Manaova Fanapahan-kevitsy Mahafalifaly an’i Jehovah

1. Ino ty raha sarotsy atrehintsika iaby?

MILA mandramby fanapahan-kevitsy avao tsika sanandro. Tsotra ty fanapahan-kevitsy sisany, ohatsy hoe ino ty atao sakafo maray na amy firy mandeha matory. Fe tena sarotsy koa ty manapa-kevitsy amy raha sisany. Mety hisy vokany amy fahasalamantsika, amy fifaleantsika, amy fianakaviantsika, na amy fanompoantsika mihintsy aza raha zay. Teantsika laha mahasoa antsika noho ty fianakaviantsika ty fanapahan-kevitsy ataontsika. Fe ty tena vatan-draha, teantsika laha mahafalifaly an’i Jehovah ty fanapahan-kevitsy rambesintsika.​—Rom. 12:1, 2.

2. Ino ty hanampy anao handramby fanapahan-kevitsy soa?

² Azo inoa fa handramby fanapahan-kevitsy soa iha laha: 1) miezaky hahay ty raha misy, 2) mandiniky hoe ino ty hevitsin’i Jehovah, le 3) mandiniky soa ty safidy hataonao. Hodinihintsika amy lahatsoratsy toy ato raha reo, le ho hitantsika koa hoe akory ty ampiofanantsika ty fahaizantsika mandiniky​—Ohab. 2:11.

MIEZAHA HAHAY TY RAHA MISY

3. Manino iha ro mila miezaky hahay ty raha misy alohan’ny hanapa-kevitsy? Manomeza ohatsy.

³ Ty raha voalohany hanampy anao handramby fanapahan-kevitsy soa le ty fiezahanao hahay ty raha misy. Manino raha zay ro vatan-draha? Eritsereto hoe misy olo raiky mamonjy dokotera satria tsy salama. Avy le hitsabo azy va dokotera iny kanefa mbo tsy nandiniky azy soa na nanontany azy? Azo antoky fa tsy hanao ani-zay ie. Manahaky ani-zay koa, fa handramby fanapahan-kevitsy soa iha laha mandiniky soa ty raha mahazo anao. Akory ty hanaovanao ani-zay?

4. Araky ty Ohabolana 18:13, ino ty hanampy anao hahazo antoky fa mahay soa ty raha misy iha? (Henteo koa sary io.)

⁴ Afaky hahay ty raha misy iha laha mametraky fanontanea. Ndao atao hoe nisy nanasa anao hanatriky fety raiky. Handeha va iha? Laha tsy hainao olo manasa anao iny na tsy hainao ty raha hatao amy fety iny any, le mila manontany azy iha, ohatsy hoe: “Hatao aia fety io? Mbia ty hanaova azy?” Ho maro olo va ty any? Ia ty hiandraikitsy an’ny fety io? Ia iaby ty ho any? Ino iaby ty raha hatao any? Hisy toaky va ty any? Hanampy anao handramby fanapahan-kevitsy soa ty valin’ny fanontanea reo.​—Vakio Ohabolana 18:13.

5. Ino ty tokony hataonao lafa hainao soa ty raha misy?

⁵ Bakeo lafa hainao amy zay ty raha misy, le diniho soa. Manao akory, ohatsy, laha hainao hoe hisy olo tsy manaraky ty torolalan’ny Baiboly hanatriky any fety iny na tsy hisy hanara-maso ty finoman-toaky any? Hitanao va hoe mety ho lasa baranahiny fety iny? (1 Pet. 4:3) Manao akory koa laha mifanindry amy fotoa fivorianareo na amy fotoa fandehananao manompo fety iny? Lafa hainao amy zay ty raha iaby mifandramby amy raha iny, le tsy ho sarotsy aminao ty handramby fanapahan-kevitsy soa. Fe misy raha hafa tokony hataonao koa. Marina fa hainao amy zay ty mikasikasiky an’ny raha iny, fe mila dinihinao koa hoe manao akory ty fahitan’i Jehovah azy.​—Ohab. 2:6.

DINIHO HOE INO TY HEVITSIN’I JEHOVAH

6. Araky ty Jakoba 1:5, manino tsika ro tokony hila ty fanampean’i Jehovah?

⁶ Angataho Jehovah mba hanampy anao hahay ty hevitsiny. Mampitamà ie fa hanome fahendrea antsika mba hahaizantsika handramby fanapahan-kevitsy mampifaly azy. Hanome fahandrea antsika ie satria “matariky amin’olo iaby sady tsy manome tsiny.”​—Vakio Jakoba 1:5.

