“Filio ... Ze Hotompoanareo”

1. Tsy maintsy manao ino tsika laha ta ho sambatsy, le ino ty antony? (Isaia 48:17, 18)

TENA tea antsika Babantsika an-danitsy iny, sady teany hahazo tavy ty fiainantsika amy zao noho amy hoavy tsika. (Mpito. 3:12, 13) Lafa niforoniny tsika, le nameany fahaiza miavaky, fe tsy nameany fahafaha hifanday tsika olombelo na fahafaha hamaritsy hoe ino ty mety le ino ty tsy mety. (Mpito. 8:9; Jer. 10:23) Hainy hoe laha tsy manompo azy noho tsy manaraky ty fitsipikiny tsika, le tsy ho sambatsy mihintsy.​—Vakio Isaia 48:17, 18.

2. Ino ty tean’i Satana hinoantsika, le ino ty nataon’i Jehovah mba hanaporofoa hoe diso raha zay?

² Tean’i Satana hino tsika hoe mahavita mifanday ty olombelo samby olombelo sady afaky ho sambatsy ndre tsy misy an’i Jehovah aza. (Gen. 3:4, 5) Mba hanaporofoan’i Jehovah hoe diso raha nivolanin’i Satana zay, le nengany hifanday anatin’ny fotoa voafetra ty olombelo. Hita henanizao fa tsy mahay manday ty fitondran’olombelo. Fe maro ty lahilahy noho ampela resahin’ny Baiboly hoe afa-po noho sambatsy lafa nanompo an’i Jehovah. Voalohany amy zay Jesosy Kristy. Ndao ho henteantsika hoe manino Jesosy ro nifily hanompo an’i Jehovah. Hodinihintsika koa hoe manino Babantsika an-danitsy any iny ro maeva hivavaha. Bakeo horesahintsika amy farany hoe ino ty antony sisany mahavy antsika mifily hanompo an’i Jehovah.

MANINO JESOSY RO NIFILY HANOMPO AN’I JEHOVAH?

3. Ino ty nivolanin’i Satana fa hameany an’i Jesosy, fe ino ty nifilin’i Jesosy?

³ Lafa tan-tany etoy Jesosy, le tsy maintsy nifily hoe ia ty ho tompoany. Vo vita batisa kelikely ie, le nivola taminy Satana fa laha miankohoky aminy indraiky avao ie le hameany azy ty fanjakà iaby an-tany etoy. Fe namaly Jesosy hoe: “Mialà any iha Satana! Fa voasoratsy hoe: ‘Jehovah Ndranaharinao ro tsy maintsy iankohofanao, le ie raiky avao ro tsy maintsy hotompoanao.’” (Mat. 4:8-10) Manino Jesosy ro nanao ani-zay? Ndao tsika handiniky antony vitsivitsy.

4-5. Ino ty antony sisany nahavy an’i Jesosy nifily hanompo an’i Jehovah?

⁴ Ty fitiava ro antony bevata nahavy an’i Jesosy nifily hanompo an’i Jehovah. Tena tea an’ny Babany Jesosy. (Jaona 14:31) Manompo an’i Jehovah koa Jesosy, satria zay ty tokony hatao. (Jaona 8:28, 29; Apok. 4:11) Hainy fa Jehovah ro Mpamoro, tena azo atokisa, noho afaky manome raha soa maro. (Sal. 33:4; 36:9; Jak. 1:17) Nivola ty marina tamy Jesosy avao Jehovah sady baka aminy iaby ze raha iaby nananan’i Jesosy. (Jaona 1:14) Hita hoe tsy mitovy tanteraky amy Jehovah mihintsy Satana. Ty raha nataony avao ro nahavy ty olombelo ho maty. Mpavandy ie, tea tena, sady tsy mety afa-po. (Jaona 8:44) Hain’i Jesosy soa raha zay, ka tsy nieritseritsy hizizo amy Jehovah manahaky an’i Satana mihintsy ie.​—Fil. 2:5-8.

⁵ Nifily hanompo an’i Jehovah koa Jesosy, satria teany ho hita hoe ino ty ho vokany laha tsy mivaliky ie. (Heb. 12:2) Hainy fa laha tsy mivaliky mihintsy ie, le hanamasy ty anaran’ny Babany sady tsy hisy sasy ty ota noho ty fahafatesa.

MANINO JEHOVAH RO MAEVA IVAVAHA?

6-7. Manino ro maro ty olo tsy manompo an’i Jehovah henanizao, fe manino ie ro maeva ivavaha?

