Miantehera amy Jehovah, Manahaky ani-Samsona

1-2. Manino ro mahasoa antsika ty mandiniky ty tantarani-Samsona?

INO ty avy an-tsainao ao laha vo maharè anara hoe Samsona? Azo antoky fa tonga de hieritseritsy lahilahy raiky tena natanjaky iha. Tena marina zay. Fe nisy fotoa Samsona tsy nahay nanapa-kevitsy ka lasa nijalijaly. Fe ndre teo zay, le ty tsy fivalihani-Samsona ro nifantohani-Jehovah. Nampiliriny amy Baiboly ao ty tantarany, le nataony anatini-modelin’olo tsy nivaliky rey ie mba hahasoa antsika.

² Nampiasa ani-Samsona Jehovah mba hanao raha miavaky, zany hoe hanampy ty Israelita vahoakiny. Lafa nimaty Samsona, le nivolanini-Jehovah apostoly Paoly taonjato maro tafara atoy, mba hampilitsy ty anarany amy listani-lahilahy tena nanam-pinoa rey ao. (Heb. 11:32-34) Afaky manampy antsika koa ty modelini-Samsona. Niantehitsy tamy Jehovah ie ndre lafa niatriky raha tena sarotsy aza. Ndao moa hodinihintsika hoe ino ty azontsika ianara baka amy Samsona, le manino ty modeliny ro afaky manampy antsika.

NATOKY ANI-JEHOVAH SAMSONA

3. Ino ty fanendrea niazoni-Samsona?

³ Ty Filistinina ro nanjaka tamy firenenan’Israely teo tamy Samsona vo nateraky. Tena nampijalijalin-drozy Israelita reo. (Mpits. 13:1) Nahatiaro nangirifiry mihintsy rozy satria niraty fanahy biby Filistinina reo. Nifilini-Jehovah amy zay Samsona mba “hanavotsy ty Israely amy Filistinina reo.” (Mpits. 13:5) Tena sarotsy asa nanendrea azy zay! Nila niantehitsy tamy Jehovah Samsona laha ta hahavita ani-fanendrea tena sarotsy io.

4. Akory ty nanampeani-Jehovah ani-Samsona ho bototsy an-tanani-Filistinina rey eo? (Mpitsara 15:14-16)

⁴ Natoky ani-Jehovah Samsona sady niantehitsy taminy. Toy misy ohatsy mampiseho ani-zay. Ndraiky andro, le niavy ta Lehy a Joda any ty maramila filistinina mba hanambotsy ani-Samsona. Natahotsy ty lahilahy ta Joda tao, farany natoron-drozy ani-fahavalo rey Samsona, ndre firenena raiky amin-drozy aza. Nifehezin-drozy tamy taly roe vaovao Samsona le nandesin-drozy tamy Filistinina rey any. (Mpits. 15:9-13) Fe “nanome hery ani-Samsona ty fanahini-Jehovah” ka vitany ty nanapaky ani-taly rey. Bakeo ie ‘nahita valanoràn’ampondralahy mbo lè’, le nalàny raha iny ka iny ro namonoany 1000 lahy tamy Filistinina rey!​—Vakio Mpitsara 15:14-16.

5. Akory ty nampisehoani-Samsona hoe niantehitsy tamy Jehovah ie?

⁵ Tsy fitaovam-pialia ty valanoràn’ampondra. Fe nanino Samsona ro nampiasa ani-raha io? Satria hainy hoe hampeani-Jehovah handresy ani-Filistinina reo ie, ndre ino ndre ino ty fitaovam-pialia nampiasàny. Nampiasa ani-ze raha nisy teo avao lahilahy tsy nivaliky io mba hanatanteraha ty sitraponi-Jehovah. Niantehitsy tamy Jehovah Samsona ka niresiny iaby maramila filistinina rey.

6. Ino ty ianarantsika baka amy tantarani-Samsona?

⁶ Afaky manome ze hery ilàntsika koa Jehovah mba hanatanterahantsika ty asa ampanaoviny antsika, ndre atao raha sarotsy aza raha iny. Afaky manampy antsika amy fomba tsy ampoizintsika mihintsy aza Ndranahary. Matokisa fa hanampy anao Jehovah manahaky ty nataony tamy Samsona, ka ho vitanao ty hanao ty sitrapony laha mbo miantehitsy aminy avao iha.​—Ohab. 16:3.

