Numera

29 “‘E ao ona outou faia se tauaofiaga paia i le aso muamua o le masina lona fitu. Aua neʻi outou faia ai ni galuega mamafa.+ O le aso lea e tou te iliina ai pū.+ 2 E tou te faia se taulaga mū i le tamaʻi povi poʻa e tasi, o le mamoe poʻa e tasi, o tama‘i mamoe poʻa e fitu e taʻitasi tausaga, e matuā lelei uma lava, o se manogi lelei lea iā* Ieova, 3 ma le taulaga i meaʻai e avatu faatasi ma ia manu, o le falaoamata lelei ua iai sina suāuu, o le tolu vaesefulu o le efa mo le povi poʻa, o le lua vaesefulu o le efa mo le mamoe poʻa, 4 ma le tasi vaesefulu o le efa mo tamaʻi mamoe poʻa taʻitasi e fitu, 5 ma le tama‘i ʻoti po‘a e tasi e fai ai le taulaga o agasala ina ia fai ma togisala mo outou. 6 O lenei taulaga e ese mai i le taulaga mū faalemasina ma le taulaga i meaʻai,+ o le taulaga mū faifai pea ma le taulaga i meaʻai,+ faatasi ma taulaga i meainu,+ e tusa ma faiga masani mo ia mea, o se manogi lelei,* o le taulaga iā Ieova ua faia i le afi.

7 “‘E ao ona outou faia se tauaofiaga paia i le aso lona sefulu o lea masina lona fitu,+ ma e ao ona outou faapuapuagatia* ai iā te outou. Aua neʻi outou faia ai ni galuega.+ 8 E tou te avatua se taulaga mū iā Ieova, o se manogi lelei lea,* o se tamaʻi povi poʻa e tasi, o se mamoe poʻa e tasi, ma tamaʻi mamoe poʻa e fitu e taʻitasi tausaga, e matuā lelei uma lava ia manu.+ 9 O le taulaga i meaʻai mo ia taulaga, o le tolu vaesefulu o le efa o le falaoamata lelei ua iai sina suāuu mo le povi poʻa, o le lua vaesefulu o le efa mo le mamoe poʻa e tasi, 10 ma le tasi vaesefulu o le efa mo tamaʻi mamoe poʻa taʻitasi e fitu, 11 atoa ma le tamaʻi ʻoti e tasi e fai ai le taulaga o agasala, e ese mai i le taulaga o agasala o le togisala+ ma le taulaga mū faifai pea ma le taulaga i meaʻai, atoa ai ma taulaga i meainu.

12 “‘E ao ona outou faia se tauaofiaga paia i le aso lona 15 o le masina lona fitu. Aua neʻi outou faia ai ni galuega mamafa, ma e ao ona outou faamanatu se tausamiga iā Ieova i aso e fitu.+ 13 E tou te avatu ni tamaʻi povi poʻa e 13, o mamoe poʻa e 2, o tamaʻi mamoe poʻa e 14 e taʻitasi tausaga e faia ai le taulaga mū,+ o le taulaga ua faia i le afi, o se manogi lelei lea iā* Ieova, e matuā lelei uma lava ia manu.+ 14 O le taulaga i meaʻai mo ia taulaga, o le tolu vaesefulu o le efa o le falaoamata lelei ua iai sina suāuu mo povi poʻa taʻitasi e 13, o le lua vaesefulu o le efa mo mamoe poʻa taʻitasi e 2, 15 ma le tasi vaesefulu o le efa mo tamaʻi mamoe poʻa taʻitasi e 14, 16 atoa ma le tamaʻi ʻoti e tasi e fai ai le taulaga o agasala, e ese mai i le taulaga mū faifai pea ma le taulaga i meaʻai, atoa ai ma le taulaga i meainu.+

17 “‘Ia outou avatu i le aso lona lua o tamaʻi povi poʻa e 12, o mamoe poʻa e 2, o tamaʻi mamoe poʻa e 14 e taʻitasi tausaga, e matuā lelei uma lava,+ 18 atoa ma le taulaga i meaʻai ma taulaga i meainu mo povi poʻa, o mamoe poʻa ma tamaʻi mamoe poʻa e tusa ma le aofaʻi o ia manu, e tusa fo‘i ma faiga masani, 19 atoa ma le tamaʻi ʻoti e tasi e fai ai le taulaga o agasala, e ese mai i le taulaga mū faifai pea ma le taulaga i meaʻai, atoa ai ma taulaga i meainu.+

