“Ina ia Faalauiloa ai le Suafa o Ieova”

I LE lalolagi aoao, e matuā talisapaia ai e tagata Le Olomatamata ma lona soa o le mekasini o le Ala Mai! ona o mataupu faaleagaga ma le tāua o aʻoaʻoga o loo iai. O se faamaoniga o lenei mea, na tusia talu ai nei e se tagata faitau mai Falani ia upu nei i lana tusi:

“O aʻu o se tamaʻitaʻi talavou, ou te sau mai Aferika, e leʻi lelei saʻu aʻoga. E leʻi leva tele talu ona amata ona ou faitauina a outou mekasini. Ona o le mananaia o mataupu, ua ou iloa ai le tāua o le faitau. Ona o a outou mekasini, ua faateleina ai upu ua ou iloa, ma ua mafai ai ona ou tusia se tusi e tau leai ni mea sesē.

“Ou te matuā maofa lava ona o le tele o mataupu e faatatau i mea uma lava i tagata, le lalolagi, ma Lē na Foafoaina Mea i a outou mekasini. E matuā faigofie faamatalaga o nei mataupu, ma ua faaoso ai le naunau e faitau pea lava pea i ai. E leai lava foʻi ma se isi e iai se tomai e aʻoaʻo ai tagata uma.

“Ou te maofa foʻi, pe a ou vaai atu, o nei mea uma, e lē o faia e faaauiluma ai ni pisinisi, ae tau lava ina ia faalauiloa ai le suafa o Ieova. Ua ou iloa ua outou maua le faamaoniga mai le Atua, ma ou te faafetai ai i lenei mea. Ia faaauau ona outou maua le malosi mai Lē na Foafoaina Mea ina ia mafai ai ona aʻoaʻo atu.”

O loo faaauau pea e Molimau a Ieova i le taimi nei la latou polokalame tauaʻoaʻoga faale-Tusi Paia i atunuu e 235. Ua lomia Le Olomatamata i gagana e 148, ma le Ala Mai! i gagana e 87. Ua lomia nei mekasini e lē ina ia viia ai se tagata. O fautuaga e faavae i le Tusi Paia ma faamatalaga fou o loo maua i nei mekasini, ua fuafuaina ina ia viia ai Lē na Foafoaina Mea, o lē na fetalai mai: “O aʻu o Ieova, . . . o loo aʻoaʻo iā te oe i mea e aogā.” (Isaia 48:17) Tau ina ia e maua aogā mai le faitauina e lē aunoa o le Tusi Paia, faatasi ai ma nei mekasini faale-Tusi Paia.