Faamasino

18 Sa leai se tupu i Isaraelu i na aso.+ O aso foʻi ia na saʻili ai le ituaiga o Tanu+ mo se tofi e latou te nonofo ai i inā; auā e oo mai lava i na aso, e leʻi maua so latou tofi faatasi ma ituaiga o Isaraelu.+

2 Ua aauina atu e tagata o Tanu ni tane se to‘alima mai i o latou aiga, o ni tane agavaa mai i Soraa ma Esetaola,+ ina ia ō atu faalilolilo e mataʻi le laueleele ma vaavaai i ai. Ua latou fai atu iā i latou: “Inā ō ia e vaavaai i le laueleele.” Ina ua latou taunuu i le vaega maugā o Efaraima i le fale o Mika,+ ona latou momoe ai lea i inā i le pō. 3 A o latou latalata atu i le fale o Mika, na latou mātauina ai le leo o le tauleʻaleʻa* sa Levī, ona latou ō atu lea iā te ia ma fesili i ai: “O ai na aumaia oe i inei? O le ā lau mea o fai i inei? Aiseā ua e iai i inei?” 4 Ona tali mai lea o ia iā i latou: “O le mea lenei ua faia e Mika iā te aʻu, ua ia totogi aʻu ina ia ou auauna o se ositaulaga mo ia.”+ 5 Ona latou faapea atu lea iā te ia: “Faamolemole, ia e fesili atu i le Atua pe e taulau manuia la matou malaga.” 6 Ua fai mai le ositaulaga iā i latou: “Inā ō ia ma le filemu. O loo faatasi Ieova i la outou faigāmalaga.”

7 Ona ō ai lea o ia tane e toʻalima ma ua taunuu i Laisa.+ Na latou iloa ai e ola tutoʻatasi tagata o le aai e pei o tagata Saitonu. E fifilemu ma e lē masalosalo,+ e leai foʻi se pule sauā i le nuu e faatigā iā i latou. Na mamao ese i latou mai i tagata Saitonu, ma e latou te lē faifaimea faatasi foʻi ma isi tagata.

8 Ina ua latou toe fo‘i i o latou uso i Soraa ma Esetaola,+ ua fai mai o latou uso iā i latou: “O le ā sa outou tala?” 9 Ua latou tali atu: “Inā tatou ō aʻe ia e tau ma i latou; auā ua matou vāai e matuā lelei lava le laueleele. Aiseā ua outou faatalatū ai? Aua neʻi outou faatuai e ō atu e nonofo i le laueleele. 10 Pe a outou taunuu, e tou te tau atu i tagata e lē masalosalo,+ ma e matuā lautele le laueleele. Ua tuuina mai e le Atua i o outou lima o se nofoaga e leai se mea e mativa ai i le lalolagi.”+

11 Ona ō ese ai lea mai i Soraa ma Esetaola o tagata e toʻa 600 ua faaauupegaina mo le taua, mai i le ituaiga o Tanu.+ 12 Ua latou ō aʻe ma tolauapi i Kiriata-iarima+ i Iuta. O le mea lea na faaigoa ai lenā nofoaga o Maane-tanu*+ e oo mai i aso nei, o loo i le itu i sisifo o Kiriata-iarima. 13 Ona latou ō atu ai lea i le vaega maugā o Efaraima ma ua oo atu ai i le fale o Mika.+

