Afaky ho Velo Mandrakizay Tsika

1. Ino ty vokany lafa tsika mametsivetsy ty fiaina mandrakizay ampitamanini-Jehovah?

MAMPITAMÀ Jehovah hoe hahazo “fiaina mandrakizay” ze olo manoriky ty safàny. (Rom. 6:23) Lafa tsika mametsivetsy ty raha ameani-Jehovah antsika, le vomaiky mitombo ty fitiavantsika azy. Eritsereto tse moa zao: Tena tea antsika Babantsika an-danitsy any iny, ka nameany ani-fanomeza io tsika amy zay tsy hisaraky aminy mihintsy.

2. Manino ty fampitamana fiaina mandrakizay ro manampy antsika?

² Manampy antsika hiaritsy ty raha sarotsy mahazo antsika henanizao ty fiaina mandrakizay ampitamani-Ndranahary antsika. Ndre mampitahotsy antsika aza ty fahavalontsika hoe hamono antsika, le tsy hijano tsika fa hanompo ani-Jehovah avao. Ino ty antony? Satria haintsika hoe laha maty tsika fe tsy nivaliky tamy Jehovah, le hovelominy ndraiky ka afaky mitamà hoe tsy ho maty sasy. (Jaona 5:28, 29; 1 Kor. 15:55-58; Heb. 2:15) Manino tsika ro afaky matoky hoe tena hiay mandrakizay? Retoa misy antony vitsivitsy.

VELO MANDRAKIZAY JEHOVAH

3. Manino tsika ro afaky matoky fa vitani-Jehovah ty manome fiaina mandrakizay antsika? (Salamo 102:12, 24, 27)

³ Haintsika fa vitani-Jehovah ty manome fiaina mandrakizay antsika, satria ie ro Loharanoni-ay, sady velo mandrakizay ie. (Sal. 36:9) Retoa misy andinin-teny vitsivitsy manaporofo hoe fa nisy avao Jehovah bakany zay le mbo hisy avao ie. Mivola ty Salamo 90:2 hoe fa nisy avao Jehovah “bakany bakany zay ka ho mandrakizay.” Mbo miresaky raha mitovy amin’io avao koa ty Salamo faha-102. (Vakio Salamo 102:12, 24, 27.) Le zao ty nisoratini-Habakoka mpaminany mikasiky ani-Babantsika an-danitsy any iny: “Tsy fa nisy avao va lahy iha Jehovah, bakany bakany zay? Tsy ho maty lahy iha Ndranahariko, azy Masy ivavahako iny.”​—Hab. 1:12.

4. Tokony hiasa loha va tsika laha tsy takatsini-saintsika ty hoe fa nisy avao Jehovah bakany zay? Hazavao.

⁴ Sarotsy aminao va ty mahazo ani-hevitsy toy hoe fa nisy “mandrakizay” Jehovah? (Isaia 40:28) Tsy iha raiky avao ro mahatsapa ani-zay. Lafa niresaky mikasiky a Ndranahary Eliho le nivola ie hoe tsy hay isahy ty tao-Ndranahary. (Joba 36:26) Fe laha tsy haintsika ty raha raiky le tsy midika zay hoe tsy marina raha iny. Toy misy ohatsy: Mety tsy tena haintsika hoe manao akory ty fomba fiasani-hazavà, fe midika va zay hoe tsy misy ty hazavà? Tsy zay mihintsy! Manahaky ani-zay koa fa mety tsy takatsini-saintsika mihintsy ty hoe fa nisy avao Jehovah bakany zay le mbo hisy avao ie. Fe tsy midika zay hoe tsy velo mandrakizay Ndranahary. Tsy mianky amy raha haintsika na tsy haintsika zany ty marina mikasiky ani-Mpamoro iny. (Rom. 11:33-36) Mbo tsy nisy ty raha iaby, ohatsy hoe ty masoandro noho ty basia, le fa nisy Ndranahary. Manome toky antsika Jehovah hoe ie ro “nanao ty tany tamy ty heriny.” Le fa nisy avao ie talohani-‘namelarany ty lanitsy.’ (Jer. 51:15; Asa. 17:24) Ino koa ty antony hafa mahavy antsika matoky hoe tena hiay mandrakizay tsika?