7. Ino ty ohatsy mampiseho hoe tena mila mangataky ty tari-dalani-Jehovah tsika?

⁷ Maro ty rahalahy noho anabavy manampy amy asa fanorena. Nasehon-drozy hoe matoky ani-Jehovah rozy. Taloha, ohatsy, le rozy avao ro manao plan noho mamboatsy ty ankamaroani-Efitrano Fanjakà vaovao noho trano hafa ampiasani-fandamina. Fe mihamaro mihamaro avao moa ty olo militsy amy fandaminani-Jehovah, farany nanova ani-fomba fiasa zay ty fandamina. Nangataky ty fitarihani-Jehovah rahalahy mpiandraikitsy amy fanorena rey ka nanandra fomba fiasa vaovao, anatini-zay ohatsy ty hoe mivily trano bakeo manavao ani-raha rey. Fa nanao asa fanorena tanatini-tao maro, ohatsy, Robert le zao ty nivolaniny: “Tsy nimora tamy rahalahy sisany tamy voalohany ty hanoriky ani-fomba fiasa vaovao iny.” Mbo nivola koa ie hoe: “Tena hafa mihintsy raha iny fa tsy nitovy amy ty nataonay tanatini-tao maro. Fe parè hanao fanovà avao rahalahy reo ka hita hoe tena nitahy ani-fanovà iny Jehovah.” Mbo ohatsy raiky avao io mampiseho hoe tena mitariky ty vahoakiny Jehovah ka lasa vitan-drozy ty manao ty sitrapony. Tokony hanontany ty vatantsika avao tsika matetiky hoe: ‘Mila ty fitarihani-Jehovah va aho ka lafa misy fanovà le miezaky manoriky ani-raha iny?’

NAMPIASÀNI-SAMSONA SOA ZE RAHA NAMEANI-JEHOVAH AZY

8. Ino ty nataoni-Samsona lafa ie narandrano marè?

⁸ Mety tiaronao vasa ty raha miavaky hafa nataoni-Samsona. Namono liona, ohatsy, ie le tafarani-zay ie namono lahilahy filistinina 30 tamy tanàni-Askelona any. (Mpits. 14:5, 6, 19) Haini-Samsona fa tsy ho nahavita raha manahaky ani-reo mihintsy ie laha tsy nanampy azy Jehovah. Narandrano marè, ohatsy, ie lafa baka namono Filistinina 1000 rey. Ino ty nataony? Tsy niantehitsy tamy ty vatany avao ie ka nandeha nila rano, fa nangataky fanampea tamy Jehovah.​—Mpits. 15:18.

9. Ino ty nataoni-Jehovah lafa nangataky fanampea aminy Samsona? (Mpitsara 15:19 noho fanamariha ambany pejy)

⁹ Nisoloho fanampea tamy Jehovah Samsona. Namaly ani-fangatahany iny Jehovah ka nanao fahagagà mba hanomeza rano azy. Lafa nino tamy raha iny Samsona, le “nimpoly ty ainy ka velombelo ie.” (Vakio Mpitsara 15:19 noho fanamariha ambany pejy.) Mbo teo avao loharano vaovao io tao maro tafara atoy lafa Samoela mpaminany nanoratsy ty bokini-Mpitsara. Saky nahita ani-rano iny ty Israelita le mety nahatiaro hoe laha misy mpanomponi-Jehovah tsy mivaliky miantehitsy aminy, le hanampy an-drozy ie amy fotoa mety.

10. Ino ty tokony hataontsika laha teantsika ty hahazo ty fanampeani-Jehovah? (Henteo koa sary io.)

¹⁰ Mila miantehitsy amy Jehovah avao koa tsika ndre ino ino ty talenta na fahaiza mety ananantsika, na ty raha nivitantsika tamy fanompoa azy. Tokony hiambany tsika ka haneky hoe lafa miantehitsy amy Jehovah avao tsika vo afaky hahavita ze raha ampanaoviny antsika. Nahazo ty hery nilàny Samsona lafa nino tamy rano nameani-Jehovah azy iny. Manahaky ani-Samsona, le mila maneky hampeani-Jehovah koa tsika laha teantsika ty tsy hivaliky aminy mihintsy.​—Mat. 11:28.

