Ia Aʻoaʻo Lau Fanau

Na Tuua e Ioasa Ieova Ona o Aumea Leaga

O SE taimi faigatā lea i Ierusalema, le aai lea sa tū ai le malumalu o le Atua. Faatoʻā uma lava ona fasiotia le tupu o Aasaia. E matuā faigatā lava foʻi ona faaāta i le mafaufau le mea na faia e le tinā o Aasaia, o Atalia, ina ua uma ona ia fasiotia le tupu o Aasaia. Sa ia fasiotia atalii o Aasaia—o fanau a lana lava tama! Pe e te iloa le māfuaaga?—a Ina ia fai o ia ma tupu nai lo o se tasi o i latou.

Peitaʻi, sa faasaoina se tasi o atalii o Aasaia, le pepe o Ioasa, ma e leʻi iloa e Atalia lea tulaga. Pe e te fia iloa le auala na sao ai o ia?— Ia, sa iai se tuafafine o le tamā o le pepe, o lona igoa o Iosapa, sa ia faalafi Ioasa i le malumalu o le Atua. Sa mafai ona ia faia lenei gaoioiga ona o lana tane o Ieoiata, o le ositaulaga sili. O lona uiga sa la tau fai faamautinoa ua malupuipuia Ioasa.

Sa nanā Ioasa i le malumalu mo tausaga e ono. O i inā sa aʻoaʻoina ai o ia i mea uma e faatatau iā Ieova le Atua ma ana tulafono. Mulimuli ane, ina ua atoa le fitu o tausaga o Ioasa, ona faia loa lea e Ieoiata o se gaoioiga ina ia fai ai Ioasa ma tupu. Pe e te fia faalogo i le auala na fai ai e Ieoiata lenei tulaga, ma po o le ā foʻi na tupu i le tinā o le tamā o Ioasa, le masiofo leaga o Atalia?—

Sa faapotopoto faalilolilo faatasi e Ieoiata leoleo faapitoa sa iai i tupu i Ierusalema i lenā taimi. Sa ia taʻu atu iā i latou le auala na la faasaoina ai ma lana avā le atalii o le tupu o Aasaia. Ona faaali atu lea e Ieoiata o Ioasa i na leoleo, o ē na manatu o ia tonu lea e ao ona fai ma tupu. Ona faia loa lea o se fuafuaga.

Ua aumai e Ieoiata Ioasa ma faapale iā te ia. Ona “taufaipatilima lea [o tagata], ma fai atu, ‘Ia soifua le tupu.’” Sa siʻosiʻomia e leoleo ia Ioasa ina ia puipuia o ia. Ma ina ua faalogo Atalia i lenei leo o le olioli, sa ia momoʻe atu ma alaga atu e faapea ua iai se fouvalega. Peitaʻi o le faatonuga a Ieoiata, na fasiotia ai e leoleo Atalia.—2 Tupu 11:1-16.

Pe te manatu sa faaauau ona faalogo Ioasa iā Ieoiata ma fai le mea tonu?— Sa ia faia faapea seʻia oo ina maliu Ieoiata. Sa faamautinoa foʻi e Ioasa ua avatu e tagata tupe ina ia toe fausia ai le malumalu o le Atua, lea sa leʻi faia e lona tamā o Aasaia, ma le tamā o lona tamā o Ioramo. Ae seʻi o tatou vāai po o le ā le mea na tupu ina ua maliu le ositaulaga sili o Ieoiata.—2 Tupu 12:1-16.

E oo ane i le taimi lenā ua tusa ma le 40 tausaga o Ioasa. Nai lo le faaauau ona faifaimea faatasi ma tagata na auauna iā Ieova, sa faauō atu Ioasa iā i latou na tapuaʻi i atua sesē. O le taimi lenā o loo avea le atalii o Ieoiata, o Sakaria, ma ositaulaga a Ieova. O le ā sou manatu, o le ā na faia e Sakaria ina ua ia iloa mea leaga o loo faia e Ioasa?—

Na faapea atu Sakaria iā Ioasa: “Ua tuua e outou o Ieova, o le mea lea ua tuua ai outou e ia.” O na upu na matuā ita tele ai Ioasa, ma o lea na ia faatonuina ai ia fetogia Sakaria i maa ia oti. Seʻi tau ina manatu—sa faasaoina Ioasa mai i sē e fasioti tagata, ae o lea ua ia fasiotia Sakaria!—2 Nofoaiga a Tupu 24:1-3, 15-22.

Pe mafai ona e mātauina mai ni lesona tatou te aʻoaʻoina mai i lenei tala?— Ioe, e tatou te lē mananaʻo e pei o Atalia, o lē sa tumu i le inoino ma le sauā. Nai lo lea, e ao ona tatou alolofa i o tatou uso tapuaʻi faapea ma o tatou fili, e pei ona aʻoaʻo i tatou e Iesu e fai. (Mataio 5:44; Ioane 13:34, 35) Ma ia manatua, pe afai e amata ona tatou fai le mea lelei, e pei ona sa faia e Ioasa, e manaʻomia ona faaauau ona tatou faauō atu iā i latou o ē e alolofa iā Ieova, ma ē e faalaeiauina i tatou ia auauna iā te ia.

[Faaopoopoga i lalo]

Fesili:

○ Sa faapefea ona faasaoina Ioasa, ma na faasaoina mai iā te ai?

○ Sa faapefea ona avea Ioasa ma lē ua tonu ona fai ma tupu, ma o le ā le mea lelei sa ia faia?

○ Aiseā na suia ai Ioasa e avea ma tagata leaga, ma o ai na ia fasiotia?

○ O ā lesona e tatou te aʻoaʻoina mai i lenei tala faale-Tusi Paia?

[Ata i le itulau 25]

Sa faasaoina Ioasa