Parè Hanoka ty Vatanao ho an’i Jehovah va Iha?

1-2. Ino tokony hataon’olo raiky alohan’ny hanaova batisa azy?

TANATIN’NY limy tao lasa, le olo an-tapitrisany ro natao batisa ka nilasa Vavolombelon’i Jehovah. Nanahaky an’i Timoty, azy mpianatsy tamy taonjato voalohany iny ty ankamaroan-drozy satria mbo “niajà” le fa nampianary ty Soratsy Masy. (2 Tim. 3:14, 15) Ty sisany koa fa be vo nianatsy mikasiky an’i Jehovah. Ty sisany aza fa antitsy mihintsy. Nianatsy Baiboly tamy Vavolombelon’i Jehovah, ohatsy, ampela raiky zay le natao batisa tamy ie 97 tao!

² Mpianatsy Baiboly va iha sa tezàn’ny ray aman-dreninao amy fahamarina? Laha zay ie, mieritseritsy hatao batisa va iha? Raha kendrè tena soa aloha zay! Fe alohan’ny hanaova batisa anao, le mila manoka ty vatanao ho an’i Jehovah tse iha. Ka ino ty atao hoe manokam-bata ho an’i Jehovah? Manino iha ro tsy tokony hatahotsy hanokam-bata noho hatao batisa? Le ombia iha ro parè hanao ani-zay? Hanampy anao hahay ty valin’ny fanontanea reo lahatsoratsy toy.

INO TY ATAO HOE MANOKAM-BATA?

3. Manomeza ohatsy amy Baiboly ao ahità hoe nisy olo nanokam-bata ho an’i Jehovah.

³ Ty hoe manokam-bata amy Baiboly ao, le midika hoe voafily hanao fanompoa manoka ho an’i Jehovah. Eritsereto, ohatsy, ty Israelita. Marina fa firenena voatoka ho an’i Jehovah rozy. Fe nisy olo sisany nanokam-bata ho an’i Jehovah ka lasa nanao fanompoa miavaky. Anisani-zay, ohatsy, Arona. Nisy takelaky volamena mamirapiratsy tamy satroky nanaovany iny, le nisy “famantara masy” teo. Hita tamy takelaky io fa nifilin’i Jehovah hanao fanompoa miavaky ie, zany hoe ho mpisorobe tamy Israely teo. (Lev. 8:9) Manahaky ani-zay koa ty Nazirita. Voatendry hanao fanompoa miavaky rozy satria nanokam-bata ho an’i Jehovah. Baka amy safà hebreo hoe nazirʹ ty hoe “Nazirita”, le midika hoe “Tafasaraky” na “Voatoka” raha io. Nisy didy manoka natao ho an-drozy amy Lalànan’i Mosesy ao. Tsy maintsy nanoriky an’ny raha rey rozy.​—Nom. 6:2-8.

4. a) Lafa iha manoka ty fiainanao ho an’i Jehovah, ino ty raha lasa vatan-draha marè aminao? b) Ino ty dikani-hoe “mandà” ty vatanao? (Henteo koa sary io.)

⁴ Lafa iha manokam-bata ho an’i Jehovah, le mifily ho mpianatsin’i Jesosy Kristy iha sady ty manao ty sitrapo-Ndranahary ro tena vatan-draha amy fiainanao. Ino iaby ty tafilitsy amy hoe manokam-bata? Hoy Jesosy: “Laha misy ta hanaraky ahy, le tsy maintsy mandà ty vatany ie.” (Mat. 16:24) Ty fehezan-teny grika nadika hoe “mandà ty vatany”, le azo adika koa hoe “tsy maintsy mandà ty sitrapony.” Mila mandà ze raha iaby tsy mahafalifaly an’i Jehovah zany iha laha fa nanokam-bata ho azy. (2 Kor. 5:14, 15) Midika zay fa mila manalavitsy ty “asan’ny nofotsy” iha, anisani-zay ty fijangajangà. (Gal. 5:19-21; 1 Kor. 6:18) Lasa hahatiaro ho voafehifehy va iha laha manaraky an’ny fitsipiky reo? Aha. Tsy sarotsy aminao ty manao ani-zay laha tea an’i Jehovah iha sady resy lahatsy hoe mahasoa anao ty manoriky ty fitsipikiny. (Sal. 119:97; Isaia 48:17, 18) Hoy rahalahy raiky atao hoe Nicholas zay: “Afaky misafidy iha hoe na ataonao manahaky vy amy prizon misaka anao tsy hanao ze raha teateanao na irinao ty fitsipikin’i Jehovah, na ataonao manahaky vy amy pilasy misy liona rey le miaro anao tsy ho azon-doza.”