NIFORONY HIAY MANDRAKIZAY TSIKA

5. Nitamà ino mpivaly voalohany rey?

⁵ Tsy nataoni-Jehovah hiay mandrakizay ty raha iaby niforoniny an-tany etoy, laha tsy ty olombelo raiky avao. Nameany raha tena miavaky rozy satria afaky mitamà hoe tsy ho maty mihintsy. Fe ndre zay, le nampitandrina ani-Adama Jehovah hoe: “Ka mihina amy ty voani-hazo fahaiza ty soa noho ty raty, fa amy andro ihinananao azy, le ho maty vatany iha.” (Gen. 2:17) Laha nanoriky ty safàni-Jehovah Adama noho Eva, le tsy ho nimaty. Azo inoa hoe mety ho nengani-Jehovah ho nihina tamy “voani-hazon’ay” iny avao rozy lafa tafara atoy. Ho niazon-drozy antoky amy zay hoe tena teani-Jehovah ho “velo mandrakizay” rozy.b​—Gen. 3:22.

6-7. a) Ino koa ty mampiseho hoe tsy niforony ho maty ty olombelo? b) Ino ty raha fa tsy lininao? (Henteo sary io.)

⁶ Misy manam-pahaiza sisany nahita porofo hoe mbo mahavita manajary raha maro mandilatsini-raha azontsika ianara amy andro iaby iainantsika ty ati-dohantsika. Tena mahatseriky raha zay! Nisy gazety raiky zay tamy 2010 nanazava hoe mitovitovy amy video maharitsy 3 tapitrisa lera io ty ati-dohantsika. Mety eo amy 300 tao eo vo vita ty fanentea ani-video zay. Anjoanjo avao zay fa mety mbo mahavita manajary raha maro mandilatsini-zay betrontsika io. Hitantsika baka amy zay fa nataoni-Jehovah afaky manajary raha maro biby mandilatsini-70 na 80 tao ty ati-dohantsika.​—Sal. 90:10.

⁷ Nataoni-Jehovah koa ze hahavy antsika haniry ho velo avao. Mivola ty Baiboly hoe: ‘Natao-Ndranahary am-pon’olombelo ao ty faniria hiay mandrakizay.’ (Mpito. 3:11) Zay ty antony mahavy antsika mikaiky ty fahafatesa hoe fahavalo. (1 Kor. 15:26) Laha marary mafy, ohatsy, tsika le tsy hoe mijano amy zao avao le mandiny faty. Matetiky tsika mamonjy dokotera, le manaraky fitsaboa mba hikarakarà ty fahasalamantsika. Manao ze azontsika atao zany tsika mba tsy hahafaty antsika. Ka lafa misy longontsika maty amy zay, ndre olobe zay ndre anakajà, le tena malahelo tsika sady elaela raha zay vo mety ho afaky. (Jaona 11:32, 33) Tsy voafetra ty raha azontsika ianara satria fa zay mihintsy ty nanamboarani-Mpamoro be fitiava iny antsika. Nataony koa ze hahavy antsika haniry mafy ho velo mandrakizay. Fe tsy zay avao, fa nataony ze hahavy antsika ho afaky hiay mandrakizay. Maro biby ty antony mahavy antsika matoky hoe tena afaky ho velo mandrakizay tsika. Ndao moa hodinihintsika ty raha sisany nataoni-Jehovah taloha tany noho ty raha ataony amy androntsika zao, ka manaporofo hoe tsy niova fikasàny baka am-boalohany any iny.

TSY NIOVA TY FIKASÀNI-JEHOVAH

8. Ino ty ampianarini-​Isaia 55:11 antsika mikasiky ty fikasàni-Jehovah ho antsika?

⁸ Nanota Adama noho Eva, le vokatsini-zay lasa maty ty taranakin-drozy. Fe ndre zay, le tsy novàni-Jehovah mihintsy ty fikasàny. (Vakio Isaia 55:11.) Mbo teany ho velo mandrakizay avao ty olombelo tsy mivaliky. Akory ty ahaizantsika ani-zay? Satria nivolanini-Jehovah raha zay, le nanao raha koa ie mba hahatanteraky ani-fikasàny io.

