Nanan’Anaky Elizabeta

Fa 400 tao zay ty nahavita lakorobeni-Jerosalema iny. Marìny ani-tanà io ty nipetrahani-mpisoro mana anara Zakaria zay, miaraky amy Elizabeta valiny. Fa mpivaly fa ela rozy fe tsy nanan’anaky. Ndraiky andro, lafa nandoro emboky manitsy tamy pilasy masy tamy tempoly tao Zakaria, le niseho taminy anjely Gabriela. Natahotsy Zakaria, fe nivola taminy Gabriela hoe: ‘Ka matahotsy fa manday vaovao soa baka amy Jehovah aho. Hiteraky anakilahy Elizabeta valinao, le hatao hoe Jaona ty anarany. Nifilini-Jehovah hanao asa miavaky ie.’ Nanontany Zakaria hoe: ‘Amy fomba akory ty hinoako anao? Zahay morovaly fa antitsy retoa koa mbo hanan’anaky.’ Le hoy ty asani-Gabriela: ‘Ndranahary ro naniraky ahy handay vaovao soa zay aminao. Fe tsy nino ahy iha ka tsy hahay hivola laha tsy fa teraky ajà io.’

Nielaela tao Zakaria fa tsy nanahaky sanandro rey. Niboaky avao ie tamy farany. Nitseriky iaby olo tamonto tao rey ka nanontany azy. Fe fa tsy nahay nivola Zakaria, fa ty tanany avao ro nahetsiketsiny. Nihain’olo rey amy zay hoe nahazo hafatsy baka amy Ndranahary ie.

Lafa nandeha ty fotoa, le niteraky anakilahy Elizabeta, araky ty fa nivolanini-anjely iny. Falifaly ty namany noho ty longony lafa nahita ani-ajà iny. Nivola Elizabeta hoe: ‘Jaona ty anarany.’ Fe nivola rozy hoe: ‘Tsy misy mana anara Jaona zao ty fianakavianao. Anovo Zakaria ty anarany, soa hitovy amy anarani-babany.’ Fe nanoratsy ho zao Zakaria: ‘Jaona ty anarany.’ Avy le nahay nivola amy zay Zakaria! Naharè vaovao iny iaby ty olo ta Jodia tany ka nieritseritsy hoe: ‘Hanao akory lahy ajà io lafa be?’

Bakeo nifeno fanahy masy Zakaria. Naminany ie hoe: ‘Ho derà lahy Jehovah. Nampitamà ani-Abrahama ie hoe hanome Mesia, ho mpanavotsy antsika. Ho mpaminany hanoma ty lalani-Mesia io Jaona.’

Nisy raha niavaky koa niseho tamy Maria longoni-Elizabeta. Zay ro hohenteantsika manaraky.