5. a) Akory ty atao lafa iha hanokam-bata ho an’i Jehovah? b) Ino ty tsy mampitovy ty fanokanam-bata noho ty batisa? (Henteo koa sary io.)

⁵ Akory ty atao lafa iha hanokam-bata ho an’i Jehovah? Mivavaky aminy iha le mampitamà fa ie raiky avao ro hotompoanao sady ty sitrapony ro hataonao voaloha lista amy fiainanao. Bakeo mampitamà an’i Jehovah iha fa ho teanao avao ie amy “ty fonao iaby noho ty vatanao iaby noho sainao iaby voho ty herinao iaby.” (Mar. 12:30) Miresaky mitoka amy Jehovah zany iha lafa manokam-bata ho azy, le nareo roe avao ro mahay ani-zay. Ka manao akory ty batisa? Iny ndraiky tsy mitoka fa atao anatrehan’olo maro. Batisa io ro mampiseho amin’olo maro fa nanoka ty vatanao ho an’i Jehovah iha. Masy voady ataonao io. Tokony hotanjahinao avao zany ty safànao sady Jehovah koa mitamà fa hanao ani-zay iha.​—Mpito. 5:4, 5.

MANINO IHA RO MILA MANOKAM-BATA HO AN’I JEHOVAH?

6. Ino ty handrisiky ty olo raiky hanokam-bata ho an’i Jehovah?

⁶ Tea an’i Jehovah iha le zay ro antony bevata mahavy anao manokam-bata ho azy. Tsy fihetseham-po avao fitiava io. Lasa nitombo ty fitiavanao an’i Jehovah lafa iha ‘nahay soa’ azy noho nahay ty sitrapony. (Kol. 1:9) Lafa nianatsy ty Soratsy Masy iha le niresy lahatsy fa 1) tena misy Jehovah, 2) safàny ty Baiboly, le 3) mampiasa ty fandaminany ie mba hanatanteraha ty sitrapony.

7. Ino tse ty tokony hataontsika alohan’ny hanokanantsika ty vatantsika ho a-Ndranahary?

⁷ Tokony hahay ty fampianara fototsy amy Safà-Ndranahary ao ze olo manoka ty vatany ho azy sady tokony hiay mifanaraky amy ty fitsipikiny. Manao ze fara herin-drozy rozy mba hiresaha amin’olo ty raha nianaran-drozy. (Mat. 28:19, 20) Lasa nitombo ty fitiavan-drozy an’i Jehovah sady vomaiky lasa ie raiky avao ro tean-drozy hotompoa. Manahaky ani-zay koa va iha? Laha tea an’i Jehovah amy fonao iaby iha, le ho tsapanao fa tsy hoe raha natao mba hampifalifalea ty olo mampianatsy Baiboly anao na ty ray aman-dreninao avao ty hoe manokam-bata noho atao batisa, na hoe hanao ani-zay iha satria nanao ani-zay ty namanao.

8. Manino ty fahaiza mankasitraky ro hanampy anao hanoka ty vatanao ho an’i Jehovah? (Salamo 116:12-14)

⁸ Ara-dalàna laha manapa-kevitsy hanokam-bata ho an’i Jehovah iha satria lafa mandiniky iha le hitanao hoe fa maro biby ty raha nataony ho anao. (Vakio Salamo 116:12-14.) Zay mahavy ty Baiboly mikaiky an’i Jehovah hoe Mpanome ‘ty raha soa iaby.’ (Jak. 1:17) Ty sorom-panavotan’ny Anakilahiny iny, zany hoe Jesosy, ro tena miavaky amy fanomeza nameany antsika reo. Mba eritsereto avao moa! Vokatsin’ny vilim-panavota, le lasa afaky mifandramby soa amy Jehovah iha sady afaky mitamà hiay mandrakizay. (1 Jaona 4:9, 10, 19) Maro biby ty raha soa fa namean’i Jehovah anao, fe io ro porofo bevata nampisehoany hoe tena tea anao ie. Ka manao akory ty ampisehoanao hoe mankasitraky azy iha? Manao ani-zay iha laha manokam-bata ho azy. Io ty fomba farani-ze soa ampisehoanao ani-zay. (Deot. 16:17; 2 Kor. 5:15) Resahy amy boky Ho Azonao Tavy ty Fiaina Zisiky Farany! fianara 46, amy lohatenikely 4 ao ty sisany amy raha azonao ampisehoa fankasitraha. Misy video telo minity hoe Manolora Fanomeza ho a-Ndranahary, koa ao.

PARÈ HANOKAM-BATA NOHO HATAO BATISA VA IHA?