⁶ Maro ty olo tsy manompo an’i Jehovah henanizao, satria mbo tsy mahay ty toetsy soa ananany noho tsy mahay ty raha nataony ho an-drozy. Manahaky ani-zay mihintsy ty olo nitorian’i Paoly ta Atena tany.​—Asan’ny Apostoly 17:19, 20, 30, 34.

⁷ Nihazavanin’i Paoly tamy Atenianina reo, fa Ndranahary marina iny ro “manome ty ay noho ty fofon’ay noho ty raha iaby ho ahin’olo iabiaby.” Nivola koa ie hoe: “Kanao tsika misy noho velo noho mihetsiketsiky, le ie ty nahavy ani-zay.” Ndranahary ro Mpamoro, le “baka amin’olo raiky ro nanaovany ty firenena iaby.” Midika zay fa ie ro maeva ivavaha.​—Asan’ny Apostoly 17:25, 26, 28.

8. Ino ty raha tsy hataon’i Jehovah mihintsy? Hazavao.

⁸ Mpamoro Jehovah sady Mpanjakan’ny kila raha iaby zao, ka afaky manery ty olo hanompo azy. Fe tsy hanao ani-zay mihintsy Jehovah. Fa ino ty nataony? Ameany porofo tsika hoe tena misy ie sady tea antsika kiraidraiky. Teany laha farani-ze maro ty olo ho lasa namany mandrakizay. (1 Tim. 2:3, 4) Zay nahavy an’i Jehovah nampiofana antsika io mba hampianarantsika ty olo ty fikasàny noho ty raha teany hatao ho an’olombelo. (Mat. 10:11-13; 28:19, 20) Nameany ty fiangona koa tsika mba hahafahantsika manompo azy noho hahazo fanampea baka amy anti-panahy be fitiava.​—Asan’ny Apostoly 20:28.

9. Ino ty mampiseho hoe tea antsika olombelo iaby Jehovah?

⁹ Maro ty olo mino hoe tsy misy Jehovah, fe hita amy fomba anandesan’i Jehovah an-drozy hoe tena be fitiava ie. Eritsereto moa zao: Bakanibakany zay, le an’arivony tapitrisa ty olo tsy nanompo an’i Jehovah nanao ze tean-drozy hatao noho ze mety amin-drozy avao. Fe ndre zay, le soa fanahy amin-drozy Jehovah, ka manome ze raha ilàn-drozy avao mba hahavelo an-drozy noho hahazoan-drozy tavy ty fiainan-drozy. (Mat. 5:44, 45; Asan’ny Apostoly 14:16, 17) Nameany fahafaha hana nama, hanan’anaky, noho hahazo tavy ty vokatsin’ny asa mafy ataony koa rozy. (Sal. 127:3; Mpito. 2:24) Hita baka amy zay hoe tea antsika olombelo iaby Babantsika an-danitsy any iny. (Eks. 34:6) Ndao hodinihintsika henanizao hoe ino ty antony sisany mahavy antsika mifily hanompo an’i Jehovah, le akory ty fomba hitahiany antsika.

MANINO TSIKA RO MIFILY HANOMPO AN’I JEHOVAH?

10. a) Ino ty antony voalohany anompoantsika an’i Jehovah? (Matio 22:37) b) Manino ro mahasoa anao ty hoe manam-pahareta Jehovah? (Salamo 103:13, 14)

¹⁰ Tena tea an’i Jehovah manahaky an’i Jesosy tsika. Zay ty antony voalohany anompoantsika azy. (Vakio Matio 22:37.) Lasa ta hinama amy Jehovah tsika, lafa haintsika ty toetsiny. Manam-pahareta, ohatsy, ie. Lafa Israelita rey zao tsy nanoriky ty safàny, le niangavy an-drozy ie hoe: “Mba engao lahy raha raty ataonareo io.” (Jer. 18:11) Hain’i Jehovah hoe tsy lavorary tsika sady lemboky avao. (Vakio Salamo 103:13, 14.) Lafa hitanao hoe manam-pahareta Jehovah sady mana toetsy soa maro, tsy lasa ta hanompo azy mandrakizay va iha?

11. Ino ty antony sisany mahavy antsika nifily hanompo an’ny Babantsika an-danitsy any iny?

¹¹ Manompo an’i Jehovah koa tsika satria zay ty tokony hatao (Mat. 4:10) Haintsika koa hoe ino ty ho vokany laha manompo an’i Jehovah noho tsy mivaliky aminy tsika. Laha tsy mivaliky amy Jehovah tsika, le hanamasy ty anarany, hanaporofo hoe mpavandy ty devoly sady hampifalifaly ty fon’ny Babantsika iny. Laha mifily hanompo an’i Jehovah koa tsika henanizao, le afaky mitamà hanompo azy mandrakizay!​—Jaona 17:3.