9. Ino ty raha nampitamani-Ndranahary? (Daniela 12:2, 13)

⁹ Nampitamà Jehovah hoe hovelominy ndraiky ty maty le afaky ho velo tsy misy farany. (Asa. 24:15; Tit. 1:1, 2) Natoky Joba, azy lahilahy tsy nivaliky iny hoe tena maniry hamelo an’olo nimaty rey Jehovah. (Joba 14:14, 15) Haini-Daniela mpaminany fa hovelomy ndraiky ty maty le afaky hiay mandrakizay. (Sal. 37:29; vakio Daniela 12:2, 13.) Nihaini-Jiosy tamy androni-Jesosy rey koa hoe hameani-Jehovah “fiaina mandrakizay” ty mpanompony tsy mivaliky. (Lioka 10:25; 18:18) Matetiky Jesosy niresaky ani-fampitamana io avao, le nitanteraky taminy raha io satria nivelomini-Babany ie.​—Mat. 19:29; 22:31, 32; Lioka 18:30; Jaona 11:25.

10. Manaporofo ino fameloma ty maty taloha tany rey? (Henteo sary io.)

¹⁰ Jehovah ro Mpanome ay antsika sady mana hery ie ka vitany ty mamelo ty olo fa nimaty. Nameany hery, ohatsy, Elia mpaminany mba hamelo ani-anakilahini-ampela maty valy ta Zarefata any iny. (1 Mpanj. 17:21-23) Nampeany koa Elisa mpaminany tafara atoy ka nahavita namelo ani-anakilahini-ampela sonemita iny. (2 Mpanj. 4:18-20, 34-37) Hita baka amy reo noho amy ohatsy hafa fa mana hery hameloma ty maty Jehovah. Nasehoni-Jesosy tamy ie tan-tany etoy hoe nameani-Babany ani-hery io ie. (Jaona 11:23-25, 43, 44) Fa an-danitsy any Jesosy henanizao le fa namea azy “ty fahefà iaby an-danitsy any noho an-tany etoy.” Ho vitany zany ty hanatanteraky ani-fampitamana iny hoe hovelomy ndraiky ‘ty olo iaby an-dolo any’ ka afaky hiay mandrakizay.​—Mat. 28:18; Jaona 5:25-29.

11. Manino ty vilim-panavota ro mahavy antsika ho velo mandrakizay?

¹¹ Manino ro nengani-Jehovah hijalijaly noho maty Anakilahiny teany iny? Hita amy raha nivolanini-Jesosy toy ty valiny. Hoy ty asany: “Tena tea ani-zao tontolo zao Ndranahary ka nameany Anakilahiny toka iny, mba tsy ho ripaky ze mampiseho finoa azy, fa hahazo fiaina mandrakizay.” (Jaona 3:16) Natao-Ndranahary ze hahavy antsika hahazo fiaina mandrakizay, ka nameany ho vilim-panavota Anakilahiny iny mba handimbofa ty fahotantsika. (Mat. 20:28) Nanazava ani-tampany bevata amy fikasà-Ndranahary zay apostoly Paoly lafa nanoratsy hoe: “Baka amin’olo raiky ty fahafatesa, le baka amin’olo raiky koa ty fameloma ty maty. Fa manahaky ty ahafatesan’olo iaby vokatsy ty raha nataoni-Adama, ro hameloma ty olo iaby koa vokatsy ty raha nataoni-Kristy.”​—1 Kor. 15:21, 22.

12. Akory ty hanatanterahani-Jehovah ty fikasàny?

¹² Nampianarini-Jesosy hivavaky ty mpanori-dia azy. Nivolaniny rozy mba hangataky ty hiaviani-Fanjakà-Ndranahary noho hanaova ty sitrapo-Ndranahary an-tany etoy. (Mat. 6:9, 10) Anisani-fikasà-Ndranahary ty hoe ho velo mandrakizay an-tany etoy ty olombelo. Mba hahatanteraky ani-zay, le nitendreni-Jehovah ho Mpanjakani-Fanjakà-Ndranahary Anakilahiny iny. Namory olo 144 000 baka an-tany etoy Ndranahary mba hiaraky hiasa amy Jesosy hanatanteraky ty sitrapony.​—Apok. 5:9, 10.

