Tantara 51

Rota Noho Naomy

HO HITANAO amy Baiboly ao fa misy boky raike kaìhy hoe Rota zay ty ao. Hita amy boky io ao ty tantara’ty fianakavia raike niay tamy fotoa nisia’ty mpitsara tamin’Israely teo. Somonjara baka amy tany Moaba ane Rota; tsy tafilitse anatin’Israelita vahoaki-Ndranahare reo ie. Fe laha fa naharé resake mikasike an’i Jehovah, aze Andranahare marina iny ie, le nanjary tea aze bibike. Njarahy fa be tao, mana anara hoe Naomy zay ro nanampy an’i Rota hianatse mikasike an’i Jehovah.

Israelita Naomy. Fe laha fa nisy keré tamin’Israely teo, le voatery nifindra ta-Moaba tao Naomy noho ty valine voho ty anane roe lahy. Maty ty valin’i Naomy ndraike andro. Nanambaly ampela moabita anan’i Naomy roe lahy reny, laha fa tafara atoy. Rota noho Orpa ro anaran’ampela reo. Fe laha fa afake folo tao, le nimaty iaby anan’i Naomy roe lahy reny. Nalahelo bibike Naomy noho somonjara roe reo! Ka ino ty raha hataon’i Naomy henany zao?

Nanapa-kevitse Naomy ndraike andro fa hanao lia lavitse mba himpòly amy tanine ane. Mbo naniry hiarake amin’i Naomy avao, Rota noho Orpa, ka le nanarake aze roze. Fe laha fa nandeha elaela tan-dala teny roze, le nivòla tamy somonjara reo Naomy hoe: ‘Mimpolìa aminareo ane ami’zay nareo, ka mipetràha miarake ami’ty reninareo.’

Nanoroke ajà ampela reo Naomy sady nanao veloma an-droze. Nanomboke nitàny ami’zay Rota noho Orpa, satria tean-droze maré Naomy. Hoy ty asan-droze: ‘Aha! Hiarake aminao amy taninao ane avao zahay.’ Fe hoy ty asan’i Naomy: ‘Mimpolìa amy taninareo ane lahy nareo anak’ampelako! Ho soa ty fiaìnanareo laha fa aminareo ane nareo.’ Ka, nandeha nimpòly tan-tranon-droze ane Orpa. Fa Rota tsy nahefa nimpòly.

Nivòla tamin’i Rota Naomy hoe: ‘Henteo Orpa fa nandeha. Ndahàna koa iha himpòly miarake amine.’ Fe namaly Rota hoe: ‘Ka ataonao forosé hiala aminao eto aho. Engào hiarake aminao aho. Ze tany handehananao ro handehanako, ze hipetràhanao ro hipetràhako. Ty taninao ro ho taniko, noho ze Andranahare tompoinao ro ho Andranahariko. Ze tany hahafatesanao ro hahafatesako, no sady handevéna ahy kea.’ Laha fa nihitan’i Naomy fa ta-hiarake amine vatane Rota, le tsy nanao forosé an’i Rota mba himpòly sasy, Naomy.

Niavy ta-Israely tao ampela roe reo tamy farane. Nipetrake tao roze. Avy le niasa tan-tonda teny Rota, satria fotoa fijinjà vary tamy fotoa io. Nengà lahilahy atao hoe Boaza zay, hitimpo vary tan-tondane tao ie. Hainao va hoe ia ty renin’i Boaza? Rahaba, ampela baka amy tany Jeriko tao iny.

Nivòla tamin’i Rota Boaza hoe: ‘Haiko fa nengànao ty baba noho reninao voho ty tany niavianao, ka nandeha amy tany mbo tsy hainao toy iha. Irìko lahy Jehovah mba hitahy anao!’

Namaly Rota hoe: ‘Soa fanahy amiko iha. Le vatane falifale ty aiko tamy resake soa nataonao tamiko.’ Tean’i Boaza bibike Rota, ka tsy ela le nifanambaly roze. Falifale bibike kea Naomy! Fe, mbo nandilatse zay ty fifalian’i Naomy laha vo niterake ty anake lahin-droze voalohane atao hoe Obeda, Rota noho Boaza. Nanjary razan’i Davida Obeda laha fa tafara atoy. Hianatse raha maro mikasike an’i Davida tsika laha fa afarafara ao.

Bokin’i Rota amy Baiboly ao.