Numera

34 Ua toe fetalai mai Ieova iā Mose e faapea: 2 “Ia e poloaʻi atu i le fanauga a Isaraelu: ‘Pe a outou ō atu i le laueleele o Kanana,+ o le laueleele lava lea e maua e outou e fai ma o outou tofi, o le laueleele o Kanana e tusa ma ona tuaoi.+

3 “‘O lo outou tuaoi i le itu i saute, e mai i le toafa o Tisina lea e i tafatafa ane o Etoma, ma o lo outou tuaoi i saute i le itu i sasaʻe, e amata mai i le pito i lalo o le Sami Oona.*+ 4 E afe ane lo outou tuaoi, i le itu i saute o le mafa o Akarava+ e oo atu i Tisina, ona agaʻi lea i saute i Katesa-panea.+ Ona piʻo ane lea agaʻi i Hasara-tara+ ma oo atu i Asemoni. 5 Ona toe piʻo ane lea o le tuaoi i Asemoni agaʻi i le ālia* o Aikupito ma e gata mai i le Sami.*+

6 “‘O lo outou tuaoi i le itu i sisifo, o le Sami Tele ma le talafatai. O lo outou tuaoi lea i le itu i sisifo.+

7 “‘O lo outou tuaoi lenei i le itu i mātū: E tou te faailoga lo outou tuaoi mai i le Sami Tele e oo atu i le mauga o Horo. 8 E tou te faailoga le tuaoi mai i le mauga o Horo e oo atu i Lepo-amato,*+ ma e gata mai le tuaoi i Setata.+ 9 E agaʻi atu le tuaoi i Seferona, ma e gata mai i Hasare-nana.+ O lo outou tuaoi lea i le itu i mātū.

10 “‘E ao ona outou faailoga e fai ma o outou tuaoi i le itu i sasaʻe mai i Hasare-nana e oo atu i Sefana. 11 E alu ifo le tuaoi mai i Sefana e oo atu i Ripelu i le itu i sasaʻe o Aino, ma e alu ifo lava le tuaoi i le malifa i le itu i sasaʻe o le vai o Kinereta.*+ 12 E alu ifo le tuaoi i Ioritana, ma e gata mai i le Sami Oona.+ O lo outou laueleele+ lea ma ona tuaoi ua siʻomia ai.’”

13 Ona poloaʻi atu lea o Mose i le fanauga a Isaraelu e faapea: “O le laueleele lenei e tou te vaevaeina e fai ma o outou fanua e ala i le vili,+ e pei ona poloaʻi mai ai Ieova ina ia avatu i ituaiga e iva ma le ʻafa. 14 Auā ua maua e le ituaiga o le fanauga a Reupena e tusa ma le ituaiga o o latou tamā, ma le ituaiga o le fanauga a Kato, e tusa ma le ituaiga o o latou tamā o latou tofi, ma ua maua foʻi e le ʻafa o le ituaiga o Manase o latou tofi.+ 15 Ua maua e ituaiga e lua ma le ʻafa o latou tofi i le itu i sasaʻe o Ioritana, e faafesagaʻi ma Ieriko i le mea e oso aʻe ai le lā.”+

16 Ua toe fetalai mai Ieova iā Mose e faapea: 17 “O igoa ia o tane o ē o le a vaevaeina le laueleele mo outou e fai ma o outou fanua: o Eleasaro+ le ositaulaga ma Iosua+ le atalii o Nuno. 18 E tou te aumaia se taʻitaʻi mai i ituaiga taʻitasi, e fesoasoani i le vaevaeina o le laueleele.+ 19 O igoa nei o tane: o Kalepo+ le atalii o Iefune mai i le ituaiga o Iuta;+ 20 o Semueli le atalii o Ameuta mai i le ituaiga o le fanauga a Simeona;+ 21 o Elitata le atalii o Kiselona mai i le ituaiga o Peniamina;+ 22 o Puki le atalii o Iakeli, o se taʻitaʻi mai i le ituaiga o le fanauga a Tanu;+ 23 o Hanieli le atalii o Efota, o se taʻitaʻi mai i le ituaiga o le fanauga a Manase,+ e mai i atalii o Iosefa;+ 24 o Kimueli le atalii o Sefatana, o se taʻitaʻi mai i le ituaiga o le fanauga a Efaraima;+ 25 o Elisafano le atalii o Parenaka, o se taʻitaʻi mai i le ituaiga o le fanauga a Sepulona;+ 26 o Paletieli le atalii o Asani, o se taʻitaʻi mai i le ituaiga o le fanauga a Isakara;+ 27 o Aiuta le atalii o Selomi, o se taʻitaʻi mai i le ituaiga o le fanauga a Asera;+ 28 o Petaeli le atalii o Ameuta, o se taʻitaʻi mai i le ituaiga o le fanauga a Nafatali.”+ 29 O i latou ia ua poloaʻi mai i ai Ieova e vaevaeina laueleele o Kanana mo le fanauga a Isaraelu.+