9. Manino ty olo raiky ro tsy tokony hahatsapa hoe niforoseva hanokam-bata ho an’i Jehovah ie?

⁹ Mety mahatsapa iha hoe mbo tsy parè hanokam-bata noho hatao batisa. Vasa mbo mila manova ty fomba fiainanao iha mba hifanaraky amy fitsipikin’i Jehovah. Na mety mbo mila fotoa lavalava iha mba hanatanjaha ty finoanao. (Kol. 2:6, 7) Tsy mitovy ty fandrosoan’olo kiraidraiky. Misy mpianatsy sisany zao avy le tea an’i Jehovah fa ty ilany mbo mandiny elaela. Manahaky ani-zay koa ty tanora. Tsy voatery hitovy iaby ty tao hahaparè an-drozy hanokam-bata ho an’i Jehovah. Soa zany laha tsy mampitaha ty vatanao amin’olo hafa iha. Miezaha le hasoavo ze mbo tokony hohasoavy.​—Gal. 6:4, 5.

10. Ino ty azonao atao laha mahatsapa iha hoe mbo tsy parè hanokam-bata noho hatao batisa? (Henteo koa ty efajoro hoe “Ho ani-ze Nitezà amy Fahamarina.”)

¹⁰ Anovo avao dingana reo ndre mbo mahatsapa aza iha hoe mbo tsy parè hanokam-bata ho an’i Jehovah. Mivavaha amy Jehovah le angataho ie hanampy anao mba hahavitanao hanova ze raha mbo mila ovà. (Fil. 2:13; 3:16) Afaky matoky iha fa hijanjy noho hamaly ty vavaky ataonao Jehovah.​—1 Jaona 5:14.

MANINO TY OLO SISANY RO MISALASALA?

11. Akory ty hanampean’i Jehovah antsika mba hahavy antsika tsy hivaliky aminy avao?

¹¹ Misy olo sisany mbo misalasala hanokam-bata noho hatao batisa ndre fa tokony hanao ani-zay aza. Mety mieritseritsy rozy hoe: ‘Manao akory laha manao fahotà bevata aho ka voaroaky?’ Laha matahotsy manahaky ani-zay iha, le matokisa fa hanome ze raha iaby ilànao Jehovah “mba hanome voninahitsy [azy] ty fandaisam-batanao, ka hampifalifaly azy tanteraky.” (Kol. 1:10) Hanome hery anao koa ie mba hahavitanao hanao raha soa avao. Fa maro ty olo nampeany ka lasa nahavita nanao ani-zay. (1 Kor. 10:13) Lasa vitsy amy zay ty olo voaroaky tsy ho anisan’ny fiangona satria manampy ty vahoakiny tsy hivaliky avao Jehovah.

12. Ino ty hanampy antsika tsy hanao fahotà bevata?

¹² Tsy lavorary tsika ka manaly ta hanao raha raty avao. (Jak. 1:14) Fe ndre zay, mana safidy iha. Mianky aminao zany ro hanao an’ny raha iny lafa iha miatriky fakam-panahy. Iha avao ro afaky mifily amy ze fomba hanandesanao ty fiainanao. Misy mivola fa tsy afaky mifehy ty fihetseham-pontsika noho ty raha ataontsika tsika. Fe tsy marina raha zay! Azonao atao ty mianatsy hifehy ty fanirian-draty anatinao ao. Ka ndre miatriky fakam-panahy aza iha, le afaky mifily tsy hanao raha raty. Misy raha sisany koa hanampy anao tsy hanota. Ohatsy hoe mivavaky amy Jehovah sanandro, mianatsy tsy tampaky ty Safà-Ndranahary, mivory, noho miresaky ty raha inoanao amin’olo hafa. Laha manao an’ny raha reo tsy tampaky iha, le hahazo hery ka ho vitanao ty hitanjaky ty voady nataonao. Tiarovo koa fa hanampy anao Jehovah ka ho vitanao ty hanao ani-zay.​—Gal. 5:16.

13. Akory ty azontsika anahafa ty modelin’i Josefa?

¹³ Ho mora aminao ty tsy hivaliky amy Jehovah laha fa dinihinao mialoha ty raha hataonao lafa iha miatriky fakam-panahy. Mivola ty Baiboly fa nisy olo maromaro nahavita nanao ani-zay, ndre tsy lavorary manahaky antsika aza rozy. Diniho ty ohatsin’i Josefa. Sahira valin’i Potifara iny nitao azy hanao firaisa taminy. Tsy hoe indraiky avao fa matetiky mihintsy. Fe fa nihainy mialoha ty raha hataony. Mivola ty Baiboly fa “tsy nety” ie, ka hoy ty asany: “Hataoko akory ty hanao raha raty biby zay ka hanota amy Ndranahary?” (Gen. 39:8-10) Azo antoky fa nihain’i Josefa ty tokony hatao taloha ty nilàn’ny ampela io azy. Lasa nimora taminy amy zay ty tsy hivaliky lafa nisy fakam-panahy.

