Ho Sambatsy Iha laha Tea Manome

1-2. Manino tsika ro nataon’i Jehovah ho sambatsy kokoa lafa manome raha olo?

VOMAIKY mahatiaro sambatsy tsika lafa manome raha olo tozay amean’olo raha. Fa zay mihintsy ty namoronan’i Jehovah antsika. (Asa. 20:35) Fe midika va raha zay hoe tsy falifaly tsika lafa amean’olo raha? Tsy zay. Ia amintsika, ohatsy, ro tsy nifalifaly lafa namean’olo raha? Fe vomaiky falifaly tsika laha tsika mihintsy ro manome. Tena soa fomba nanamboaran’i Jehovah antsika zay. Ino ty antony?

² Tsika avao zany le fa afaky manao raha mba hahasambatsy antsika. Afaky mampitombo ty hafaleantsika tsika lafa mila fomba hanomeza raha olo. Tsy hitanao baka amy zay va hoe tena miavaky ty nanamboaran’i Jehovah antsika?​—Sal. 139:14.

3. Manino Jehovah ro volany hoe “Ndranahary falifaly”?

³ Mivola ty Baiboly fa mahasambatsy ty manome. Azontsika soa zany henanizay ty antony mahavy ty Baiboly mivola hoe “Ndranahary falifaly” Jehovah. (1 Tim. 1:11) Ie tse ro nanome raha olo voalohany sady tsy misy olo tea manome mandilatsy azy. Nivola apostoly Paoly hoe Jehovah ro nanome ay antsika, le ie ro mahavy antsika “velo noho mihetsiky sady misy.” (Asa. 17:28) Baka amy Jehovah vatany “ty fanomeza soa iaby noho ty fanomeza tsy misy handrany iaby.”​—Jak. 1:17.

4. Ino ty hanampy antsika ho falifaly kokoa?

⁴ Samby ta ho sambatsy tsika iaby. Afaky hahatsapa ani-zay tsika laha tea manome manahaky an’i Jehovah. (Efes. 5:1) Handiniky ty modely soa ameany tsika amy lahatsoratsy toy ato. Hianarantsika koa hoe ino ty azontsika atao laha mahatsapa tsika hoe tsy mankasitraky ty raha ataontsika ty olo. Hanampy antsika ho tea manome avao raha zay sady vomaiky ho falifaly.

MIEZAHA HATARIKY MANAHAKY AN’I JEHOVAH

5. Ino ty raha sisany amean’i Jehovah antsika?

⁵ Akory ty ampisehoan’i Jehovah hoe matariky ie? Retoa misy fomba vitsivitsy. Manome ze raha ilàntsika Jehovah. Mety tsy tena miada aloha tsika, fe ataony azo antoky hoe mahazo ze raha ilàntsika tsika. Ataony, ohatsy, ze hahavy antsika hana hany, siky, noho pilasy hiroroa. (Sal. 4:8; Mat. 6:31-33; 1 Tim. 6:6-8) Voatery tsy maintsy manome ze raha ilàntsika va Jehovah? Tsy zay! Ka manino zany ie ro manao ani-zay?

6. Ino ty ianarantsika baka amy Matio 6:25, 26?

⁶ Amean’i Jehovah ze raha ilàntsika tsika satria teany. Diniho moa ty raha nivolanin’i Jesosy amy Matio 6:25, 26 ao. (Vakio.) Niresaky mikasiky voro Jesosy, le hoy ty asany: “Tsy mamafy na mamory vokatsy na manajary hany anaty trano fanajaria vokatsy raha rey.” Fe henteo moa ty raha nivolaniny tafarani-zay: “Manome hany an-drozy Babanareo an-danitsy any iny.” Bakeo Jesosy nivola hoe: “Tsy mbo sarotsy mandilatsy ani-rey va nareo?” Ino ty teany hampianary antsika? Amy Jehovah, le lafovily mandilatsy ty biby ty mpanompony tsy mivaliky. Ka laha ty biby aza karakaran’i Jehovah, handraky tsika mpanompony! Afaky matoky tsika fa hanome ze raha ilàntsika koa ie. Manahaky baba raiky be fitiava io Jehovah ka mikarakara ty fianakaviany.​—Sal. 145:16; Mat. 6:32.

