Midika Ino ho Anao ty Bokini-Apokalypsy?

1-2. Manino ro tena tokony hanaitsy antsika ty bokini-Apokalypsy? Mivolana antony raiky.

FA NISY fotoa va iha natoron’olo albomo misy ty sariny? Misy sarin’olo tsy hainao ty ao, le navalibalikinao avao raha iny. Fe nijano iha lafa nahita sary raiky zay. Fa nanino? Satria misy sarinao raha iny. Henteanao soa sary iny, le lasa ty vetsivetsinao. Miezaky mitiaro iha amin’io hoe taia ty nangalà ani-sary iny le tamy fotoa manao akory. Henteanao kiraidraiky iaby ty olo amy sary iny vasa mbo tiaronao iaby. Hafa mihintsy aloha ty fahitanao ani-sary raiky io.

² Manahaky ani-sary io koa ty bokini-Apokalypsy. Satria manino? Misy antony roe farafahakeliny. Voalohany, satria nisoraty ho antsika boky io. Zao ty voasoratsy ao laha vo manomboky boky io: “Ty raha nambarani-Jesosy Kristy, sady namea-Ndranahary azy, mba hampisehoa amy ty mpanompony ty raha hiseho tsy ho ela.” (Apok. 1:1) Tsy ho an’olo iaby zany ty nanorata ani-boky io, fa ho ahintsika mpanompony. Fa haintsika hoe mandramby anjara amy fanatanteraha faminania ty mpanompo-Ndranahary. Tsy mahatseriky antsika zany hoe manatanteraky ty faminania amy boky io ao koa tsika. Ka lafa mamaky ty bokini-Apokalypsy zany tsika le sahala mamaky ty tantarantsika manoka mihintsy. Sahala hoe hitantsika amy boky io ao koa “ty sarintsika.”

3-4. Laha hentea ty bokini-Apokalypsy, ombia ty nahatanteraky ty faminania anatiny ao, le tokony handrisiky antsika hanao ino raha zay?

³ Ka ino ty antony faharoe? Ty fotoa hahatanteraky ani-faminania reo. Niresaky ani-fotoa io mihintsy apostoly Jaona lafa nivola hoe: “Nitarihini-fanahy masy ho amy androni-Tompo any aho.” (Apok. 1:10) Tamy tao 96 tany ty nanoratani-Jaona ani-raha reo, fe mbo tao maromaro tafara atoy vo niavy ty “androni-Tompo.” (Mat. 25:14, 19; Lioka 19:12) Laha hentea ty faminaniani-Baiboly, le tamy 1914 ty nanombohani-androni-Tompo io, zany hoe lafa nilasa Mpanjaka tan-danitsy any Jesosy. Nanomboky nitanteraky amy zay faminaniani-Apokalypsy mikasiky mpanompo-Ndranahary rey. Fa anatini-“androni-Tompo” io mihintsy zany tsika henanizao!

⁴ Misy torohevitsy ho ani-ze miay amy fotoa miavaky io amy Apokalypsy 1:3 ao. Tena mila mandiniky ani-torohevitsy reo zany tsika. Zao ty volaniny ao: “Sambatsy ze mamaky marè noho mijanjy ty safà amy faminania toy ato ka manaraky ani-ze voasoratsy anatiny ato, satria fa marìny ty fotoa voatondro.” Mila “mamaky marè” hoasany tsika mba ‘haharè ty safà amy faminania’ iny, sady ‘hanaraky ani-ze voasoratsy anatiny’ ao. Ino moa ty sisany amy safà tokony harahintsika reo?

ANOVO AZO ANTOKY HOE EKENI-JEHOVAH TY FANOMPOA ATAONAO

5. Akory ty ampisehoani-bokini-Apokalypsy hoe tena mila ataontsika azo antoky vatany hoe ekè-Ndranahary ty fanompoa ataontsika?

