“Tusitusiga Aupito i Tuai o ni Mau o le Tusi Paia”

E MATAʻINA mea na maua i le 25 tausaga ua teʻa, e ni tagata Isaraelu e suʻesuʻe i toēga mea. Na latou mauaina ni tamaʻi tusi tāʻai se lua e tusia ai ni mau o le Tusi Paia, i se ana na teu ai tino o tagata oti, i le vanu o Hinoma i Ierusalema. Na tusia nei tusi tāʻai a o leʻi faaumatia Ierusalema e Papelonia i le 607 T.L.M. Na tusia ai nisi o faamanuiaga o loo i le Numera 6:24-26. O loo iai le suafa o le Atua o Ieova, i tusi tāʻai uma e lua. Ua faamatalaina nei tusi tāʻai o “ni mea e sili ona tuai na tusia e tagata mai anamuā, lea o loo iai mau o le Tusi Paia Eperu.”

Peitaʻi, na fesiligia e ni tagata popoto le tausaga na tusia ai nei tusi tāʻai, ma latou finau mai na tusia i le senituri lona lua T.L.M. O se tasi o māfuaaga na eseese ai taofi o tagata, ona na lē mafai ona matuā iloilo totoʻa nei tamaʻi tusi tāʻai, auā e leʻi manino lelei ata na puʻeina muamua. Ina ia foʻia lenei faafitauli, na fai ai e ni tagata popoto se suʻesuʻega fou. Na latou faaaogā mea puʻeata ma komepiuta faaonapōnei e maua mai ai ni ata sili ona manino. E leʻi leva ona lomia iʻuga o a latou suʻesuʻega. O ā iʻuga na maua e nei tagata popoto?

Muamua lava na faamatilatila e tagata popoto e faapea, o faamatalaga i le nofoaga na maua ai tusi tāʻai, o loo lagolago ai tausaga a o leʻi faaaunuua Isaraelu i Papelonia. O le mātauina o le anamuā o le auala na tusia ai mataʻitusi, e faamaonia ai e faasino atu i tausaga lava na, i le faaiʻuga o le senituri lona fitu T.L.M. O le manatu mulimuli, o le auala o loo sipela ai upu. Na faapea mai le taofi o tagata popoto: “O le sipelaina o upu i tusi tāʻai, e ōgatusa lea ma faamaoniga i faamatalaga i le nofoaga na maua ai, ma le anamuā o le auala na tusia ai mataʻitusi, pe a fua i tausaga o tusi tāʻai.”

O le manatu lenei e faatatau i tusi tāʻai, lea ua taʻua foʻi o tusi a Ketef Hinnom: “E mafai ona tatou faamaonia le manatu o le toʻatele o tagata popoto e faapea, o loo maua i nei tusi tāʻai, tusitusiga aupito i tuai o ni mau o le Tusi Paia.”—Bulletin of the American Schools of Oriental Research.

[Faamatalaga i Ata i le itulau 32]

Ana: Pictorial Archive (Near Eastern History) Est.; tusitusiga: Photograph © Israel Museum, Jerusalem; courtesy of Israel Antiquities Authority