7. Mivolana fomba raiky azontsika ampisehoa hoe matariky manahaky an’i Jehovah tsika. (Henteo koa sary io.)

⁷ Manahaky an’i Jehovah koa tsika ka ameantsika ze raha ilàny ty olo hafa satria teantsika. Misy rahalahy na anabavy hainao va hoe tsy mana hany na akanjo? Afaky mampiasa anao Jehovah mba hanampea azy. Hain’olo hoe tena tea manampy olo ty vahoakin’i Jehovah lafa misy loza. Tamy vanim-potoan’ny arety mandripaky COVID-19 iny, ohatsy, le maro ty rahalahy noho anabavy nizara hany, siky, noho raha hafa tamy ze olo nila ani-zay. Maro koa ty nanome drala mba hanohana ty asa maneran-tany. Vokany, lasa nahazo fanampea ze mpiara-manompo amy tany toy iaby nitra-doza. Nanoriky an’ny raha volanin’ny Hebreo 13:16 toy rahalahy noho anabavy tea manome rey: “Ka halino ty manao raha soa noho ty mizara amy hafa, fa tena mahafalifaly a-Ndranahary ty soro manahaky ani-zay.”

8. Lasa mahavita ino tsika lafa amean’i Jehovah hery? (Filipianina 2:13)

⁸ Manome hery Jehovah. Tean’i Jehovah ty mizara ty heriny tsy misy fetrany amy ty mpanompony tsy mivaliky. (Vakio Filipianina 2:13.) Fa nisy fotoa va iha nangataky hery tamy Jehovah mba hahafahanao manohitsy fakam-panahy? Na nangataky hery mba hiatreha raha sarotsy? Mety fa nisy fotoa koa iha nangataky hery taminy mba hahavitanao ze raha tokony hataonao amy andro iny. Lafa nivaly amy zay vavaky nataonao iny, le mety hieky iha hoe marina raha nivolanin’ny apostoly Paoly toy: “Mana ty hery hiatreha ze raha iaby miseho aho, satria eo azy manome hery ahy iny.”​—Fil. 4:13.

9. Ino ty raha sisany azontsika atao mba hanahafa ty fomba ampiasan’i Jehovah ty heriny? (Henteo koa sary io.)

⁹ Afaky manahaky an’i Jehovah tsika ndre tsy lavorary aza satria tea mizara ty heriny amy ty mpanompony ie. Tsy afaky mizara hery na ty tanjaky ananantsika amin’olo hafa aloha tsika. Fe afaky mampiasa ty herintsika tsika mba hanampea ty hafa. Mety azontsika atao, ohatsy, ty manampy rahalahy noho anabavy be tao na marary, le mba manampy an-drozy amy raha an-trano ao na manao bazary ho an-drozy. Azontsika atao koa ty manampy amy fanadiova noho fikojakojà ty Efitrano Fanjakà, laha afaky manao ani-zay tsika. Laha mampiasa ty herintsika mba hanaova ani-reo tsika, le tena handramby soa ty rahalahy noho anabavintsika.

10. Akory ty azontsika ampahereza ty olo hafa amy ty raha volanintsika?

¹⁰ Ka halino fa misy heriny koa ty raha volanintsika. Ia, ohatsy, ty olo hainao hoe hahazo fampahereza laha resahinao aminy ty raha soa ataony? Misy olo hainao hoe mila fampahereza va? Laha zay ie, manino laha manao raha iha mba hampahereza azy? Azonao atao ty mamangy azy an-tranony any, na mikaiky azy, na mandefa karta kelikely, email, na mesazy. Ka miasa loha marè mikasiky ty raha hovolaninao. Ndre raha kelikely avao aza ro volaninao fe asehonao hoe midary azy iha, le fa mety hanampy an’ny rahalahinao na anabavinao iny tsy hivaliky mihintsy na tsy hifantoky marè amy raha mahazo azy iny.​—Ohab. 12:25; Efes. 4:29.

11. Akory ty ampiasan’i Jehovah ty fahendreany?

¹¹ Manome fahendrea Jehovah. Zao ty nisoratin’i Jakoba mpianatsy: “Laha misy aminareo tsy ampy fahendrea, le tokony tsy hieny hangataky an’ny raha zay amy Ndranahary ie, satria matariky amin’olo iaby Ndranahary sady tsy manome tsiny.” (Jak. 1:5; f.a.p.) Hitantsika baka amy zay fa tsy tanjahin’i Jehovah ho azy raiky avao ty fahendreany. Teany ty mizara an’ny raha zay amin’olo. Henteo koa fa nivola Jakoba hoe lafa Jehovah manome fahendrea, le “tsy manome tsiny” ie na “mikinokino.” Tsy ataon’i Jehovah mihintsy ze hahavy antsika hahatsapa hoe tsy misy dikany tsika lafa mila ty tari-dalany. Vomaiky aza ie mampirisiky antsika hanao ani-zay.​—Ohab. 2:1-6.

