Fesili Mai le Au Faitau
◼ O ai le “toasefulu ma le toʻalua” lea na faaali iai Iesu, e pei ona taʻua i le 1 Korinito 15:5?
O le faaali lea e taʻua i le 1 Korinito 15:5 e foliga mai o lea foi o loo taʻua i le Ioane 20:26-29, le na aafia ai Toma. A e peitai, e faasino le mea lenei i le au aposetolo i le avea o se vaega ma e foliga mai e faapena foi ona aafia ai ma Matatia.
I le talanoaina o le toetu, na tusi ai Paulo e uiga i le faaali atu o Iesu i tagata ina ua mavae Lona toetu. Na faapea mai le aposetolo. “Na iloa foi o ia e Kefa, ona iloa lea e le toasefulu ma le toalua. Ona toe iloa lea o ia e le au uso e lima selau ma ona tupu.”—1 Korinito 15:5, 6.
Mai ia i latou na mulimuli atu ia te ia e avea o ni ona soʻo, na filifili ai e Iesu aposetolo e toʻa 12. (Mataio 10:2-5) O Iuta le Sekara sa o se tasi o le toʻa 12, a e na liua o le faaʻoleoʻle, na ia faalataina ai Iesu, ma na toe nonoa lava e ia lona ua ma oti ai. (Mataio 26:20-25; 27:3-10) O lea i lea taimi o le maliu o Keriso ma lona toetu, sa na o le toʻa 11 le au aposetolo faamaoni mai uluai aposetolo e 12. Na faaali Iesu i soʻo eseese i le va o lona toetu ma lona afio aʻe i le lagi. Mulimuli ane ona iloa ai lea e le au aposetolo le manaomia ona iai o se sui o Iuta. Faatasi ai ma le taʻtaʻiga tauatua, na filifilia ai loa Matatia, ma “ua faitauina o ia faatasi ma le au aposetolo e toatinogafulu ma le toatasi.”—Galuega 1:6-26
O lea ua tau manatu ai nisi faapea pe a i se ā ua tusia ai e Paulo faapea na faaali Iesu i le au aposetolo e “toasefulu ma le toalua,” a e o le taimi lena ua oti a Iuta a e leʻi filifilia Matatia. I le tulaga patino lava ia, sa na o le “toasefulu ma le toatasi aposetolo“ na tofia i le amataga ma aauina atu e Iesu.—Luka 6:13-16.
E masani lava ona tautala i se vaega atoa e tusa lava pe e lē o iai le toatasi. (“Na filifili e le komiti o faatonu . . .” “Na fono le au toeaina . . .”) O lea o le faaupuga “le toasefulu ma le toalua” atonu ua saʻo lava ona faaaogā e faasino atu ai i le vaega atoa o aposetolo, e tusa lava pe sa lē iai le toatasi po o le toalua i le sauniga. (Faatusatusa le Galuega 6:1-6) Ina ua uluai faaali Iesu i le au soʻo i se potu o loo loka, “o Toma o le tasi o le toasefulu ma le toalua . . . e lei iai o ia ma i latou.” Ua mavae aso e valu ona faatasi lea o ia ma le au soʻo ma sa faaleleia ai lona masalosalo. (Ioane 20:19-29) E ui lava e leʻi tofia ai i le taimi lea Matatia e sui ia Iuta, a e ua leva lava ona avea ma soʻo. (Galuega 1:21, 22) Talu ai ona sa vavalalata lo latou au fatasi ma uluai aposetolo ma sa leʻi pine mulimuli ane na “faatauina o ia faatasi” ma i latou, a e o le faaamatalaga ua tuanai e uiga i le faaali o Iesu i le “toasefulu ma le toalua” e foliga mai sa aofia ai ma Matatia.