Manao Akory ro Ikarakaranay ty Efitrano Fanjakanay?

Manday ty anara masy Ndranahary iaby lafa atao Efitrano Fanjakà. Midika raha zay fa voninahitsy ho ahinay ty manao ze hampalio noho hampilamy Efitrano io sady anaty ty fanompoa Ndranahary koa ty fanaova raha zay. Afaky manao raha reo iaby ty olo amy fiangona ao.

Atao malio soa ty Efitrano lafa rava ty fivoria. Falifaly ty rahalahy noho ty anabavy manao ze hampalio Efitrano Fanjakà io saky rava fivoria. In-draiky san-kerinandro le atao ty fiangona malio mandilatsy ty mahazatsy ty Efitrano. Anti-panahy na mpanampy amy fanompoa ro mitariky asa io. Orihin-drozy soa ty fandahara fa natao ho amy raha zay. Misy ty mamafa, manasa trano, mandamy sezy, mamafa kabonè, manasa vitira, mamafa lafonety, mamafa lakoro. In-draiky san-tao koa ty fiangona ro miaraky mikarakara noho manao ze hampalio soa Efitrano io. Ampanaovy raha zay koa ty ajà soa ho hainy hoe mila karakara soa avao ty Efitrano.—Mpitoriteny 5:1.

Manamboatsy ze simba. San-tao le hentea kiraidraiky ty raha mila amboary amy Efitrano Fanjakà ao, ndre anatiny io ndre amonto eny. Atao raha zay soa hahità ze raha mila amboary amy Efitrano ao sady hahavy Efitrano io ho soasoa avao. Tsy mandany drala marè ty fanaova raha zay. (2 Tantara 24:13; 34:10) Efitrano malio noho voakarakara soa ro trano natao hivavaha amy Ndranahary. Atoronay fa teanay Jehovah sady hajanay ty trano fivavaha aminy, lafa mazoto mikarakara Efitrano io zahay. (Salamo 122:1) Mahavy ty olo hieritseritsy raha soa mikasiky anay raha zay.—2 Korintianina 6:3.

• Manino zahay ro mikarakara soa ty Efitrano Fanjakà?

• Ino iaby ty raha atao soa halio avao ty Efitrano Fanjakà?