12. Amy raha manao akory tsika ro afaky mizara ty fahendreantsika amin’olo hafa?

¹² Ka manao akory tsika? Afaky manahaky an’i Jehovah koa va tsika ka mizara ty fahendreantsika? (Sal. 32:8) Misy fomba maro azontsika vahoakin’i Jehovah atao mba hizarà ty raha nianarantsika. Matetiky, ohatsy, tsika mampiofana ty mpitory vaovao. Ty anti-panahy manampy tsikelikely ty mpikarakara fiangona noho ty rahalahy vita batisa mba hahavita ty andraikitsin-drozy amy fiangona eo. Misy koa rahalahy noho anabavy mana traikefa amy fanorena noho fikojakojà, le mampiofana ani-ze tsy ampy traikefa, amy zay mba afaky mandramby anjara amy asa fanompoa reo rozy.

13. Akory ty azontsika anahafa an’i Jehovah lafa tsika mizara ty fahendreantsika?

¹³ Laha mampiofana olo iha, le miezaha hanahaky an’i Jehovah. Tiarovo fa tena tea mizara ty fahendreany Jehovah. Manahaky ani-zay koa fa parè hizara ze raha haintsika amy ze olo ampianarintsika tsika. Lafa manao ani-zay tsika le tsy hoe tanjahintsika ho antsika avao ty raha sisany fa tsy atorontsika azy satria matahotsy tsika hoe tsy no ho lasany ty andrakitsintsika. Na hanao ho zao tsika hoe: ‘Ino tse moa ty hampiofanako azy? Zaho aza tsy nisy nampiofana ka!’ Tsy tokony hana toe-tsay manahaky ani-zay mihintsy ty mpanompon’i Jehovah. Vomaiky aza tsika falifaly mizara amin’olo hafa ze raha haintsika. Fe tsy zay avao fa ‘ndre ty aintsika koa aza’, ka manao ze azontsika atao tsika mba hampiofana ty hafa. (1 Tes. 2:8) Mitamà tsika fa “hahay hampianatsy ty hafa koa rozy bakeo.” (2 Tim. 2:1, 2) Laha tsy misalasala mizara ty fahendreantsika amin’olo hafa tsika, le samby ho hendry noho ho falifaly tsika noho ty olo hafa.

MANAO AKORY LAHA TSY ANKASITRAHAN’OLO TY RAHA ATAONTSIKA?

14. Akory ty fihetsikin’ny ankamaroan’olo lafa tsika manome raha an-drozy?

¹⁴ Lafa tsika manome na manao raha ho an’olo, sirtò amy rahalahy noho anabavintsika reo, le matetiky rozy mankasitraky antsika. Mety handefa karta amintsika rozy mba hisaora antsika na mety mampiasa fomba hafa mba hampisehoa ty fankasitrahan-drozy. (Kol. 3:15) Vomaiky falifaly tsika lafa mahazo an’ny fankasitraha rey.

15. Ino ty tokony hotiarovintsika lafa misy olo tsy mankasitraky ty raha nataontsika ho azy?

¹⁵ Fe mety tsy hisaotsy antsika ty olo sisany kindraiky. Atao raha tsy darean’olo aza kindraiky ty raha iaby nataontsika ho an-drozy, na tsy eritseretiny hoe nandany fotoa, hery noho drala tsika mba hanaova raha ho an-drozy. Laha miseho zay, ino ty tokony hataontsika mba hahavy antsika ho falifaly avao na tsy ho diso fanantenà? Tiarovo ty raha resahin’ny andinin-teny fototsin’ny fianarantsika toy, amy Asan’ny Apostoly 20:35 ao. Tsy mianky amy ty fihetsikin’olo ameantsika raha iny ro hahasambatsy antsika. Afaky miezaky ho falifaly avao tsika ndre tsy mankasitraky an’ny raha iny aza ty olo. Ino ty hanampy antsika? Retoa misy hevitsy vitsivitsy.

16. Ino ty raha tokony hifantohantsika lafa tsika manome?

¹⁶ Tiarovo fa manahaky an’i Jehovah iha lafa manome raha olo. Ameany raha soa ty olo ndre mahay mankasitraky rozy ndre tsy mankasitraky. (Mat. 5:43-48) Mampitamà Jehovah fa laha tsika koa miezaky hanahaky azy ka manome tsy “mitamà valiny”, le “hahazo valisoa bevata” tsika. (Lioka 6:35) Mety hisy avao ty olo hankasitraky antsika. Fe ndre misy raha zay ndre tsy misy, le hamaly soa antsika avao Jehovah amy ty raha soa nataontsika amin’olo satria tsika niezaky ‘nanome amim-pifalea.’​—Ohab. 19:17; 2 Kor. 9:7.