12-13. Ino ty ianaranao baka amy tantaran’i Jane noho Pam?

¹² Ndre mbo kelikely iha, le afaky mianatsy ho tea an’i Jehovah sady afaky ampitomboanao avao fitiavanao zay lafa mihabe iha. Zay mihintsy ty raha niseho tamy mpirahavavy tampò raiky retoa, tsy ia zay fa Jane noho Pam.a Vo 11 tao Jane, le 10 tao Pam tamy rozy nanomboky nianatsy Baiboly. Ndre tsy nana eritseritsy hianatsy Baiboly aza ty ray aman-drenin-drozy, le nengan-drozy hifandramby amy Vavolombelon’i Jehovah avao Jane noho Pam. Fe mila miaraky mivavaky amin-drozy morovaly am-piangona any avao rozy mirahavavy lafa faran’ny herinandro. Zao ty nivolanin’i Jane: “Nampirisihin’ajà hitroky jamala noho haloto fandaisam-bata aho. Fe nanampy ahy tsy haneky hanao ani-zay ty raha nampianarin’i Vavolombelon’i Jehovah ahy baka amy Baiboly ao.”

¹³ Lasa mpitory rozy mirahavavy tao vitsivitsy tafara atoy. Lafa nandeha ty fotoa, le nanao mpisava lala rozy sady nikarakara an’ny ray aman-drenin-drozy be tao rey. Zao ty nivolanin’i Jane lafa nandiniky ty fiainany ie: “Tena tsapako hoe mikarakara ty namany avao Jehovah, le zay mihintsy raha resahin’ny 2 Timoty 2:19 iny hoe: ‘Hain’i Jehovah ty azy.’” Azo antoky fa lafa tea an’i Jehovah noho mifily hanompo azy iha, le tsy maintsy ho karakarany avao!

14. Ino ty azontsika atao mba hiarovantsika ty anaran’i Jehovah? (Henteo koa sary reo.)

¹⁴ Ta hiaro an’i Jehovah tsika, satria nisy nanaraty ty anarany. Toy misy ohatsy: Eritsereto hoe mana nama raiky soa fanahy, matariky, noho manenga hadisoa iha. Fe ino ty hataonao laha misy mandratiraty azy hoe olo raty fanahy ie sady mpamitaky? Azo antoky fa hiaro azy iha. Manahaky ani-zay koa, fa miezaky manimba ty lazan’i Jehovah, Satana noho ty olo ambany fahefàny, ka manaratiraty Azy. Fe miaro an’i Jehovah tsika ka volanintsika ty marina mikasiky Azy. (Sal. 34:1; Isa. 43:10) Asehontsika amy raha volanintsika noho ataontsika hoe tea an’i Jehovah tsika sady mifily hanompo azy.

15. Ino ty soa nirambesin’ny apostoly Paoly lafa nanova ty fiainany ie? (Filipianina 3:7, 8)

¹⁵ Parè hanova ty fiainantsika tsika mba hampifalea an’i Jehovah na mba hanompoa azy marerè. Nana pilasy anabo tamy fivavaha Jiosy teo, ohatsy, apostoly Paoly. Fe nafoiny raha zay mba hahafahany manori-dia an’i Kristy noho manompo an’i Jehovah. (Gal. 1:14) Lasa nisoa ty fiainany vokatsini-zay sady afaky hiaraky manjaka amy Kristy an-danitsy any ie. Tsy naneñenany mihintsy ty fanapahan-kevitsiny hanompo an’i Jehovah. Manahaky ani-zay koa, fa laha manompo an’i Jehovah tsika le tsy haneny mihintsy.​—Vakio Filipianina 3:7, 8.