⁵ Vo amy toko voalohany amy bokini-​Apokalypsy ao avao, le fa hitantsika sahady hoe haini-Jesosy iaby ze raha miseho amy fiangona eo. (Apok. 1:12-16, 20; 2:1) Manaporofo ani-zay hafatsy nalefani-Jesosy ho ani-fiangona fito tan’Azỳ Minora any rey. Nanome toromariky voafaritsy soa ie mba hanampea ty Kristiana tamy fotoa zay, soa rozy hahazo antoky hoe ekeni-Jehovah ty fanompoa ataon-drozy. Mbo mahasoa antsika mpanompo-Ndranahary henanizao koa hafatsy reo. Ka ino zany ty azontsika ianara baka amy zay? Haini-Jesosy Kristy, azy Mpitariky antsika iny hoe mifandramby soa amy Jehovah tsika sa tsy mifandramby soa aminy. Miaro antsika ie sady hitany iaby ze raha mahazo antsika. Hainy hoe ino ty raha tokony hataontsika mba hahavy antsika hahazo hatò amy Jehovah avao. Ka ino tari-dala nameany mila arahintsika io?

6. a) Laha hentea ty Apokalypsy 2:3, 4, ino ty problemoni-fiangonani-Efesosy? b) Ino ty ianarantsika baka amy zay?

⁶ Vakio Apokalypsy 2:3, 4. Tsy tokony hengantsika hihena fitiavantsika ani-Jehovah tamy voalohany iny. Hitantsika amy raha nivolanini-Jesosy tamy fiangonani-Efesosy io hoe niaritsy rozy sady tsy nieny fa nanompo ani-Jehovah avao ndre nisy raha sarotsy aza. Fe ndre zay, nihena fitiavan-drozy tamy voalohany zay. Laha ampolin-drozy manahaky tamy voalohany iny ndraiky fitiavan-drozy io, le hekè-Ndranahary ty fanompoa ataon-drozy. Manahaky ani-zay koa tsika. Tsy ampy ty hoe miaritsy avao. Tokony ho antony soa ro mahavy antsika miaritsy. Tsy ty raha ataontsika avao ro hentea-Ndranahary fa ty antony anaovantsika ani-raha iny koa. Tena vatan-draha aminy ty antony mahavy antsika manao raha raiky, satria teany laha tena fitiavantsika azy noho fankasitrahantsika ty raha nataony ro mahavy antsika hanompo azy.​—Ohab. 16:2; Mar. 12:29, 30.

7. a) Laha hentea ty Apokalypsy 3:1-3, ino ty problemo nihitani-Jesosy tamy fiangonani-Sardisy tao? b) Ino ty raha mila ataontsika?

⁷ Vakio Apokalypsy 3:1-3. Mila mifoha noho miamby soa avao tsika. Hafa koa ty problemo tamy fiangonani-Sardisy tao. Nanompo ani-Jehovah avao rozy taloha, fe lasa tsy nidarean-drozy sasy fanompoa ani-Jehovah zay tafara tato. Farany rozy nivolanini-Jesosy mba ‘hifoha.’ Ino ty fampitandrema ho antsika anatini-zay ao? Tsy ho halinoni-Jehovah aloha ty asa nataontsika ho azy. (Heb. 6:10) Fe tsy tokony hieritseritsy tsika hoe fa ampy fanompoantsika taloha tany zay. Mety ho voafetra ty raha vitantsika lafa mandeha ty fotoa, fe mbo mila miasa mafy ho ani-Tompo avao tsika ka mifoha noho miamby soa avao zisiky hiaviani-farany.​—1 Kor. 15:58; Mat. 24:13; Mar. 13:33.

8. Ino ty ianarantsika baka amy raha nivolanini-Jesosy tamy fiangonani-Laodikia amy Apokalypsy 3:15-17 ao?

⁸ Vakio Apokalypsy 3:15-17. Mila mazoto noho miasa amy fo tsika lafa manompo. Mbo hafa koa ty problemo tamy fiangonani-Laodikia tao. Sady tsy nanintsy rozy ro tsy nafana. Tsy nafana fo tamy fanompoa rozy, farany Jesosy nivola hoe “mijaly noho mahantra” rozy reo. Tokony hafana fo ho ani-Jehovah noho ty fanompoa azy rozy. (Apok. 3:19) Ka ino ty ianarantsika baka amy zay? Laha somary fa mihena ty fazotoantsika, le mila miezaky tsika mba hampitombo ty fankasitrahantsika ty raha soa iaby ameani-Jehovah noho ty fandaminany ho antsika. (Apok. 3:18) Tsy tokony hiezaky hanao ze hampilamindamy ty fiainantsika amy tontolo toy eto tsika ka hoe hampihena ty fanompoantsika ani-Jehovah.