7. Akory ty hahaizanao ty hevitsin’i Jehovah? Manomeza ohatsy.

⁷ Lafa baka nivavaky iha mba hahazo ty tari-dalan’i Jehovah, le ambeno soa ty fomba hamaleany azy. Toy misy ohatsy: Laha trobo an-tany lavitsy any iha, le mety hanontany olo mipetraky amy faritsy iny eo. Fe avy le handeha va iha kanefa mbo tsy nanoro lala anao ie? Azo antoky fa tsy hanao ani-zay iha. Mila mijanjy soa ty tari-dala volaniny tse iha. Manahaky ani-zay koa, fa lafa baka nangataky fahendrea amy Jehovah iha, le miezaha hahay ty fomba amaleany azy, ka ianaro ty lalàna noho ty toro-lala amy Baiboly ao mifandramby amy raha iainanao iny. Laha hanapa-kevitsy, ohatsy, iha hoe hanatriky an’ny fety niresahintsika taloha teo iny sa tsy hanatriky, le tokony hodinihinao ty raha volanin’ny Baiboly mikasiky ty atao hoe fety baranahiny, noho ty naman-draty. Mila dinihinao koa hoe ty Fanjakà-Ndranahary ro tokony ho vatan-draha marè aminao mandilatsy ty raha teanao.​—Mat. 6:33; Rom. 13:13; 1 Kor. 15:33.

8. Ino ty azonao atao laha mila fanampea iha mba hahitanao ty fanazavà ilànao? (Henteo koa sary io.)

⁸ Fe mety hila fanampea iha kindraiky mba hahitanao ty fanazavà ilànao. Mety hahazo torohevitsy baka amy rahalahy na anabavy fa za-draharaha iha. Fe ndre zay, le mahasoa anao koa ty manao fikaroha manoka. Afaky manao fikaroha amy fitaova fianarantsika rey iha, anisani-zay ty Fitaovana Fikarohana ho An’ny Vavolombelon’i Jehovah noho ty Andinin-teny Manampy amy Fiainantsika Kristiana. Hahita fanazavà mahasoa maro amy fitaova reo iha. Ka halino fa ty raha kendrènao le hoe handramby fanapahan-kevitsy mampifalifaly an’i Jehovah.

9. Akory ty ahazoantsika antoky hoe hampifalifaly an’i Jehovah ty fanapahan-kevitsy ataontsika? (Efesianina 5:17)

⁹ Akory ty ahazoantsika antoky hoe hampifalifaly an’i Jehovah ty fanapahan-kevitsy ataontsika? Voalohany, mila mahay azy soa tsika. Mivola ty Baiboly hoe “ze mahay ani-azy Farany Masy iny ro mahihitsy.”(Ohab. 9:10) Eka, hahihitsy vatany tsika laha mahay ty toetsin’i Jehovah, ty fikasàny, noho ty raha teany na halany. Eritsereto zao: ‘Ino ty fanapahan-kevitsy tokony hataoko mba hampifalea an’i Jehovah, satria mahay mikasiky azy aho?’ ​—Vakio Efesianina 5:17.

10. Manino ty torolalan’ny Baiboly ro vatan-draha marè mandilatsy ty fomban-draza na ty kolontsay?

¹⁰ Tsy maintsy handiso fanantenà ty namantsika na ty fianakaviantsika tsika kindraiky, lafa manao raha mampifaly an’i Jehovah. Ohatsy, mety hisy ray aman-dreny sisany hanery ty anakampelany hanambaly olo manan-kanana, ndre tsy de soa aza ty fifandrambesan’olo iny amy Jehovah. Ara-dalàna laha tean-drozy hana fiaina soa anakampelan-drozy iny. Fe zao ty tokony ho eritseretin’ny anakampelan-drozy iny: Hanampy ahy hifandramby soa amy Jehovah va lahilahy io? Manao akory ty fahitan’i Jehovah an’ny raha toy? Hitantsika amy Matio 6:33 ty valiny. Mampirisiky ty Kristiana andininy io mba ‘hila avao tse an’ny Fanjakà iny.’ Marina fa manaja ty ray aman-drenintsika noho ty olo tanà raiky amintsika tsika, fe ty hampifalifaly an’i Jehovah ro tena vatan-draha amintsika.

DINIHO SOA TY SAFIDY HATAONAO

11. Ino ty toetsy resahin’ny Filipianina 1:9, 10 hanampy anao handiniky soa ty safidy hataonao?

¹¹ Lafa baka nandiniky ty torolalan’ny Baiboly mikasiky ty fanapahan-kevitsy hataonao amy zay iha, le mila mandiniky soa ty safidy hataonao. (Vakio Filipianina 1:9, 10) Hanampy anao ty fahaiza mandiniky mba hahay ty vokatsin’ny safidy hataonao. Tsotra ty fanapahan-kevitsy sisany kindraiky. Fe tsy voatery hanahaky ani-zay ty fanapahan-kevitsy iaby. Ka ino ty hanampy anao handramby fanapahan-kevitsy soa, ndre amy raha sarotsy aza? Tsy ino fa ty fahaiza mandiniky.

12-13. Manino ty fahaiza mandiniky ro hanampy anao hahay hanapa-kevitsy amy resaky asa?

