Na Lē Taulau se Au Faomea i Aferika i Sisifo

E PEI ONA FAAMATALAINA E EUNICE EBUH

“Na fuafuaina e tagata faomea faaauupegaina la latou osofaiga i le aso lea sa masani ona faia ai le Suesuega Tautusi a le Faapotopotoga i lo matou fale. E masani ona tatala uma faitotoa o le matou pa mo uso ma tuafāfine ma ē loto fiafia. E foliga mai na iloa lelei e le au faomea la matou masani ma le taimi o le sauniga. Sa matou iloa ma le mautinoa na latou gaoia se taavale mai se isi mea ma ō mai e faatalitali i tafatafa o le faitotoa o le matou pa i le aso ma i le taimi o le suesuega tautusi.

“O le mea na tupu, o le vaiaso lea na latou ō mai ai, o le vaiaso o le asiasiga a le ovasia matagaluega. Na i lo le faapotopoto i lo matou fale, na matou faapotopoto ai i le Maota o le Malo. Ina ua uma le sauniga, sa fai ai se fono a toeaina. E masani lava ona matou ō muamua ma tamaiti i le fale, ae ona o laʻu tane o se toeaina, na fai mai e matou te faatali atu ia te ia. Na fai mai o ia e lē umi se taimi. O lea na matou faatali ai.

“Na sosoo ai ma lo matou iloa ua lē ola le taavale. Sa lē mafai e laʻu tane ma le ovasia matagaluega ona faaleleia. Sa lē mafai foi e le inisinia na matou telefoni i ai ona faia.

“Sa savavali ai loa tamaiti i le fale. Ina ua mavae sina taimi, sa ou alu ai foi i le fale. Na ou taunuu atu pe tusa o le sefulu i le po. E leai se tasi o i matou ma tamaiti na ō atu i le fale i se taavale, semanū e manaomia ai ona tatala le faitotoa tele.

“Ina ua ou ulu i totonu o loʻu potu moe, sa ou faalogoina loa le pa leotele o se fana. Sa ou tau manatu po o le ā le mea ua tupu. Sa ou taumafai e vili atu i leoleo, ae na pe le telefoni. Sa ou nanati loa i le fogafale i lalo ma loka le faitotoa uamea e ui mai ai, ma toe nanati atu e loka le faitotoa ogatotonu. Sa ou tapeina molī. Sa fefefe laʻu fanau, o lea na ou fai atu ai ia i latou ina ia toafilemu. Sa matou tatalo faatasi mo le puipuiga a Ieova. O le taimi lena, sa iai pea laʻu tane i le Maota o le Malo o loo taumafai e faaola le taavale.

“Sa ou tilotilo atu i fafo mai le faamalama ma iloa ai se tagata o loo taatia i le auala i tua atu o le faitotoa o le pa. E foliga mai ua ō ese le au faomea, o lea na ou tuuina ai le tagata manuʻa i laʻu taavale ma nanati atu loa i le falemai. Sa avea o se tulaga lamatia, ae sa tatau ona ou faia se gaoioiga. E ui i lea, ma le faanoanoa lava, na maliu o ia i le aso na sosoo ai.

“E ui lava i lena mala, sa ono mafai ona sili atu ona leaga le tulaga o mea. O le asiasiga a le ovasia matagaluega na lē faia ai le suesuega tautusi i lo matou fale. Ona o le leaga o le taavale na lē ō atu ai lo matou aiga atoa i le taavale i lo matou fale. O laʻu tane, o lē e mautinoa semanū e puʻea e le au faomea, sa taunuu mai i le fale ua leva le po. O nei mea ma isi mea moni sa aogā mo le faasaoina o i matou i lena po.

“O Ieova o lo tatou olo malosi ma lo tatou malu. E pei lava ona fai mai le Tusi Paia: ‘Afai e le leoleo e Ieova le aai, e mataala fua o le na te leoleoina.’”—Salamo 127:1.