17. Ino ty tena antony tokony hahavy antsika hanome raha olo? (Lioka 14:12-14)

¹⁷ Ho afaky hanahaky an’i Jehovah avao tsika lafa manome raha olo laha manoriky ty torolala amy Lioka 14:12-14 ao. (Vakio.) Tsy raty aloha ty manasa ani-ze olo fa nanasa antsika hisakafo na matariky amy ze nanome raha antsika. Fe manao akory laha ambintsika hoe tsy manome raha olo tsika laha tsy mitamà hoe hanome antsika olo iny? Laha zay ie, le soa tsika laha miezaky manaraky an’ny torohevitsin’i Jesosy iny. Azontsika atao ty manasa ze olo haintsika hoe tsy mana fahafaha hanasa antsika. Ho falifaly tsika amy zay satria manahaky an’i Jehovah. Laha tsy mitamà valiny tsika le ho falifaly avao lafa manome raha olo, ndre tsy mankasitraky antsika aza rozy.

18. Ino ty tsy tokony hataontsika, le ino ty antony?

¹⁸ Ka avy le mieritseritsy hoe tsy mahay mankasitraky olo iny. (1 Kor. 13:7) Eritsereto zao laha misy olo tsy mankasitraky ty raha nataonao ho azy: ‘Tena tsy mahay mankasitraky va ie, sa zista nihalinony avao ty nisaotsy ahy?’ Mety misy antony nahavy azy tsy nankasitraky antsika ndre nitamà ani-zay aza tsika. Mety tena mankasitraky antsika ty olo sisany anatiny any, fe sarotsy aminy ty hivola an’ny raha zay. Mety menatsy rozy hoe rozy ndraiky ro nampea kanefa rozy mpanampy olo taloha. Fe laha tena tea an’ny rahalahy noho anabavintsika reo tsika, le tsy hieritseritsy raha raty mikasiky an-drozy sady ho falifaly avao lafa manome raha an-drozy.​—Efes. 4:2.

19-20. Manino ro soa ty manam-pahareta lafa tsika manome raha olo? (Henteo koa sary io.)

¹⁹ Miezaha hanam-pahareta. Hoy Solomona Mpanjaka hendry: “Atoraho ambony rano eny ty mofonao, fa ho hitanao ndraiky ie lafa afaky andro maro.” (Mpito. 11:1) Hitantsika baka amy zay fa mety ho elaela, zany hoe “afaky andro maro” ty olo sisany vo hisaotsy antsika. Toy misy tantara mampiseho ani-zay.

²⁰ Tao maro lasa zay, nanoratsy taratasy mampahery ho an’ny ranabavy raiky vo nivita batisa ty valin’ny mpiandraikitsin’ny faritsy raiky. Nihamafisiny tamy taratasy iny ao fa tena vatan-draha ty tsy mivaliky amy Jehovah. Valo tao eo ho eo tafarani-zay vo namaly an’ny taratasy iny ranabavy iny. Hoy ty asany: “Mety tsy hainao mihintsy raha hovolaniko aminao toy, tena teako ho hainao fa tena nanampy ahy iha tanatin’ny tao maro rezay.” Mbo nitohizany raha iny hoe: “Tena nampahery ahy taratasinao iny. Nisy andinin-teny nitononinao zay nidosiky ty foko ka tsy hohalinoko mihintsy.”a Nitantara ty raha sarotsy natrehiny ie le bakeo nivola hoe: “Nisy fotoa aho ta ho niala sady ho nijano tsy nanompo an’i Jehovah. Fe nitiaroko avao andinin-teny nisoratinao iny ka zay ro nanampy ahy tsy hivaliky.” Nivola koa ie hoe: “Tsy nisy raha hafa tena nanampy ahy tanatin’ny valo tao zay laha tsy taratasinao iny avao.” Mba eritsereto moa ty hafalean’ny valin’ny mpiandraikitsin’ny faritsy iny lafa ie nahazo an’ny taratasy io, “andro maro” tafara atoy! Mety ho ela afara atoy koa tsika vo hahazo fisaora lafa nisy raha soa nataontsika tamin’olo.

21. Manino iha ro tapa-kevitsy hoe hiezaky hatariky manahaky an’i Jehovah avao?

²¹ Nihitantsika teo fa tena miavaky ty fomba nanamboaran’i Jehovah antsika. Marina fa falifaly tsika lafa amean’olo raha, fe vomaiky falifaly tsika lafa tsika mihintsy ro manome raha olo. Mahatiaro sambatsambatsy tsika lafa nahavita nanampy ty mpiara-manompo amintsika. Le tena falifaly tsika lafa misaotsy antsika rozy. Fe ndre mankasitraky antsika rozy ndre tsy mankasitraky, le falifaly avao tsika satria nanao raha soa. Ka halino mihintsy hoe ndre ino ino ameanao, le “afaky manome anao mandilatsy lavitsini-zay Jehovah.” (2 Tan. 25:9) Tsy maintsy be lavitsy mandilatsy ty raha ameantsika olo zany ty raha amean’i Jehovah! Sady tsy misy raha soa mandilatsy ty hoe mahazo valisoa baka amy Jehovah. Enga anè tsika hiezaky hatariky manahaky an’ny Babantsika an-danitsy any iny avao.