TY FIAINANTSIKA KRISTIANA
Miomàna Hiatriky Fitsaboa Tampoky
Ino ty antony iomana? Mety ho tampotampoky avao le hila fitsaboa sarombaky tsika, na hilitsy hopitaly mihintsy aza. Ka tany mbo tsy avy raha zay, le anovo sandrany ze azonao atao, amy zay hahazo ty fitsaboa farani-ze soa iha. Manaja ty ay tsika lafa manao ani-zay, sady manaja ty lalànani-Jehovah mikasiky lio.—Asa 15:28, 29.
Akory ty fomba iomana?
Mivavaha le fenò soa karatsy “fanomezan-dalana momba ny fitsaboana” (FMF) iny.a Azoni-mpitory vita batisa alà amy mpikarakara boky karatsy FMF io, le afaky mangalaky Karatra Famantarana (ic) ho ahi-ty anany tsy ampy tao koa rozy
Laha bevoka iha, le angataho amy anti-panahy ty taratasy hoe Fanazavana ho An’ny Vehivavy Bevohoka (S-401). Hanampy anao raha io mba hahay hanapa-kevitsy mikasiky ani-ze raha manahira mety hiseho zisiky amy fotoa iterahanao
Laha handalo fitsaboa mety hisy problemo mikasiky lio iha, na hilitsy hopitaly, le resaho sandrany ty anti-panahy. Ambarao amy hopitaly iny koa hoe teanao laha misy Vavolombeloni-Jehovah mitsidiky anao
Akory ty azoni-anti-panahy anampea? Afaky manampy anao hameno karatsy FMF rozy. Fe tsy handramby fanapahan-kevitsy ho anao rozy, sady tsy hanambara ty hevitsin-drozy manoka mikasiky ty fanapahan-kevitsy tokony horambesini-kiraidraiky. (Ro 14:12; Ga 6:5) Lafa ambaranao amy anti-panahy hoe mety hisy problemo mikasiky lio ty fitsaboa anao, le avy le hiresaky amy Komity Mifandramby amy Hopitaly (KMH) rozy.
Akory ty azoni-KMH anampea? Fa nahazo fiofana soa rahalahy anatini-KMH reo mba hanampy ty mpitsabo noho ty mpahay lalàna hahazo soa ty fahitantsika ty lio amy resaky fivavaha. Mety hiaraky midiniky amy mpitsabo anao rozy hoe ino ty hatao mba tsy hisy fampilira lio. Afaky manampy anao koa rozy, mba hahita dokotera parè hiaraky miasa amintsika, laha ilà raha zay.
HENTEO TY VIDEO HOE INO TY HANAMPY ANAO HANAPA-KEVITSY AMY FITSABOA MISY FAMPIASÀ LIO? BAKEO VALEO FANONTANEA RETOA:
Ino ty nianaranao tamy video iny, ka manampy anao ho parè lafa misy fitsaboa tampoky misy resaky lio?
a Hanampy anao hahay handramby fanapahan-kevitsy mikasiky fampiasà lio ty Fianara 39 amy boky Ho Azonao Tavy ty Fiaina Zisiky Farany!