‘Ua Pulunaunau Mai o Ia’

O LE faaalia o le agaga talimālō o se tū masani i atunuu i Sasaʻe. Mo se faaaʻoaʻoga, ua masani se aiga Initia a iai ni a latou malo e faafuaseʻi ona ō atu, e malilie lava e momole ae ave uma meaʻai mo a latou malo. O le masani a se tinā i Irana e faatumu lana pusa aisa i meaʻai auā tagata e asiasi faafuaseʻi atu.

E toʻatele tagata o loo taʻua i le Tusi Paia na latou faaalia le lima foaʻi. O se faaaʻoaʻoga mataʻina o Litia, atonu o ia o sē ua liliu mai i le lotu Iutaia a o nofo i Filipi, le aai autū o le itumalo o Maketonia. I se tasi o sapati, na fetaui atu ai Paulo ma lana ʻau malaga iā Litia ma nisi fafine i se vaitafe i fafo atu o Filipi. Sa tatala e Ieova le loto o Litia a o lauga ai i inā Paulo. Ma na iʻu ai ina papatiso o Litia ma lona aiga. Ona ia augani atu lea i le ʻau malaga: “Afai ua outou manatu o aʻu o lē faatuatua i le Alii, ō mai ia i loʻu fale.” Na faapea mai Luka o se tasi o le ʻau malaga a Paulo: “Ua pulunaunauina foʻi i matou e ia.”—Galuega 16:11-15.

E pei o Litia, e faaalia e Kerisiano le agaga talimālō i uso o le faatuatua, e pei o ovasia femalagaaʻi ma a latou avā. E ʻpulunaunau’ i latou e talimālō. Ma e tele ni faalaeiauga ma talanoaga faaleagaga e ati aʻe ai, e maua e i latou o faaalia le agaga talimālō. E ui o le toʻatele o Molimau a Ieova e lē tele naʻuā ni a latou tupe, ae latou te ‘tausisi pea i le alofa i tagata ese.’ (Roma 12:13; Eperu 13:2) E faamalieina i latou i le faaalia o le agalelei. E moni lava saunoaga a Iesu: “E sili le manuia [fiafia] o lē na te foaʻi atu, i lo lē na te talia mai.”—Galuega 20:35.