O le Tusi Muamua o Nofoaiga a Tupu

21 Ona tulaʻi mai lea o Satani* faasaga iā Isaraelu, ma faaoso Tavita e faitau Isaraelu.+ 2 Ona fai atu lea o Tavita iā Ioapo+ ma taʻitaʻi o le nuu: “Inā ō ia ma faitau Isaraelu, e amata mai i Peresepa e oo i Tanu,+ ma taʻu mai iā te aʻu ina ia ou iloa ai lo latou faitau aofaʻi.” 3 Ae ua fai mai Ioapo: “Ia faatoʻateleina e Ieova lona nuu ia ta‘isautuaselau. Loʻu Alii e, le tupu, pe lē o i latou uma ea o au auauna? Aiseā ua manaʻo ai loʻu alii e faia lenei mea? Aiseā e avea ai o ia ma mea e agasala ai Isaraelu?”

4 Ae ua manumalo upu a le tupu iā Ioapo. Ona alu atu lea o Ioapo i Isaraelu uma, ona toe sau ai lea o ia i Ierusalema.+ 5 Ua avatu e Ioapo le aofaʻiga o le lesitala o le nuu iā Tavita; ma o le aofaʻiga o Isaraelu uma, e 1,100,000 tagata e iai a latou pelu, a o Iuta e toʻa 470,000 tagata e iai a latou pelu.+ 6 Ae e leʻi lesitalaina Levi ma Peniamina faatasi ma i latou,+ auā ua ʻinoʻino Ioapo i upu a le tupu.+

7 Na leaga lenei mea i le silafaga a le Atua moni, ma na ia taia ai Isaraelu. 8 Ona fai atu lea o Tavita i le Atua moni: “Ua ou matuā agasala+ lava i le mea ua ou faia. O lenei, ia faamagalo le sesē o lau auauna faamolemole;+ auā ua ou matuā valea ina ua ou faia o lenei mea.”+ 9 Ona fetalai mai lea o Ieova iā Kato,+ o lē e faamatalaina faaaliga iā Tavita, ua faapea mai: 10 “Inā alu ia ma fai atu iā Tavita, ‘O le mea lenei na fetalai mai ai Ieova: “E tolu mea ou te tuuina atu iā te oe. Ia e filifili se mea e tasi ou te faia iā te oe.”’” 11 Ona alu atu lea o Kato iā Tavita ma faapea atu: “O le mea lenei na fetalai mai ai Ieova, ‘Inā e filifili ia 12 po o le oge mo le tolu tausaga,+ po o le faatoʻilaloina o oe e ou fili mo le tolu masina ma fasia ai oe e le pelu a ou fili,+ po o le pelu a Ieova mo le tolu aso, o le faamaʻi lea i le nuu,+ ma e faatamaʻia ai e le agelu a Ieova+ le nuu uma o Isaraelu.’ O lenei, ia e mafaufau po o le ā se upu ou te tali atu ai i Lē na auina mai aʻu.” 13 Ona fai mai lea o Tavita iā Kato: “Ua ou matuā mafatia lava. Ae faamolemole, aua ne‘i faasalaina aʻu e tagata,+ ae ia faasala aʻu e Ieova auā e matuā tele lona alofa mutimutivale.”+

14 Ona tuuina mai lea e Ieova o le faamaʻi+ iā Isaraelu, ma ua feoti ai tagata Isaraelu e toʻa 70,000.+ 15 Ua auina mai foʻi e le Atua moni se agelu i Ierusalema ina ia faaumatia ai; ae ina ua lata ina ia faia faapea, ona silasila mai lea o Ieova ma ua faanoanoa ona o le malaia,+ ma ua ia fetalai atu i le agelu na faaumatiaina le nuu: “Ua lava lea!+ Ia taofi lou lima.” Sa latalata ane foʻi le agelu a Ieova i le mea e soli ai saito a Oruna*+ le tagata Iepusē.+