11. Akory ty ampisehoantsika hoe miantehitsy amy Jehovah tsika? Manomeza ohatsy.

¹¹ Diniho moa ty tantarani-Aleksey, raiky amy mpiara-manompo amintsika miatriky fanenjeha mafy a Russie any. Ino ty nanampy azy hiaritsy? Nana fahazara soa ara-panahy avao rozy morovaly. Hoy ty asany: “Miezaky manao fianara am-bata avao aho sady mamaky Baiboly sanandro. Miaraky manao teny vakina zahay morovaly saky maray sady miaraky mivavaky amy Jehovah.” Ino ty ianarantsika baka amy zay? Tsy tokony hiantehitsy amy ty vatantsika avao tsika fa tokony hiantehitsy amy Jehovah. Akory ty hanaovantsika ani-zay? Mila miezaky manatanjaky ty finoantsika tsika ka mianatsy Baiboly tsy tampaky, mivavaky, mivory, noho mitory. Tena hotahini-Jehovah ty ezaky ataontsika mba hanompoa azy. Nanome hery ani-Samsona Ie, ka azo antoky hoe hameany hery koa tsika.

TSY NIKIVY SAMSONA

12. Nanino ty fiarahani-Samsona amy Delila ro tsy nitovy tamy fiarahany tamy ampela filistinina rey?

¹² Tsy lavorary manahaky antsika koa Samsona ka nisy fotoa ie nanao safidy raty. Niteraky vokany raty fanapahan-kevitsy nataony zay. Tafarani-nahavoatendry ani-Samsona ho mpitsara, le lasa “nifankatea tamy ampela raiky tamy Sakasakani-Soreka any” zay ie. “Delila ty anarani-ampela io.” (Mpits. 16:4) Nanambaly ampela filistinina zay Samsona talohani-zay. Fe Jehovah ro nitariky azy hanao ani-zay satria “nila fomba hanafiha ani-Filistinina rey” ie. Tafarani-zay Samsona nipetraky tamy tranon’ampela makorely ta Gaza any, amy tanàni-Filistinina reo any. Tamy fotoa io, le namea-Ndranahary hery Samsona ka nombotany vavahadini-tanà iny, le nandesiny. Niresiny amy zay tanà iny. (Mpits. 14:1-4; 16:1-3) Fe tsy nanahaky ani-zay tamy Delila satria mety ho Israelita ie fa tsy Filistinina. Nanao ze hitany fa mety avao Samsona.

13. Nataoni-Delila akory Samsona?

¹³ Nivolanini-Filistinina reo Delila hoe hamean-drozy drala be ie laha mamadiky ani-Samsona, le naneky ie. Nitea marè ani-Delila vasa Samsona ka tsy niambiny ty raha teany hatao. Fe ndre ino ino antony nahavy ani-zay, le tsy nieny Delila fa nisokisokiriny avao Samsona mba hivola aminy hoe ino ty tena antony mahavy azy matanjaky biby, farany nambarani-Samsona azy raha iny. Mampalahelo fa lasa tsy natanjaky sasy Samsona vokatsini-hadisoa nataony zay sady lasa tsy nahazo hatò tamy Jehovah.​—Mpits. 16:16-20.

14. Ino ty raha nahazo ani-Samsona lafa natoky ani-Delila ie?

¹⁴ Lasa nijalijaly Samsona satria Delila ro tena natokisany fa tsy Jehovah. Nisamborini-Filistinina rey Samsona le nipotserin-drozy ty masony. Nigadran-drozy ta Gaza any ie. Nataony afa-baraka ty olo tamy tanà io ao taloha kelikelini-zay. Nataon’olo ao rey mpanodiky vato bevata fikoseham-bary amy zay ie lafa tany. Bakeo nanao fety Filistinina rey le nandesin-drozy tany Samsona mba hokizakizahin-drozy. Nanao soro bevata ho ani-Dagona ndranaharin-drozy rozy tamy zay satria nieritseritsy rozy hoe ie ro nanampy an-drozy handresy ani-Samsona. Nandesin-drozy baka am-prizon any Samsona mba “hampiala voly” an-drozy.​—Mpits. 16:21-25.

15. Akory ty nampisehoani-Samsona hoe niantehitsy tamy Jehovah ndraiky ie? (Mpitsara 16:28-30) (Henteo sary amy fononi-gazety toy.)