20 “‘Ae ia outou avatu i le aso lona tolu o povi poʻa e 11, o mamoe poʻa e 2, o tamaʻi mamoe poʻa e 14 e taʻitasi tausaga, e matuā lelei uma lava,+ 21 atoa ma le taulaga i meaʻai ma taulaga i meainu mo povi poʻa, o mamoe poʻa ma tamaʻi mamoe poʻa e tusa ma le aofaʻi o ia manu, e tusa fo‘i ma faiga masani, 22 atoa ma le ʻoti e tasi e fai ai le taulaga o agasala, e ese mai i le taulaga mū faifai pea ma le taulaga i meaʻai, atoa ai ma le taulaga i meainu.+

23 “‘Ae ia outou avatu i le aso lona fā o povi poʻa e 10, o mamoe poʻa e 2, o tamaʻi mamoe poʻa e 14 e taʻitasi tausaga, e matuā lelei uma lava,+ 24 atoa ma le taulaga i meaʻai ma taulaga i meainu mo povi poʻa, o mamoe poʻa ma tamaʻi mamoe poʻa e tusa ma le aofaʻi o ia manu, e tusa fo‘i ma faiga masani, 25 atoa ma le tamaʻi ʻoti e tasi e fai ai le taulaga o agasala, e ese mai i le taulaga mū faifai pea ma le taulaga i meaʻai, atoa ai ma le taulaga i meainu.+

26 “‘Ae ia outou avatu i le aso lona lima o povi poʻa e 9, o mamoe poʻa e 2, o tamaʻi mamoe poʻa e 14 e taʻitasi tausaga, e matuā lelei uma lava,+ 27 atoa ma le taulaga i meaʻai ma taulaga i meainu mo povi poʻa, o mamoe poʻa ma tamaʻi mamoe poʻa e tusa ma le aofaʻi o ia manu, e tusa fo‘i ma faiga masani, 28 atoa ma le ʻoti e tasi e fai ai le taulaga o agasala, e ese mai i le taulaga mū faifai pea ma le taulaga i meaʻai, atoa ai ma le taulaga i meainu.+

29 “‘Ae ia outou avatu i le aso lona ono o povi poʻa e 8, o mamoe poʻa e 2, o tamaʻi mamoe poʻa e 14 e taʻitasi tausaga, e matuā lelei uma lava,+ 30 atoa ma le taulaga i meaʻai ma taulaga i meainu mo povi poʻa, o mamoe poʻa ma tamaʻi mamoe poʻa e tusa ma le aofaʻi o ia manu, e tusa fo‘i ma faiga masani, 31 atoa ma le ʻoti e tasi e fai ai le taulaga o agasala, e ese mai i le taulaga mū faifai pea ma le taulaga i meaʻai, atoa ai ma taulaga i meainu.+

32 “‘Ae ia outou avatu i le aso lona fitu o povi poʻa e 7, o mamoe poʻa e 2, o tamaʻi mamoe poʻa e 14 e taʻitasi tausaga, e matuā lelei uma lava,+ 33 atoa ma le taulaga i meaʻai ma taulaga i meainu mo povi poʻa, o mamoe poʻa ma tamaʻi mamoe poʻa e tusa ma le aofaʻi o ia manu, e tusa ma faiga masani mo ia mea, 34 atoa ma le ʻoti e tasi e fai ai le taulaga o agasala, e ese mai i le taulaga mū faifai pea ma le taulaga i meaʻai, atoa ai ma le taulaga i meainu.+

35 “‘E ao ona outou faia se fonotaga paia i le aso lona valu. Aua neʻi o outou faia ai ni galuega mamafa.+ 36 E tou te avatu se povi poʻa e tasi, o se mamoe poʻa e tasi, o tamaʻi mamoe poʻa e fitu e taʻitasi tausaga, e matuā lelei uma lava,+ e fai ai le taulaga mū, o le taulaga ua faia i le afi, o se manogi lelei lea iā* Ieova, 37 atoa ma le taulaga i meaʻai ma taulaga i meainu mo le povi poʻa, o le mamoe poʻa ma tamaʻi mamoe poʻa e tusa ma le aofaʻi o ia manu, e tusa foʻi ma faiga masani, 38 atoa ma le ʻoti e tasi e fai ai le taulaga o agasala, e ese mai i le taulaga mū faifai pea ma le taulaga i meaʻai, atoa ai ma le taulaga i meainu.+

39 “‘O mea ia tou te fai taulaga ai iā Ieova i aso o o outou tausamiga,+ e ese mai i a outou taulaga o tautoga+ ma a outou taulaga tauofo+ e fai ma a outou taulaga mū,+ o a outou taulaga i meaʻai,+ o a outou taulaga i meainu,+ ma a outou taulaga faifaatasi.’”+ 40 Ona taʻu atu lea e Mose i le fanauga a Isaraelu o mea uma na poloaʻi mai ai Ieova iā te ia.