¹² Ndao atao hoe mila asa iha mba hamelomanao ty fianakavianao. Nahita asa roe azonao atao amy zay iha. Nidinihinao soa ty raha iaby, ohatsy, hoe ty mikasikasiky an’ny asa iny, ty andro hiasà, noho ty fotoa holaninao hivezevezea any, na ty raha manahatahaky an’ny reo. Samby mifanaraky amy torolalan’ny Baiboly koa asa reo. Mety hataonao amy zay ty raiky aminy satria teanao na koa be karama. Fe ndre zay, le misy raha hafa tokony hodinihinao tse alohan’ny handrambesanao fanapahan-kevitsy.

¹³ Mety hahavy anao ho tara va, ohatsy, asa iny ka tsy hahatratsy fivoria feno iha? Mety hahavy anao tsy hanam-potoa hiaraha amy fianakavianao noho hikarakarà ty ara-panahin-drozy va asa iny? Hanampy anao ty fanontanea manahaky ani-reo mba hifantoky amy “ze tena vatan-draha,” zany hoe ty fanompoa noho ze raha ilàn’ny fianakavianao, fa tsy amy filàn-drala. Hanao fanapahan-kevitsy hotahin’i Jehovah iha amy zay.

14. Manino ty fahaiza mandiniky noho ty fitiava ro manampy antsika tsy hanao raha hampalahelo ty hafa?

¹⁴ Manampy antsika koa ty fahaiza mandiniky mba hieritseritsy ty mety ho vokatsin’ny fanapahan-kevitsy ataontsika amin’olo, mba hahavy antsika tsy “haminga ty hafa.” (Fil. 1:10) Tena ilà raha zay lafa mandramby fanapahan-kevitsy tsika, ohatsy hoe amy resaky akanjo noho pozim-bolo. Ndao atao hoe misy karazan’akanjo na pozim-bolo teanao. Fe manao akory laha mety hampeloky olo amy fiangona eo na hitserehan’olo an-tanà eo raha iny? Hanampy antsika ty fahaiza mandiniky mba hidary ty fihetseham-pon-drozy. Laha tena manam-pitiava tsika, le hiambany noho hieritseritsy ze hahasoa ty “hafa.” (1 Kor. 10:23, 24, 32; 1 Tim. 2:9, 10) Hanao fanapahan-kevitsy mampiseho fitiava noho fanajà ty hafa tsika amy fotoa zay.

15. Ino ty raha mila dinihinao tse alohan’ny handrambesanao fanapahan-kevitsy bevata?

¹⁵ Lafa handramby fanapahan-kevitsy bevata iha, le diniho hoe ino ty tokony hataonao mba hahatanteraky azy. Nampianatsy antsika Jesosy mba ‘hanao kontikonty hoe hotrino ty ho lany.’ (Lioka 14:28) Diniho zany ty fotoa noho ty drala ho laninao noho ty ezaky ilànao mba hanatanteraha an’ny fanapahan-kevitsy iny. Azonao atao kindraiky ty mifampiresaky amy fianakavianao hoe ino ty tokony hataon-drozy mba hahatanteraky an’ny fanapahan-kevitsy iny. Ino ty mahasoa ani-zay? Mety hanampy anao raha zay mba hahita laha misy tokony hahity fanapahan-kevitsinao iny na misy hevitsy tena soa baka amin-drozy. Laha mifampiresaky amy fianakavianao iha sady mijanjy soa ty hevitsin-drozy, le parè hiara-miasa aminao rozy mba hahatanteraky an’ny fanapahan-kevitsy iny.​—Ohab. 15:22.

MANDRAMBESA FANAPAHAN-KEVITSY SOA

16. Ino ty hanampy anao hahay hanapaha-kevitsy? (Henteo koa ty efajoro hoe “Ino ty Atao mba Handrambesa Fanapahan-kevitsy Soa?”)

¹⁶ Laha orihinao soso-kevitsy niresahintsika reo, le parè handramby fanapahan-kevitsy soa iha. Lafa hainao ty raha misy sady fa nandiniky torolala hanampy anao handramby fanapahan-kevitsy mahafalifaly an’i Jehovah iha, le angataho amy zay ie mba hanampy anao hahatanteraky an’ny fanapahan-kevitsinao iny.

17. Ino ty tena hanampy anao handramby fanapahan-kevitsy soa?

¹⁷ Mety fa maro ty fanapahan-kevitsy nety soa nataonao taloha tany. Fe ndre zay, le tiarovo fa ty fahendrea baka amy Jehovah avao ro tena hanampy anao handramby fanapahan-kevitsy soa, fa tsy ty fahaizanao na ty traikefa anananao. Jehovah raiky avao ro afaky manome anao an’ny ampahany bevata amy fahendrea retoa: fahaiza, fahatakara noho fahaiza mandiniky. (Ohab. 2:1-5) Afaky hanampy anao handramby fanapahan-kevitsy mahafalifaly azy ie.​—Sal. 23:2, 3.