13. Ino ty ataoni-Jehovah henanizao, le ino ty tokony hataonao?

¹³ Mamory olo ho anisani-“vahoaky be” Jehovah henanizao, le ampianariny rozy mba hiay mifanaraky amy ty raha takini-Fanjakàny. (Apok. 7:9, 10; Jak. 2:8) Voazarazara zao tontolo zao satria mifankalay noho mialy. Fe tsy manahaky ani-zay “ty vahoaky be.” Miezaky mafy rozy mba hangalaky ty karaza fankalaina iaby tsy hisy amin-drozy eo. Asehon-drozy amy ty raha ataon-drozy hoe manefy ty sabatsin-drozy ho sarỳ rozy. (Mika 4:3) Tsy mandramby anjara amy aly rozy satria miteraky faty olo maro raha zay. Aleon-drozy manampy olo mba hahita “ty tena fiaina” le ampianarin-drozy hahay ani-Ndranahary marina iny noho ty fikasàny ty olo. (1 Tim. 6:19) Mety hanohitsy an-drozy ty fianakavian-drozy na mety tsy de hanan-drala rozy satria hoe manoha ty Fanjakà-Ndranahary. Fe ataoni-Jehovah azo antoky hoe mana ze raha ilàn-drozy rozy. (Mat. 6:25, 30-33; Lioka 18:29, 30) Manome toky antsika raha zay hoe tena misy ty Fanjakà-Ndranahary sady hanatanteraky ty fikasàni-Jehovah avao raha io.

HOAVY SOASOA

14-15. Hanao akory ty hahatanteraky ani-fampitamanani-Jehovah iny hoe tsy hisy sasy ty fahafatesa?

¹⁴ Mpanjakani-Fanjakà-Ndranahary an-danitsy any Jesosy henanizao, le hotanterahiny ty raha iaby nampitamanini-Jehovah. (2 Kor. 1:20) Fa nandresy ty fahavalony Jesosy nanomboky tamy 1914. (Sal. 110:1, 2) Kely sisa, le hahavita tanteraky ty fandreseany Jesosy noho mpiaraky manjaka aminy rey ka handripaky ty olo raty fanahy.​—Apok. 6:2.

¹⁵ Hovelomini-Jesosy ndraiky ty maty lafa amy Fanjakà Arivo Tao, le hataony lavorary ze olo iaby manoriky ty safàni-Jehovah. Lafa vita ty fitsapà farany, le “handova ty tany” ze olo volanini-Jehovah hoe marina ka “hipetraky eo mandrakizay.” (Sal. 37:10, 11, 29) Fa ty tena mahafalifaly, le ‘hatao tsy misy sasy ty fahafatesa, azy fahavalo farany iny.’​—1 Kor. 15:26.

16. Ino ty antony bevata tokony handrisiky antsika hanompo ani-Jehovah?

¹⁶ Nihitantsika tamy lahatsoratsy toy tato hoe tena mifototsy amy Safà-Ndranahary ty fitamanantsika fiaina mandrakizay. Manampy antsika tsy hivaliky avao raha io amy andro farany zao. Fe tsy hoe ta ho velo mandrakizay tsika le zay ro mahavy antsika tsy hivaliky amy Jehovah. Tsy mivaliky amy Jehovah noho Jesosy tsika satria tena tea an-drozy. (2 Kor. 5:14, 15) Ho falifaly Jehovah laha manao ani-zay tsika. Mbo fitiava io avao koa ro mandrisiky antsika hanahaky an-drozy noho hiresaky ani-fampitamana zay amin’olo hafa. (Rom. 10:13-15) Laha miezaky hatariky noho tsy ho tea tena tsika, le ho namani-Jehovah avao mandrakizay.​—Heb. 13:16.

17. Ino ty andraikitsintsika kiraidraiky? (Matio 7:13, 14)

¹⁷ Ho anisani-olo hahazo fiaina mandrakizay rey va tsika? Nameani-Jehovah fahafaha hana ani-zay tsika. Fe mila mifily hanaraky ani-lala mana amy fiaina iny avao tsika henanizao. (Vakio Matio 7:13, 14.) Hanao akory ty fiaina lafa tsika hiay mandrakizay? Ho hitantsika amy lahatsoratsy manaraky ao ty valini-fanontanea zay.