14 Ona fai mai lea o tane e toʻalima na ō atu faalilolilo e mataʻi le laueleele o Laisa,+ ua faapea mai i o latou uso: “Pe tou te iloa ea o loo iai i nei fale le efota, o tupua o terafimi,* o le faatusa ua tā, ma le tupua uʻamea?+ Ia outou mafaufau po o le ā le mea e fai.” 15 Ona latou afe ane lea i inā, ma ō atu i le fale o le tauleʻaleʻa sa Levī+ e lata i le fale o Mika, ma fesili i ai po o ā mai o ia. 16 I le taimi lea, o loo tutū i le faitotoʻa o le pā tagata e toʻa 600 ua faaauupegaina mo le taua mai i le ituaiga o Tanu.+ 17 Ua ō atu i totonu tane e toʻalima na ō atu faalilolilo e mataʻi le laueleele,+ ina ia ave le faatusa ua tā, o le efota,+ o tupua o terafimi,*+ ma le faatusa uʻamea.+ (O loo tutū i le faitotoʻa o le pā le ositaulaga+ ma tagata e toʻa 600 ua faaauupegaina mo le taua.) 18 Ua latou ō atu i le fale o Mika ma ave le faatusa ua tā, le efota, o tupua o terafimi,* ma le faatusa uʻamea. Ona fai mai lea o le ositaulaga iā i latou: “O le ā la outou mea o fai?” 19 Ae ua latou fai atu iā te ia: “Ia filemu. Tuu lou lima i lou gutu, ma sau tatou ō e fai oe ma tamā* ma ositaulaga mo i matou. O fea e sili, o le fai o oe ma ositaulaga i le aiga o se tagata e toʻatasi,+ po o le fai o oe ma ositaulaga i se ituaiga ma se aiga i Isaraelu?”+ 20 Ua malie i ai le ositaulaga, ona ia ave lea o le efota, o tupua o terafimi,* ma le faatusa ua tā,+ ma ua ō faatasi ma le nuu.

21 Ona latou toe liliu lea ma ō atu i lo latou ala, ua faamuamua i o latou luma o tamaiti, o lafumanu, ma mea tāua. 22 Ina ua mamao ese i latou mai i le fale o Mika, ona faapotopoto faatasi ai lea o tagata o ē e latalata ane o latou fale i le fale o Mika, ua latou tuliloa ma maua atu tagata o Tanu. 23 Ina ua latou valaau atu i tagata o Tanu, ona latou liliu mai lea ma faapea mai iā Mika: “O le ā le mea ua tupu? Aiseā ua e faapotopoto faatasi ai nei tagata?” 24 Ona ia fai atu lea: “Ua outou ave oʻu atua na ou faia, ua outou ave fo‘i le ositaulaga. O le ā se mea o totoe iā te aʻu? E faapefea la ona outou fai mai iā te aʻu, ‘O le ā le mea ua tupu iā te oe?’” 25 Ona tali mai lea o tagata o Tanu: “Aua e te tautala mai faapena iā i matou, ina neʻi faasauā atu iā te outou tagata ua lotoa,* ona fasiotia ai lea o oe ma lou aiga.” 26 Ona faaauau lea o tagata o Tanu i lo latou ala; ua iloa foʻi e Mika e malolosi atu i latou nai lo o ia, ona liliu lea o ia ma toe foʻi i lona fale.

27 Ina ua uma ona latou ave o mea na faia e Mika, faapea lana ositaulaga, ona latou ō atu lea i Laisa+ i tagata e fifilemu ma e lē masalosalo.+ Ua latou fasiotia foʻi i latou i le pelu ma susunu le aai i le afi. 28 Sa leai sē e laveaʻiina i latou auā ua mamao ese lava mai i Saitonu, e leʻi faifaimea faatasi i latou ma isi tagata; o le aai lea e i le fanua laugatasi* i Pete-reopa.+ Ona latou toe fausia lea o le aai ma nonofo ai. 29 Ua latou faaigoa foʻi le aai iā Tanu,+ o le igoa lea o lo latou tamā o Tanu, o lē na fanau mai iā Isaraelu.+ Ae o le igoa muamua o le aai, o Laisa.+ 30 Ua mavae lenā, ona faatūina lea e tagata o Tanu o le faatusa ua tā+ mo i latou; o Ionatana+ foʻi le atalii o Keresoma,+ le atalii lea o Mose, o ia ma ona atalii sa fai ma ositaulaga i le ituaiga o Tanu, se‘ia oo i le aso na ave faapagota ai le nuu. 31 Ua latou faatūina le faatusa ua tā na faia e Mika, ma na iai pea i inā i aso uma na iai le fale o le Atua moni i Sailo.+