Fesili Mai le Au Faitau

◼ O anafea na amata ai le iligā pu a agelu e toafitu o le Faaaliga?

I le Faaaliga mataupu e 8, 9, ma le Faaaliga 11, ua tatou faitau ai e uiga i agelu e toafitu o ē na ili pu e fitu, e faalauiloa atu ai mala aupito sili ona tetele i luga o vaega o le fanau a tagata. O nei mea ua fai ma sui o le faalauiloaina atu o faamasinoga a Ieova na ua uma ona faasalalauina atu e ala i tagata o Ieova i le taimi o le iʻuga na amataina ma le mataʻina i se tauaofiaga na faia i Cedar Point i le 1922.—Tagai i le Faaaliga—Ua Latalata Lona Tumutumuga Matagofie!, (lea ua faasolosolo atu i lomiga o Le Olomatamata) mataupu e 21 e oo i le 23 ma le mataupu e 26.

O uluai iligā pu e fa ua faaalia ai le tulaga o le oti faaleagaga o le vaega o Kerisinetoma i “le lalolagi” ma “le sami,” faapea foi ma le tulaga paʻū o taʻitaʻi lotu ma Kerisinetoma i le pogisa faaleagaga.—Faaaliga 8:7-12.

Ua faaalia i talafaasolopito faapea o le faaalialia o nei mea moni i le lautele e mautinoa lava na amata a o leʻi oo i le 1922. Mo se faaaʻoaʻoga, o le lauga “Millions Now Living May Never Die (E Faitau Miliona o loo Ola Nei o le a Lē Oti),” na uluai fofogaina i le 1918 ma faasalalauina i le tamai tusi i le 1920, na taʻu atu ai le lē taulau o Kerisinetoma ma e uiga i le latalata mai o le iʻuga o lenei lalolagi. O The Golden Age o Setema 29, 1920, na faaalialia manino ai Kerisinetoma o sē e faitaaga, o sē e pepelo taufaasese, ma o lē ua taʻitaʻiseseina tagata.

O lea, aiseā ua faapea mai ai le tusi Tumutumuga o le Faaaliga o nei iligā pu e fa sa na ona amata ona iliina i le tauaofiaga i Cedar Point i le 1922? Auā o le taimi lena na amata ai ona alu atu le valaau ia “faalauiloa, faalauiloa, faalauiloa le Tupu ma le Malo,” na avatu ai se malosi sili i le galuega talaʻi. Ua faapea mai Le Olo Matamata faa-Peretania o Novema 1, 1922: “O uo . . . na latou manatu i ai faapea o le manatu autū o le tauaofiaga e faapea, o le faaeaga moni ma le tiute o le vaega faauuina o loo iai nei i le lalolagi o le faalauiloa lea o le faatasi mai o le Alii, le Tupu o tupu, ma ua i inei lona malo, ma faapea o le mea aupito sili lenei ona tāua mo i latou e faia.”

E ao foi ona matauina faapea a o folafola atu nei feau faafaamasinoga e fa i le lautele e ala i Molimau a Ieova talu mai le 1922, o i latou taitasi na maua le malosi sili mai i le talia o iʻugāfono e fa i tauaofiaga i le va o le 1922 ma le 1925. E faitau sefulu miliona kopi o nei iʻugāfono na lomia ma tufatufaina atu, sa matuā faaalialia ai ma le uigā le tulaga oti faaleagaga o Kerisinetoma.—Tagai i le tusi Tumutumuga o le Faaaliga, itulau 133, palakalafa 15.

O iligā pu mulimuli e tolu o loo aofia ai “aue.” (Faaaliga 8:13) E ese i latou mai i uluai iligā pu e fa na sa fesootai atu ma mea faapitoa na tutupu. O le iligā pu lona lima ua fesootai atu ma le tatalaina i le 1919 o tagata o le Atua mai le “to e le gata.” O lona ono ua fesootai atu ma “le ʻau tau o e ua tietie i solofanua” ma le tauiviga o le talaʻiga tele faavaomalo lena na amata i le 1922. O lona fitu ua fesootai atu i le fanau mai o le Malo o le Atua i le 1914.—Faaaliga 9:1-19; 11:15-19.

O nei mea tutupu taitasi na aumaia ai auē ia Satani ma lana lalolagi. O le tatalaina o le vaega faauuina i le 1919 mai le to e lē gata o le lē toe gaoioi na tuia ai taʻitaʻi lotu o Kerisinetoma ma faatinoina ai le matuā teena o ia e Ieova. Mai le 1922 agaʻi mai ai i aso nei, ua fasiotia ai e le ʻau tau tietie i solofanua tele Kerisinetoma, i le tulaga faaleagaga, ua faaalialia ai lona tulaga oti ma lapataia ai o ia i le faaumatiaga o loo sau. Ma ina ua mavae le fanau mai o le Malo i le 1914, na lafoina mai ai Satani mai le lagi, na faagaepuina ai faalavelave e faaumatia ai i le fanau a tagata. O le a lē pine ae aveesea e le Malo le sosaiete faaletagata e foliga mai o loo tumau ua atiina aʻe e Satani (le lalolagi), ma soloia ai le fanau a tagata fouvale (le sami) ia Amaketo.—Faaaliga 11:17–12:12; 21:1.

I le tauaofiaga i Cedar Point i le 1922, o “aue” uma e tolu sa oo ina iloatino i le lalolagi lautele. O le tauiviga o le talaʻiga i lena taimi na muai faamaninoina ai faapea o “se akerisi” ua tatalaina mai i le “to e le gata” ma le osofaiga ua faia e “le ʻau tau o e ua tietie i solofanua” ua agaʻi atu nei i luma. Ma o le valaau e faagaeeina ai ina ia faalauiloa le Tupu ma le Malo sa matuā ōgatasi lelei ma le iligā pu lona fitu. I le lomiga o Le Olo Matamata faa-Peretania o Mati 1, 1925, na faamaninoina ai faapea o mea tutupu i le 1914, 1919, ma le 1922 na valoia i le Faaaliga mataupu e 12. O se malamalamaga sili ona loloto lenei e uiga i le fanau mai o le Malo, ma sa faasalalauina atu ma le faamaoni e Molimau a Ieova. E faaopoopo atu i ai, o le folafolaina atu o lenei faamatalaga pei se mala na maua mai ai se faamalosiau sili mai ē na talia ma gauai atu i le tufatufaina atu o iʻugāfono malolosi i tauaofiaga na faia mai i le 1926 e oo i le 1928.—Tagai i le Faaaliga—Ua Latalata Lona Tumutumuga Matagofie!, itulau 147, 149, 172.

I lea, o le iliina o pu e fitu na amata i le 1922 ma agaʻi atu ai i le vaitaimi o le 1920 ma agaʻi mai ai. Talu mai lena taimi, sa felagolagomai ai ma le lē mataʻu tagata o Ieova ma agelu i le taʻuina atu i le fanau uma a tagata faapea ua oti faaleagaga Kerisinetoma, o ona taʻitaʻi lotu ua paʻūū, ma ua lē o toe umi ae faaumatia o ia ma isi vaega totoe o lenei lalolagi atoa a Satani.