FANAZAVÀ FANAMPINY 3
Akory ty Fomba Fitariha Fampianara Baiboly amy Boky Ho Azonao Tavy ty Fiaina Zisiky Farany?
Nivavaky mafy noho nanao fikaroha soa rahalahy rey lafa nandiniky hoe ino iaby ty raha hampiliry amy boky Ho Azonao Tavy ty Fiaina Zisiky Farany! Laha teanao ty hahay hampiasa ani-boky io, le ampiasao soso-kevitsy manaraky retoa lafa mampianatsy Baiboly.
Alohani-hianara
1. Manomàna soa. Lafa manoma, le diniho hoe ino ty raha ilàni-mpianatsinao iny, manao akory ty raha iainany, noho ty raha inoany. Eritsereto sandrany ze hevitsy mety tsy ho azony na ho sarotsy aminy ty hanoriky azy. Diniho hoe ino amy lahatsoratsy amy fizarà hoe “Diniho Koa Retoa” eo reo ro mety hanampy azy, le ampiasao raha zay lafa tena ilà lafa nareo mianatsy.
Lafa mianatsy
2. Atomboho noho tampero amy vavaky fianara iny, laha tsy mampanino ani-mpianatsinao iny.
3. Ka be resaky. Mifantoha amy ze raha resahy amy fianara iny eo, le engao hamoaky ty am-pony any mpianatsy iny.
4. Laha militsy fizarà vaovao ty fianaranareo, le vakio soa ty raha kendreni-fizarà io sady miresaha lohateny vitsivitsy hita amy fizarà io.
5. Saky baka nahavita fizarà raiky nareo, le iaraho midiniky famerena ani-fizarà iny mba hanampea ani-mpianatsinao iny hahatiaro ty fahamarina nianarany.
6. Lafa mianatsy ty fianara kiraidraiky nareo amy mpianatsinao iny, le:
a. Vakio ty fehintsoratsy.
b. Vakio ze andinin-teny misy soratsy hoe “Vakio.”
d. Mamakia andinin-teny hafa laha ilà.
e. Alefaso ze video misy soratsy hoe “Alefaso” (laha afaky mandefa video iha).
f. Apetraho amy mpianatsinao ty fanontanea kiraidraiky.
g. Ampirisiho mpianatsinao iny mba hanenty ze sary amy “Diniho Laliky” eo, le ampanazavao azy.
h. Ampiasao ty efajoro hoe “Raha Kendrè” mba hanampea ani-mpianatsinao iny hahita ty fandrosoany. Ampirisiho ie mba hanatratsy ani-raha kendrè voaresaky eo iny, hanatratsy raha kendrè hafa, na samby hanatratsy an-drozy roe.
i. Anontaneo mpianatsinao iny vasa misy niteany ty raiky amy lahatsoratsy na video amy hoe “Diniho Koa Retoa” eo reo tamy ie nanoma.
j. Miezaha hamita fianara raiky saky mianatsy.
Lafa baka nianatsy
7. Eritsereto avao mpianatsinao iny. Mivavaha amy Jehovah mba hitahy ty fandrosoany noho hanome anao fahendrea mba hahaizanao manampy azy.