9. Laha hentea ty raha nivolanini-Jesosy tamy Kristiana ta Pergamosy noho Tyatira, ino ty raha mila ialantsika lavitsy?

⁹ Tsy tokony hijanjy ty fampianarani-mpivadi-pinoa tsika. Zay mihintsy nanelofani-Jesosy an’olo sisany tamy fiangonani-Pergamosy ao rey, satria nanao raha nahavy ani-rahalahy reo hisaratsaraky rozy. (Apok. 2:14-16) Fe nideràny ty Kristiana sisany tamy fiangonani-Tyatira ao satria tsy naneky ty “raha lalikini-Satana.” Nampirisihiny rozy mba ‘hotanjahin-drozy marè’ ty fahamarina. (Apok. 2:24-26) Malemy ara-panahy ze Kristiana nanaly ta hanaraky fampianara diso sady nila nibebaky. Ka manao akory ty amintsika henanizao? Mila ialantsika lavitsy koa ze fampianara tsy mifanaraky amy hevitsini-Jehovah. “Atao raha mpivavaky be” ty mpivadi-pinoa laha hentea, kanefa “tsy hita amy ty raha ataony ty maha mpivavaky azy.” (2 Tim. 3:5) Ho mora amintsika ty hahay ani-fampianaran-diso rey noho handà azy, laha mazoto mianatsy ty Safà-Ndranahary tsika.​—2 Tim. 3:14-17; Joda 3, 4.

10. Ino koa ty raha hafa azontsika ianara baka amy raha nivolanini-Jesosy tamy fiangonani-Pergamosy noho Tyatira rey?

¹⁰ Mila halavirintsika iaby lafa atao fijangajangà. Mbo nisy problemo hafa koa tamy fiangonani-Pergamosy noho Tyatira ao. Nahazo heloky baka amy Jesosy ty olo sisany tamy fiangona reo satria nandeferan-drozy ty fijangajangà. (Apok. 2:14, 20) Ino ty ianarantsika baka amy zay? Ndre fa nanompo ani-Jehovah an-taony maro tsika, ndre ino ino tombontsoa ananantsika, le tsy afaky hitamà mihintsy tsika hoe handeferani-Jehovah avao laha maloto fandaisam-bata. (1 Sam. 15:22; 1 Pet. 2:16) Vomaiky aza ie mitamà hoe hanaraky ty fitsipikiny mikasiky fandaisam-bata avao tsika ndre miharaty manao akory ty fandaisam-batan’olo amy tontolo toy eto.​—Efes. 6:11-13.

11. Ino ty raha nianarantsika zisiky eto? (Henteo koa ty efajoro hoe “Fianara ho Antsika.”)

¹¹ Ino ty raha nianarantsika zisiky eto? Tokony hataontsika azo antoky hoe ekeni-Jehovah ty fanompoantsika azy. Laha nanao raha tsy nety tsika le mila miova malaky mba hahazo hatò aminy ndraiky. (Apok. 2:5, 16; 3:3, 16) Fe nisy raha hafa koa nivolanini-Jesosy tamy fiangona rey. Ino lahy zay e?