14. Ino ty hanampy antsika tsy hanao raha raty?

¹⁴ Mety hiatriky fakam-panahy manahaky an’i Josefa koa iha. Fe akory ty azonao anahafa azy mba hahavy anao tsy hivaliky amy Ndranahary? Afaky dinihinao henanizao ty raha tokony hataonao lafa misy fakam-panahy. Ianaro zao: Avy le tohero ze raha halan’i Jehovah. Halaviro mihintsy aza ndre ty hieritseritsy an’ny raha iny. (Sal. 97:10; 119:165) Tsy hanota iha laha manao ani-zay. Fa ho hainao ty raha tokony hataonao satria fa nidinihinao.

15. Akory ty azon’olo raiky ampisehoa fa “mila mafy” an’i Jehovah ie? (Hebreo 11:6)

¹⁵ Mety hainao hoe nahita ty fahamarina iha ka ta hanompo an’i Jehovah amy ty fonao iaby. Fe mahatsapa iha hoe mbo misy raha misaka anao tsy hanokam-bata noho hatao batisa. Laha zay ie le afaky manao manahaky ty raha nataon’i Davida Mpanjaka iha. Afaky misoloho amy Jehovah iha hoe: “Diniho amy an-tsipiriany lahy aho Ndranahary, sady anovo hay ty foko. Diniho aho, ka anovo hay ty raha mampiasa loha ahy. Henteo tsy no misy raha raty anatiko atoa, le tariho amy lalan’ny mandrakizay aho.” (Sal. 139:23, 24) Laha manao ani-zay iha, le ho hita hoe tena mila ty fanampean’i Jehovah iha sady ta hiezaky mafy mba hanokam-bata noho hatao batisa. Mitahy ani-ze olo “mila azy mafy” Jehovah.​—Vakio Hebreo 11:6.

MIEZAHA HIFANDRAMBY MARÌNY AMY JEHOVAH AVAO

16-17. Akory ty nitaoman’i Jehovah ty olo nitezà tamy fahamarina? (Jaona 6:44)

¹⁶ Nivola Jesosy fa Jehovah ro nitao an’ny mpianatsiny rey. (Vakio Jaona 6:44.) Mba diniho moa hoe ino ty dikan’ny raha zay le manino raha io ro mahasoa anao. Lafa nitao ty olo kiraidraiky Jehovah le nahita raha soa taminy ao ie. “Fananany manoka” na “lafovily” ty fahitany antsika kiraidraiky. (Deot. 7:6; f.a.p.) Manahaky ani-zay koa ty fahitany anao.

¹⁷ Mety tanora vasa iha le Vavolombelon’i Jehovah ty ray aman-dreninao. Laha zay ie, le mety mahatsapa iha hoe tsy Jehovah ro nitao anao fa manaraky ty ray aman-dreninao avao iha, le zay ro mahavy anao manompo azy. Fe mivola ty Baiboly hoe: ‘Mamonjea a-Ndranahary, le hamonjy anao ie.’ (Jak. 4:8; 1 Tan. 28:9) Laha iha mihintsy ro miezaky hamonjy an’i Jehovah, le hamonjy anao koa ie. Tsy hoe olo miaraky amy fianakavianao avao ty fahitan’i Jehovah anao. Nitao ty olo kiraidraiky ie, le anatini-zay koa iha noho ze olo iaby nitezà tamy fahamarina manahaky anao. Laha miezaky mamonjy an’i Jehovah zany ty olo nitezà amy fahamarina le hamonjy azy koa ie, araky ty volanin’ny Jakoba 4:8.​—Ampitovizo amy 2 Tesalonianina 2:13.

18. Ino ty hodinihintsika amy lahatsoratsy manaraky ao? (Salamo 40:8)

¹⁸ Laha manokam-bata ho an’i Jehovah noho atao batisa iha, le manahaky ty toe-tsain’i Jesosy. Ie mihintsy ro nanolo-tena mba hanao ze raha nampanovin’ny Babany azy. (Vakio Salamo 40:8; Heb. 10:7) Ka ino ty hanampy anao tsy hivaliky amy Jehovah avao afaran’ny batisanao? Handiniky ani-zay tsika amy lahatsoratsy manaraky.