAMETSIVETSY, BAKEO VALEO FANONTANEA RETOA:
Manino ro tokony hataontsika voaloha lista ty fahazara mianatsy Baiboly, ndre fa mitory anatini-lera maro aza tsika sambola?
Akory ty hanahafantsika ani-Maria?
Ombia ty fotoa atokanao hametsevetsea ty Safà-Ndranahary?
Ino ty raha mahafalifaly anao lafa mitory ty vaovao soa?