MIOMÀNA HIATRIKY FANENJEHA

12. Ino ty azontsika ianara baka amy raha nivolanini-Jesosy tamy rahalahy ta Smyrna noho Filadelfia any rey? (Apokalypsy 2:10)

¹² Ndao hodinihintsika ty hafatsy nampandesini-Jesosy ho ani-fiangonani-Smyrna noho Filadelfia. Tsy tokony hatahotsy fanenjeha hoasany rozy satria hanome valisoa an-drozy Jehovah laha rozy tsy mivaliky. (Vakio Apokalypsy 2:10; 3:10) Ino ty ianarantsika baka amy zay? Fa haintsika fa tsy maintsy henjehy tsika, le tokony ho parè hiaritsy tsika lafa avy raha rey. (Mat. 24:9, 13; 2 Kor. 12:10) Tena ilàntsika fampitiarova zay. Ino ty antony?

13-14. Nanao akory ty mpanompo-Ndranahary lafa nitanteraky ty raha volanini-​Apokalypsy toko faha-​12?

¹³ Atoroni-bokini-Apokalypsy hoe hiatriky fanenjeha ty vahoaki-Ndranahary amy “androni-Tompo”, zany hoe amy andro iainantsika zao. Resahini-​Apokalypsy toko faha-​12 hoe nisy aly tan-danitsy any laha vo nilasa Mpanjakani-Fanjakà-Ndranahary Jesosy. Nialy tamy Satana noho demonia rey Mikaela noho ty anjeliny. Mikaela io ty anara nikaiha ani-Jesosy Kristy lafa ie niakatsy tan-danitsy any. (Apok. 12:7, 8) Nanao akory ty vokany? Niresy fahavalo-Ndranahary rey le natoraky tan-tany etoy, bakeo nanday loza amy ty olombelo rozy. (Apok. 12:9, 12) Ka nanao akory amy zay ty vahoaki-Ndranahary?

¹⁴ Resahini-Apokalypsy hoe ino ty raha nataoni-Satana lafa niresy ie. Tsy afaky nilitsy an-danitsy any sasy ie, farany nitafihiny voahosotsy mbo manompo a Ndranahary an-tany etoy rey. Solontenani-Fanjakà-Ndranahary olo reo ka “nirahy hitory mikasiky ani-Jesosy.” (Apok. 12:17; 2 Kor. 5:20; Efes. 6:19, 20) Akory ty nahatanteraky ani-faminania io?

15. Mampiseho an’ia ‘vavolombelo roe’ amy Apokalypsy toko faha-​11 ao io, le ino ty raha nahazo an-drozy?

¹⁵ Nataoni-Satana ze hahavy ani-fahavalo-Ndranahary rey hanafiky ani-rahalahy voahosotsy nitariky ty asa fitoria rey. ‘Vavolombelo roe’ moa ty nivolanani-Apokalypsy ani-rahalahy reo, le nivonoa rozy hoasani-boky io.b (Apok. 11:3, 7-11) Nasara nanao raha raty ty valo amy rahalahy mpiandraikitsy reo tamy 1918, le nigadrà tanaty fotoa lava. Nieritseritsy ty ankamaroan’olo hoe nijano teo ty asani-voahosotsy reo.

16. Ino ty raha tsy nampoizy niseho tamy 1919, fe mbo nanohy nanao ino avao Satana nanomboky tamy fotoa zay?

¹⁶ Miresaky koa faminania amy Apokalypsy toko faha-​11 io hoe ho velo ndraiky ‘vavolombelo roe’ reo lafa afaky fotoa kelikely. Tsy ampy tao raiky tafarani-nilirani-rahalahy reo tam-prizon ao le fa nitanteraky tamy fomba niavaky faminania io. Nabototsy rahalahy voahosotsy reo tamy Marsa 1919, le tafarani-zay nifoana fitorian’olo an-drozy iny. Avy le nanomboky nitariky ty asa fitoria noho fampianara ndraiky rozy. Fe ndre zay, tsy nieny Satana fa mbo nanafiky ty vahoaki-Ndranahary avao. Nanomboky tamy fotoa zay ie nandefa ‘vavaranoni-fanenjeha’ tamy ze olo anisani-vahoaki-Ndranahary. (Apok. 12:15) Tena “mila miaritsy noho mana finoa” vatany tsika iaby.​—Apok. 13:10.