16 Ua tepa aʻe Tavita, ona ia iloa ai lea o le agelu a Ieova o loo tū i le vā o le lalolagi ma le lagi, o loo seʻi lana pelu+ ma faaloaloa atu lona lima agaʻi i Ierusalema; ona faapaʻuʻū faō+ lea o Tavita ma toeaina, o loo oofu i ʻie talatala.+ 17 Ua fai atu Tavita i le Atua moni: “Pe e lē o aʻu ea na fai atu e faitau le aofaʻi o le nuu? O aʻu na agasala ma faia le mea sesē;+ ae o le ā le mea ua faia e nei mamoe? Ieova e, loʻu Atua, faamolemole, ia oo mai lou aao iā te a‘u ma le aiga o loʻu tamā; ae aua le faasalaina lou nuu.”+

18 Ona fai atu lea o le agelu a Ieova iā Kato,+ e fai atu iā Tavita, ia alu aʻe e faatū se fata faitaulaga iā Ieova, i le mea e soli ai saito a Oruna le tagata Iepusē.+ 19 Ona alu aʻe lea o Tavita e pei o upu a Kato, e tusa ai ma le mea na ia fai mai ai i le suafa o Ieova. 20 O le taimi lea o loo soli le saito e Oruna, ma ina ua fāliu Oruna ma iloa atu le agelu, ona lalafi ai lea o ona atalii e toʻafā sa faatasi ma ia. 21 Ina ua alu aʻe Tavita iā Oruna, ma ua vaai ifo Oruna ma iloa ai Tavita, ona faavave atu lea o ia mai i le mea e soli ai saito, ua faapaʻū faō i le eleele ma ifo iā Tavita. 22 Ona fai atu lea o Tavita iā Oruna: “Ia e faatau mai* iā te aʻu le mea e soli ai saito, ina ia ou faia ai se fata faitaulaga iā Ieova. Ia faatau mai iā te aʻu i le tau atoa, ina ia taofia ai le faamaʻi mai i le nuu.”+ 23 Ae ua fai mai Oruna iā Tavita: “Ia ave ma oe, ma ia faia e loʻu alii le tupu le mea e lelei e tusa ma lona manatu.* Ou te avatua foʻi povi mo taulaga mū, o laupapa e olo ai saito+ e fai ai fafie, ma le saito mo le taulaga i meaʻai.* Ou te avatua nei mea uma.”

24 Peitaʻi, ua fai atu le tupu o Tavita iā Oruna: “E leai, ou te faatauina mai lava i le tau atoa, auā ou te lē aveina au mea ma ofo atu iā Ieova pe ofo atu ni taulaga mū e aunoa ma se tau.”+ 25 Ona avatu lea e Tavita iā Oruna o auro e tusa lona mamafa ma le 600 sekeli,* mo le fanua. 26 Ona faia lea e Tavita i inā o le fata faitaulaga+ iā Ieova, ma ofo atu ai taulaga mū ma taulaga faifaatasi. Na ia valaau foʻi i le suafa o Ieova, o lē na tali mai iā te ia i le afi+ mai i le lagi i luga o le fata faitaulaga mū. 27 Ona faatonuina lea e Ieova le agelu+ e toe sulu lana pelu i lona faamoega. 28 O lea, ina ua iloa e Tavita ua tali mai Ieova iā te ia i le mea e soli ai saito a Oruna le tagata Iepusē, ona ia fai taulaga ai pea lea i inā. 29 A o le faleʻie paia o Ieova lea na faia e Mose i le toafa, ma le fata faitaulaga o le taulaga mū, sa iai i lenā taimi i le mea maualuga i Kipeona.+ 30 Ae e leʻi mafai ona alu atu Tavita i luma o le fata faitaulaga e fesili atu ai i le Atua, auā na matuā fefe o ia ona o le pelu a le agelu a Ieova.