16. Ino ty ianaranao baka amy tantaran’i Julia? (Henteo koa sary reo.)

¹⁶ Laha ty fanompoa an’i Jehovah ro tena vatan-draha amintsika, le ho soasoa ty fiainantsika henanizao noho amy hoavy. Diniho moa ty tantaran’ny ranabavy Julia. Anisan’ny kôraly tamy fiangonany tao ie, tamy ie mbo nikelikely, zany hoe tamy ie mbo tsy nianatsy fahamarina. Nihitan’olo raiky mana traikefa amy resaky hira zay hoe nana talenta ie, le nampiofaniny. Tsielatsiela avao Julia le nalaza sady nanao fampisehoa tamy pilasy mihaja rey. Lafa ie nianatsy moziky tamy lakilasy raiky malaza zay, le nisy mpiaraky mianatsy aminy niresaky taminy mikasiky a-Ndranahary sady nanazava hoe Jehovah ty anara-Ndranahary. Tsiela tafarani-zay, le nanomboky nianatsy Baiboly indroe sankerinandro Julia. Nanapa-kevitsy ie tamy farany hoe hifantoky amy fanompoa an’i Jehovah, le hijano tsy ho mpihira sasy. Tsy mora taminy ty nandramby an’ny fanapahan-kevitsy zay. Zao ty nivolaniny: “Maro ty olo nivola hoe adala aho, satria natakaloko fanompoa an’i Jehovah zao ty fahaizako mihira. Fe fa tapa-kevitsy aho hoe hampiasako hanompoa an’i Jehovah ty fiainako.” Fa 30 tao mahery zay ty nanaovan’i Julia an’ny safidiny io. Ino ty tsapany henanizao? Hoy ty asany: “Milamin-tsay aho henanizao. Tena falifaly aho fa nifily hanompo an’i Jehovah sady matoky fa hotanterahin’i Jehovah ze raha iaby iriko amy hoavy.”​—Sal. 145:16.

MANOMPOA AN’I JEHOVAH AVAO!

17. Miay amy tampany farany amy andro farany tsika henanizao. Ino ty vokatsini-zay ho ani-ze olo nifily hanompo a-Ndranahary noho ho ani-ze olo mbo tsy manompo azy?

¹⁷ Miay amy tampany farany amy andro farany tsika henanizao. Zao ty nivolanin’ny apostoly Paoly: “Tena fa kely sisa’, le ‘ho avy raha nilinasantsika iny sady fa tsy ho ela.’” (Heb. 10:37) Midika ino raha zay? Midika raha zay fa kelikely ty fotoa sisa tavela ahafahan’olo mifily hanompo an’i Jehovah. (1 Kor. 7:29) Ka laha fa nifily hanompo a-Ndranahary zany tsika, le haintsika fa ndre mbo miaritsy raha sarotsy sankarazany tsika, le “kely sisa” le tsy hisy sasy raha zay.

18. Ampirisihin’i Jehovah noho Jesosy hanao ino tsika?

¹⁸ Tsy hoe nampirisihin’i Jesosy hanori-dia azy avao ty mpianatsiny, fa nampirisihiny koa mba hanaraky azy avao. (Mat. 16:24) Laha fa an-taony maro zany ty nanompoanao an’i Jehovah, le enganè iha tsy hieny hanompo azy avao. Tsy maintsy miezaky mafy tsika mba hahavitantsika hanompo an’i Jehovah avao. Mety tsy ho mora raha zay. Fe laha manompo azy avao tsika, le hahazo fitahia maro sady ho sambatsy!​—Sal. 35:27.

19. Ino ty ianaranao baka amy tantaran’i Gene?

¹⁹ Misy mieritseritsy hoe tsy ahità fifalea manompo an’i Jehovah zao. Laha tanora iha, mieritseritsy va iha hoe maty antoky satria manompo an’i Jehovah? Zao ty nivolanin’ny rahalahy raiky tanora mana anara Gene toy: “Nahatsapa ho voafehifehy aho satria Vavolombelon’i Jehovah. Atao raha soasoa zay ty fiainan’ajà niaraky be tamiko rey satria ty fotoako lany amy fivoria noho fanompoa avao, fa rozy mifety, mampiaraky, noho manao Jeu video misy hasatà.” Ino ty vokatsin’ny raha zay tamy Gene? Hoy ty asany: “Nanao kisary hendry aho, fe mahery loha lafa ambalimbaliky any. Niazoko tavy tse raha zay tamy voalohany. Fe tsy tena nahatiaro sambatsy mihintsy aho. Nanomboky nieritseritsy amy zay aho hoe ino iaby moa ty soa ho azoko laha manoriky ty raha volanin’ny Baiboly aho. Farany aho nanapa-kevitsy hanompo an’i Jehovah amy foko iaby. Nanomboky teo amy zay, le atao raha nivalean’i Jehovah iaby ze vavaky nataoko.”

20. Tokony ho tapa-kevitsy hanao ino tsika?

²⁰ Zao ty hira nataon’ny mpanao salamo raiky ho an’i Jehovah: “Sambatsy ze filìnao noho asànao mamonjy anao mba hipetraky an-tokotaninao eo.” (Sal. 65:4) Enganè tsika ho tapa-kevitsy hanompo an’i Jehovah avao manahaky an’i Josoa. Hoy ty asany: “Fa zaho noho ty fianakaviako hanompo an’i Jehovah.”​—Jos. 24:15.