¹⁵ Nanao hadisoa bevata Samsona, fe tsy nieny ie fa nanompo ani-Jehovah avao. Nila fomba ndraiky ie mba hanatanteraha ani-iraky nampanaovi-Ndranahary azy amy Filistinina reo iny. (Vakio Mpitsara 16:28-30.) Nisoloho tamy Jehovah Samsona hoe: “Engao aho hamaly faty ty Filistinina.” Namaly ty vavakini-Samsona Ndranahary marina iny ka nampoliny aminy ndraiky ty hery miavaky nananany. Ino ty vokany? Nimaro biby mandilatsy ty bakany zay ty Filistinina nimatini-Samsona tamy fotoa io.

16. Ino ty ianarantsika baka amy hadisoani-Samsona?

¹⁶ Marina fa nijalijaly Samsona vokatsini-raha tsy nety nataony iny, fe ndre zay le mbo tsy nieny nanao ty sitraponi-Jehovah avao ie. Laha manao hadisoa tsika ka mahazo fananara na very tombotsoa, le tsy tokony ho kivy. Tiarovo hoe parè hanenga ty hadisoantsika Jehovah. (Sal. 103:8-10) Ka ndre nanao raha tsy nety aza tsika, le mbo afaky mampiasa antsika avao Jehovah, manahaky ty nataony tamy Samsona.

17-18. Ino amy tantarani-Michael ro tena mampahery anao? (Henteo koa sary io.)

¹⁷ Diniho moa tantarani-rahalahy raiky tanora mana anara Michael toy. Nibe atao tamy fanompoa ie, sady mpikarakara fiangona ie no mpisava lala maharitsy. Fe nampalahelo fa nanao hadisoa ie ka nivery tombotsoa nananany tamy fiangona eo rey. Hoy ty asany: “Nibe atao tamy fanompoa ani-Jehovah aho talohani-zay. Fe tampotampoky teo, le atao raha tsy nisy dikany raha nataoko rey. Natoky aho fa tsy hiala ahy mihintsy Jehovah, fe nisalasala aho laha mbo himpoly manahaky taloha iny ndraiky ty fifandrambesako aminy. Nisalasala koa aho laha mbo hahavita hanompo azy manahaky nataoko taloha iny ndraiky.”

¹⁸ Soa avao fa tsy nikivy Michael. Nivola ie hoe: “Niezaky hifandramby soa amy Jehovah ndraiky aho ka nivavaky tsy tampaky, nianatsy, sady nametsivetsy.” Lafa nandeha ty fotoa, le nahazo tombotsoa anivoni-fiangona eo ndraiky Michael. Anti-panahy ie henanizao sady mpisava lala maharitsy. Hoy ty asany: “Nanampy noho nampahery ahy avao ty olo amy fiangona eo, sirtò fa ty anti-panahy. Tsapako baka amy rey hoe mbo tea ahy Jehovah. Afaky manompo azy anivoni-fiangona eo ndraiky aho sady malio ty eritseritsiko. Nianarako baka amy raha iny hoe ndre ia ia manao hadisoa le hanenga ty hadisoany Jehovah laha tena mibebaky ie.” Afaky matoky zany tsika fa mbo hampiasa antsika avao Jehovah sady hitahy antsika koa ie ndre nanao hadisoa aza tsika, laha ohatsy ka manao ze azontsika atao tsika mba hanarena ani-raha tsy nety nataontsika iny sady miantehitsy aminy avao.​—Sal. 86:5; Ohab. 28:13.

19. Manino ro nampahery anao ty modelini-Samsona?

¹⁹ Nandiniky ty sisany amy raha niavaky tamy fiainani-Samsona tsika tamy lahatsoratsy toy ato. Tsy lavorary ie, fe tsy nikivy ie fa niezaky nanompo ani-Jehovah avao, ndre tafarani-niarahany tamy Delila iny aza. Tsy nahafoy azy koa Jehovah. Nampiasa ani-Samsona tamy fomba miavaky ndraiky Ndranahary. Lahilahy tena nanam-pinoa ty fahitani-Jehovah azy, ka nampiliriny anatini-listan’olo tsy nivaliky amy Hebreo toko faha-​11 ao rey ty anarany. Tena mampahery ty mahay hoe be fitiava manahaky ani-zay Babantsika an-danitsy any, azy tompoentsika io! Ta hampahery antsika ie sirtò lafa miatriky raha sarotsy tsika ka mila ty fanampeany. Manahaky ani-Samsona zany, le ndao tsika hisoloho amy Jehovah hoe: “Mba tiarovo lahy aho azafady ka ameo hery!”​—Mpits. 16:28.