Tsy Maintsy ho Tampitsy Avao ty Raha Sarotsy

Mety ho kivy tsika lafa miatriky raha sarotsy, sirtò laha somary elaela raha iny vo mivaha. Nihaini-Davida fa tsy maintsy mbo ho tampitsy avao ty fanenjehani-Saoly azy sady ho lasa mpanjaka ie araky ty nampitamanini-Jehovah azy. (1Sa 16:13) Ty finoani-Davida ro nanampy azy hahaliny noho hiamby ani-Jehovah avao.

Lafa miatriky raha sarotsy tsika, le mety hampiasa ty fahihirantsika, ty fahaizantsika manoka na hila fomba hafa mety hahavoavaha ani-raha iny. (1Sa 21:12-14; Oh 1:4) Fe misy problemo sisany tsy mety voavaha mihintsy ndre fa nanao ze azo atao tsika sady fa nanaraky ty torolalani-Baiboly. Laha zay ty raha miseho, le tsy maintsy miezaky hahaliny noho hiamby ani-Jehovah tsika. Tsy ho ela, le hataony tsy misy sasy ty fijalea sady “hofafàny ty ranomaso iaby” amy masontsika. (Ap 21:4) Ndre baka amy Jehovah ndre tsy baka aminy ty nahafaky ani-problemo iny, le zao avao ty azontsika antoky: Tsy maintsy ho tampitsy avao ty raha sarotsy. Tena mampahery antsika raha zay.

HENTEO TY VIDEO HOE MIHARO RAIKY AVAO TY VAHOAKINI-JEHOVAH NDRE MIZARAZARA TONTOLO TOY, BAKEO VALEO FANONTANEA RETOA

• Ino ty raha sarotsy natrehini-Kristiana sisany nipetraky tantimoni-Etazìny any?

• Akory ty nampisehoan-drozy fa nahaliny raha noho nanam-pitiava rozy?

• Akory ty nataon-drozy mba hifantoha amy “ze vatan-draha marè” avao?​—Fi 1:10