Lipoti a Ē Faalauiloa le Malo

O le Tutumau ua Iu ai i le Faamanuiaga a le Atua i Malawi

O IOSEFA o se auauna faamaoni a Ieova. (Eperu 11:22) O ia foi o se tagata na mataina lona tutumau. E ui ina faalata e ona lava uso, na faatau atu faalua e avea ma pologa, ma mulimuli ane faafalepuipui ona o tuuaiga sese, ae na lei faavaivai ai Iosefa. Nai lo lea, sa ia tutumau ma le onosai i le tele o tausaga o puapuaga, i le faatalitalia ma le agamalu o faamanuiaga mai ia Ieova.—Kenese 37:23-28, 36; 39:11-20.

E faapena foi i aso nei, ua faatalitali ma le onosai Molimau a Ieova i Malawi mo faamanuiaga a le Atua. Mo le 26 tausaga, na tutumau ai nei Molimau Kerisiano i faasasaaga mai le malo, teteega matuia, ma le tele o isi faiga leaga. Ae ua tauia lo latou tutumau!

E tusa ma le 18,000 tagata talaʻi o le Malo i Malawi ina ua amata sauāga i le faaiuiuga o le 1967. Manatu i le olioli o Molimau ina ua latou iloaina sa amata le tausaga faaleauaunaga o le 1997 i se tumutumuga fou o tagata talaʻi e 38,393—ua sili i le faaluaina le fuainumera talu mai le amataga o le faasasaaga! E lē gata i lea, na sili atu ma le 117,000 le aofia na auai i Tauaofiaga Itumalo e 13 “O Avefeau o le Filemu Mai le Atua” na faia i Malawi. O le mea moni, ua faamanuiaina e Ieova lo latou faatuatua ma lo latou tutumau.

O se faataitaiga o lenei faamanuiaga o se mea na tupu i se tama talavou e igoa ia Machaka. Ina ua taliaina e Machaka se ofo ina ia suesue le Tusi Paia ma Molimau a Ieova, na matuā lē fiafia ona mātua. Na la faapea atu: “Afai e fia avea oe ma se Molimau a Ieova, e tatau la ona e alu ese ma le aiga.” Ae peitai, e lei faavaivaia o ia e taofi lana suesuega ona o lenei taufaamataʻu. O le iuga, na aveesea faamalosi ai e mātua o Machaka ona lavalava uma. Na fesoasoani atu le au uso e ala i le faatauina o nisi ona ofu. Ina ua iloa e mātua o Machaka lenei mea, na la faapea atu ia te ia: “Afai e tausia oe e le au Molimau, e tatau la ona e alu ese ma alu e nonofo ma i latou.” Ina ua uma ona faia se iloiloga ma le faaeteete o lea mataupu, na tuua ai loa e Machaka lona aiga, ma na nonofo faatasi ma se aiga Molimau i le faapotopotoga i lena vaipanoa.

Na matuā ilitata mātua o Machaka ma na filifili ai e ō ese atu mai lena vaipanoa ina ia alofia fesootaiga uma ma le au Molimau. Ma le mautinoa, na faanoanoa Machaka i lenei mea, ae na matuā faamafanafanaina o ia ina ua talatalanoa atu i ai le au uso e faatatau i le Salamo 27:10, lea o loo faapea mai: “E ui lava ina tuua aʻu e loʻu tamā ma loʻu tinā, a e talia aʻu e Ieova.”

Na iai le taimi ua oo ina toe toafilemu ai lagona o mātua o Machaka, ma na ia filifili ai e toe foi atu i lona aiga. O le mea moni, na matuā telē se aafiaga o le maumauai o le la tama i le auauna atu ia Ieova, auā ua la mananao ai foi i se suesuega faale-Tusi Paia ma Molimau a Ieova! Na la auai foi mo aso uma e tolu o le Tauaofiaga Itumalo “O Avefeau o le Filemu Mai le Atua,” lea na mulimuli ane ai uunaia i laua e faapea mai: “E moni lava, o le faalapotopotoga lenei a le Atua.”

Ioe, o teteega e mafai ona avea ma tofotofoga, ae e lē faavaivai ai avefeau faamaoni a le Atua. Latou te agaʻi i luma ma le lototele, i le iloaina faapea “o le puapuaga e tupu ai le tutumau; o le tutumau e oo atu ai i se tulaga ua talileleia mai.” (Roma 5:3, 4, NW) E mafai ona faapea mai ma le mautinoa Molimau a Ieova i Malawi, o le tutumau e iu ai i faamanuiaga a le Atua.