FIANARA 52
Manino ro Vatan-draha ty Sikintsika Noho ty Pozintsika?
Samby raha teany ty olo amy resaky fisikina noho pozy. Fe laha manaraky ty torolala amy Baiboly ao tsika, le ho afaky hanao ty siky noho pozy teantsika sady hampifalifaly ani-Jehovah. Ndao hodinihintsika ty sisany amy torolala rezay.
1. Ino ty torolala hanampy antsika hifily soa ty siky noho ty pozintsika?
Tokony hanao “siky maeva noho maotina” tsika, sady tokony “handiniky soa.” Tokony ho hita amy pozintsika koa hoe “mpivavaky amy Ndranahary” tsika. (1 Timoty 2:9, 10) Diniho torolala efatsy retoa: 1) Tokony ho “maeva” ty siky anaovantsika. Lafa mivory iha, le mety ho ambinao fa sankarazany ty siky teani-vahoakini-Jehovah, fe samby manome voninahitsy ani-Jehovah, azy ivavahantsika iny fisikina noho pozy rey. 2) Tokony ho “maotina” ty sikintsika. Midika raha zay fa tsy tokony hahavy olo hana faniria raty na haninto mason’olo marè ty akanjontsika. 3) Tokony “handiniky soa”, zany hoe mandini-draha tsika fa tsy ze kila lamôdy miboaky eo le fa arahintsika iaby. 4) Tokony ho hita amy ty pozintsika avao hoe “mpivavaky amy Ndranahary” tsika. Avy le ho hain’olo amy zay fa manompo ani-Ndranahary marina iny tsika.—1 Korintianina 10:31.
2. Misy vokany amy mpiara-manompo amintsika va ty pozintsika?
Samby afaky mifily ze siky noho pozy mety amintsika tsika. Fe mila dinihintsika avao koa ty ho vokani-raha zay amin’olo hafa. Miezaky mafy tsika mba tsy haminga olo, fa “hampifalifaly ty [namantsika] ... mba hahasoa an-drozy noho hampahery an-drozy.”—Vakio Romanina 15:1, 2.
3. Manino ty pozintsika ro mety hahavy olo hanaraky ty fivavaha marina?
Fa miezaky manao siky milamy soa avao tsika sanandro. Fe vomaiky tsika mitandrina soa amy ty akanjo anaovantsika lafa hivory noho hanompo. Tsy teantsika laha ty pozintsika koa ro lasa ifantohan’olo fa tsy ty hafatsy torintsika. Irintsika laha mba mahavy ty olo hanaraky ty fivavaha marina ty pozintsika, sady “mandravaky ty fampianara-Ndranahary Mpamonjy antsika.”—Titosy 2:10.
DINIHO LALIKY
Hodinihintsika hoe ino ty azontsika atao mba ho azo antoky fa mety amy Kristiana ty siky noho ty pozintsika.
Hita amy pozintsika hoe manaja ty olo mana fahefà tsika. Marina fa mahita ty am-pontsika any Jehovah, fe ndre zay le tokony ho hita amy ty pozintsika koa hoe manaja azy tsika
4. Manaja ani-Jehovah tsika lafa mety soa ty pozintsika
Ino ty tena antony mahavy antsika mitandrina soa amy ty siky anaovantsika noho ty pozintsika? Vakio Salamo 47:2, bakeo iaraho midiniky fanontanea retoa:
Solontenani-Jehovah tsika, ka ino ty tokony ho vokani-raha zay amy ty siky anaovantsika?
Akory ty hevitsinao, tena ilà va ty mifily soa ty siky anaovantsika lafa mivory noho manompo? Ino ty antony?
5. Ino ty hanampy antsika hahay hifily soa ty siky noho ty pozintsika?
Ndre mora ndre lafovily ty akanjontsika, le tokony halio avao sady hifanaraky amy ze raha ataontsika. Vakio 1 Korintianina 10:24 noho 1 Timoty 2:9, 10. Bakeo iaraho midiniky hoe: Manino tsika ro tsy tokony hanao siky...
maloto noho miforiporitsy, na akanjo hafahafa pozy?
mipitiky marè, mampiseho faritsy tsy tokony haseho, na mahavy olo hana fanirian-draty?
Manampy ty Kristiana hahay ty hevitsini-Jehovah ty Lalànani-Mosesy, ndre tsy voatery hanoriky ani-lalàna io rozy. Vakio Deoteronomia 22:5, bakeo iaraho midiniky fanontanea toy:
Misy akanjo noho pozy sisany mahavy ty lahilahy atao raha ho ampela, na ty ampela atao raha ho lahilahy. Manino tsika ro tsy tokony hanao siky na pozy ho zay?
Vakio 1 Korintianina 10:32, 33, noho 1 Jaona 2:15, 16, bakeo iaraho midiniky fanontanea retoa:
Manino tsika ro tokony handiniky ty pozintsika, tsy no maminga ty olo an-tanà eo na ty mpiara-manompo amintsika?
Karazam-pozy noho akanjo manao akory ty fanaovan’olo mbaminareo etoy?
Akory ty hevitsinao, misy amy pozy noho akanjo rezay va tsy mety amy Kristiana? Ino ty antony?
Afaky manao siky noho pozy sankarazany tsika sady afaky mampifalifaly ani-Jehovah
MIERITSERITSY TY OLO SISANY HOE: “Mana zo hisiky ze siky teako aho.”
Mitovy hevitsy amy zay koa va iha? Ino ty antony?
FAMINTINA
Laha mifily soa ty sikintsika noho ty pozintsika tsika, le manaja ani-Jehovah noho ty olo manodidy antsika.
Famerena
Manino ro vatan-draha amy Jehovah ty sikintsika noho ty pozintsika?
Ino ty sisany amy torolala afaky manampy antsika hanapa-kevitsy soa amy resaky siky noho pozy?
Manino ty pozintsika ro misy vokany amy fahitan’olo ty fivavaha marina?
DINIHO KOA RETOA
Ino ty raha mety hoeritseretin’olo lafa mahita ty siky anaovanao?
Manino iha ro tokony handiniky soa tse laha mieritseritsy hanao tatoazy?
“Inona no Lazain’ny Baiboly Momba ny Tatoazy?” (Lahatsoratsy amy jw.org ao)
Ino koa ty torolala afaky manampy anao handramby fanapahan-kevitsy soa?
“Manome Voninahitra An’Andriamanitra ve ny Fiakanjonao?” (Ny Tilikambo Fiambenana Septambra 2016)
Sarotsy tamy ampela raiky ty naneky hoe samby afaky mifily ty siky noho ty pozy teany ty olo. Ino ty nanampy azy hiova?
“Resaka Fitafiana sy Taovolo no Tsy Nampandroso Ahy” (Mifohaza! 8 Janoary 2004)