Rahalahy Roe Vaovao Anisan’ny Filan-kevi-pitantana

TAMY fivoria fatao santao tamy 5 Oktobra 2024, le nisy fampandrenesa manoka hoe: Voatendry ho anisan’ny Filan-kevi-pitantanan’ny Vavolombelon’i Jehovah Rahalahy Jody Jedele noho Jacob Rumph. Mpanompon’i Jehovah tsy mivaliky tanatin’ny tao maro rahalahy reo.

Teraky ta Missouri an’Etazinỳ any Rahalahy Jedele sady nitezà tamy fahamarina. Nipetraky tamy tanà tsy de nisy Vavolombelon’i Jehovah ty fianakaviany. Vokatsini-zay, le nifankahita tamy rahalahy noho anabavy maro baka an-tany hafa any ie, satria maro ty mpitory nitory amin-drozy any. Nifankatea noho niharo raiky ty mpiara-manompo, ka nisy vokany taminy raha zay. Natao batisa ie tamy 15 Oktobra 1983. Tea fanompoa ie, ka nanomboky nanao mpisava lala maharitsy tamy Septambra 1989 lafa nivita ty fianarany tamy lisè.

Nandesin’ny ray aman-dreniny nitsidiky Betela Rahalahy Jedele noho anabaviny zay tamy ie mbo nitanora. Nandrisiky an-drozy mianadahy hanompo amy Betela fitsidiha rezay, le nanompo tamy Betela rozy tafara atoy. Niavy tamy Betelan’i Wallkill ao Rahalahy Jedele tamy Septambra 1990. Niasa tamy Sampan-draharahan’ny Fanadiova tse ie tamy voalohany, bakeo tamy Sampan’asa Mikasiky Fahasalamà.

Nihamaro ty fiangona nanao safà Espaignoly tamy fotoa zay, ka nila rahalahy hanampy. Nanapa-kevitsy hifindra amy raiky amy fiangona reo Rahalahy Jedele, le nanomboky nianatsy fivolana Espaignoly. Nifankahita tamy ranabavy Damaris ie tsiela tafarani-zay. Mpisava lala tamy faritsy misy an-drozy ranabavy io. Nifanambaly rozy tafara atoy, le niaraky nanompo tamy Betela ao.

Niala tamy Betela rozy tamy 2005 satria hikarakara ty ray aman-drenin-drozy. Fe nanao mpisava lala maharitsy avao rozy tanatin’ny fotoa zay. Nanampy tamy fampianara tamy Sekolin’ny Fanompoan’ny Mpisava Lala Rahalahy Jedele, sady anisan’ny Komity Mifandramby amy Hopitaly an-tanà eo noho anisan’ny Komitim-paritsy Mikasiky Fanorena.

Nasà himpoly amy Betela ndraiky Rahalahy Jedele morovaly tamy 2013 mba hanao fanorena an’i Warwick. Nanompo ta Patterson noho ta Wallkill any koa rozy tafarani-zay. Niasa tamy Sampan-draharaha Mikasiky Fanorena An-tanà eo noho tamy Sampan’asan’ny Filan-kevitsy Mikasiky Hopitaly Rahalahy Jedele. Voatendry ho mpanampin’ny Komitin’ny Fanompoa amy Filan-kevi-pitantana eo ie tamy Marsa 2023. Zao ty nivolaniny lafa nandiniky ty asa nanendrea azy ie: “Miasa loha tena kindraiky lafa misy asa vaovao anendrea an-tena. Fe mila matoky an’i Jehovah avao iha amy fotoa zay satria ie ro afaky manampy anao hahavita ze asa ampanaovy anao.”

Teraky ta Kalifornỳ, an’Etazinỳ any Rahalahy Rumph. Tamy ie mbo nikely, le fa tsy nitory noho fa tsy nivory sasy reniny. Fe niezaky nampianatsy fahamarina azy avao reniny. Mpanompon’i Jehovah tsy nivaliky koa bebeny, le nitsidiky azy indraiky santao ie. Nampean’ny bebeny ie mba ho kinto amy fahamarina avao, le nangataky hianatsy Baiboly ie, lafa ni-13 tao teo ho eo. Natao batisa ie tamy 27 Septambra 1992. Mampahery fa nimpoly nitory noho nivory ndraiky reniny. Nandroso iaby koa ty fianakaviany, le natao batisa.

Hitan’ny Rahalahy Rumph tamy ie mbo nitanora hoe falifaly ty olo manao mpisava lala. Nanomboky nanao mpisava lala amy zay ie tamy Septambra 1995 lafa nivitany ty fianarany tamy lisè. Nanitatsy tan’Ekoatera any ie tamy 2000. Nifankahita tamy ranabavy Inga, mpisava lala baka a Kanada any zay ie lafa tany, le nifanambaly rozy tafara atoy. Nanompo tamy tanà raiky an’Ekoatera any misy antoko-mpitory kelikely zay rozy tafarani-zay. Fa fiangona bevata henanizao antoko-mpitory iny.

Nivoatendry ho mpisava lala manoka Rahalahy Rumph morovaly lafa nandeha ty fotoa, le nanao ty asan’ny faritsy tafara atoy. Nivoasa hanatriky Sekolin’i Gileada kilasy faha-132 rozy tamy 2011. Nanompo tamy firenena samby hafa rozy tafaran’ny sekoly iny. Tena tean-drozy ty nanao fanompoa sankarazany, anisani-zay ty fanompoa tamy Betela, misionera, noho ty asan’ny faritsy. Nana tombontsoa hampianatsy tamy Sekolin’ny Mpitory Fanjakà Iny koa Rahalahy Rumph.

Nimpoly an’Etazinỳ any Rahalahy Rumph morovaly lafa niavy arety miparitaky COVID-19 iny. Nasà hanompo amy Betelan’i Wallkill rozy, lafa baka nampiofany tamy Sampan-draharahan’ny Fanompoa Rahalahy Rumph. Nampoly amy Sampan’i Ekoatera any ndraiky rozy tafarani-zay, le tanisan’ny Komitin’ny Sampana any Rahalahy Rumph. Nafindra ta Warwick any rozy tamy 2023. Nivoatendry ho mpanampin’ny Komitin’ny Fanompoa amy Filan-kevi-pitantana eo Rahalahy Rumph tamy 2024. Lafa nametsivetsy ty fanompoa nataony ie, le zao ty nivolaniny: “Ty mpiaraky miasa aminao ro tena vatan-draha, fa tsy ty pilasy anendrea anao.”

Tena ankasitrahantsika ty asa mafy ataon’ny rahalahy reo, ka ‘tiavo noho hajao avao ty olo manahaky an-drozy.’​—Fil. 2:29.