MANAOVA ZE FARA HERINAO AMY ASA NAMPANAOVINI-JEHOVAH ANTSIKA INY

17. Ino ty fanampea niazoni-vahoaki-Ndranahary, ndre nanafiky an-drozy aza Satana?

¹⁷ Miresaky koa ty Apokalypsy toko faha-​12 hoe hahazo fanampea tsy ampoizy ty vahoaki-Ndranahary. Sahala hoe nitely ani-‘vavaranoni-fanenjeha’ iny hoasany “ty tany.” (Apok. 12:16) Zay mihintsy ty raha niseho. Lafa nandeha ty fotoa le mba nandiniky ty raha nisy ty manam-pahefà sisany tamy tontoloni-Satana toy eto. Nandiniky soa, ohatsy, ty mpitsara le nanavotsy ty vahoaki-Ndranahary. Imaro mihintsy ty mpanomponi-Jehovah ro nandresy tamy fitsarà teny le mba afaky nanao raha sisany. Akory ty nampiasan-drozy ani-fahafaha nananan-drozy zay? Nampiasan-drozy soa fotoa rey mba hanaova ani-asa nanirahani-Jehovah an-drozy iny. (1 Kor. 16:9) Ino iaby moa ty tafilitsy amy asa io?

18. Ino ty tena vatan’asantsika amy andro farany zao?

¹⁸ Fa nivola Jesosy hoe hanambara ty “vaovao soani-Fanjakà iny” amy tany toy iaby ty vahoakiny alohani-hiaviani-farany. (Mat. 24:14) Lafa manao ani-asa io rozy le hisy anjely hanampy an-drozy. Mana vaovao soa zisiky farany anjely reo, zany hoe “vaovao mahafaly hotorỳ amy ze mipetraky an-tany etoa noho amy firenena noho foko noho olo samby hafa fivolana voho vahoaky iaby.”​—Apok. 14:6.

19. Ino ty hafatsy hafa mila torìni-ze olo tea ani-Jehovah?

¹⁹ Marina fa tsy maintsy mitory ty vaovao soani-Fanjakà iny ty vahoaki-Ndranahary. Fe tsy zay avao ty hafatsy andesin-drozy. Mbo manoha ty asani-anjely resahini-​Apokalypsy toko faha-​8 zisiky faha-​10 rey koa rozy. Manambara ty loza hahazo ani-ze manohitsy ty Fanjakà-Ndranahary anjely reo. Manambara hafatsy manahaky “havandra noho afo” zany ty Vavolombeloni-Jehovah lafa mitory, satria manazava ty raha hatao-Ndranahary amy tontolo ratini-Satana toy. (Apok. 8:7, 13) Tokony ho hain’olo hoe fa marìny ty farany. Laha hain-drozy zay, le mety hiova rozy ka tsy ho maty lafa avy andro mampeloky ani-Jehovah iny. (Zef. 2:2, 3) Fe tsy tean’olo hafatsy zay. Somary mila mahasaky zany tsika vo mahavita manambara ani-zay. Vomaiky aza ho halan’olo ty hafatsy handesintsika lafa amy fijalea bevata, satria hanambara hafatsy mikasiky fitsarà farany tsika sady hivanta marè hafatsy io.​—Apok. 16:21.

ORIHO ZE RAHA VOLANINI-FAMINANIA INY

20. Ino ty hodinihintsika amy lahatsoratsy manaraky ao?

²⁰ Tena mila manaraky ani-ze “safà amy faminania” iny ao vatany tsika satria tanteraky amintsika henanizao raha amy bokini-Apokalypsy ao reo. (Apok. 1:3) Fe ino ty hanampy antsika tsy hivaliky lafa misy fanenjeha? Ino ty hanampy antsika hahasaky ka hanohy hitory ani-hafatsy io avao? Retoa misy raha roe hampahery antsika: Voalohany, ty raha volanini-bokini-Apokalypsy mikasiky ty fahavalo-Ndranahary. Le faharoe, ty fitahia ho azontsika laha tsy mivaliky mihintsy tsika. Hodinihintsika amy lahatsoratsy roe manaraky ao raha reo.