Po o Etena o le Uluaʻi Aiga o le Tagata?

SEʻI faapea o loo e iai i se faatoʻaga. E leai ni mea e faalavelave mai, e lē lagona se pisapisaō o taavale ma tagata. O se faatoʻaga e telē ma filemu i taimi uma. Ae e sili atu i lenā, e leai se mea e te popole ai, e lē aafia foʻi lou tino i ni maʻi po o ni tigā. E te olioli i mea mananaia o loo siʻomia ai oe.

E te fiafia e vaai atu i le felanulanuaʻi o fugālaau, le iila mai o se ālia, ma le lanu meamata eseese o laau ma mutia a o susulu mai le lā. Ua e lagona le mālū mai o le savili ma manogi mananaia e aumai ai. Ua e faalogoina le gasē o lau o laau, le tafe lemū o vai i luga o maa, le fetagisi ma le pepese o manulele ma le ūū o iniseti. Pe e te fia soifua i se nofoaga faapena?

E iai tagata i le lalolagi e talitonu na muaʻi soifua le tagata i se nofoaga faapena. E tele tausaga ua aʻoaʻoina tagata Iutaia, tagata o lotu ua taʻua o Kerisiano ma tagata Isalama e uiga i le faatoʻaga i Etena, lea na tuu e le Atua Atamu ma Eva e nonofo ai. Ua taʻua i le Tusi Paia na la ola filemu ma fiafia. Na filemu lo la va, le va ma meaola, faapea le va o i laʻua ma le Atua, o lē na tuuina mai le faamoemoe e la te ola e faavavau i lenā siʻomaga matagofie.—Kenese 2:15-24.

E iai foʻi talitonuga o tagata lotu Hinitū e uiga i se parataiso i aso anamua. E talitonu tagata lotu Puta e aliaʻe mai taʻitaʻi faaleagaga, po o ni Puta, i so o se taimi e pei ai le lalolagi o se parataiso. Ma ua aʻoaʻo e le tele o lotu i Aferika ni tala e talitutusa ma le tala iā Atamu ma Eva.

O lea, ua maua i le tele o lotu ma uputuu a tagata le manatu e uiga i se uluaʻi parataiso. Na taʻua e se tasi tusitala: “Na talitonu le toʻatele o tagata i se uluaʻi parataiso sa iai le tulaga lelei atoatoa, saʻoloto, filemu, fiafia, fau ma soloi mea na iai, e leai ni faalavelave, ni mea e tigā ai ma ni feteenaʻiga. . . . O lenei talitonuga na māfua ai ona naunau le toʻatele i le parataiso ua leiloa, ma saʻili se auala e toe maua mai ai.”

Po o nei tala ma uputuu uma na pogai mai i se faavae e tasi? Pe na taaʻina le faanaunauga o tagata ona o se mea moni na tupu? Pe sa iai moni se faatoʻaga i Etena i aso ua mavae, ma iai moni Atamu ma Eva?

Ua tauemu tagata lē talitonu i lenei manatu. I lenei taimi ua alualu i luma le malamalama faasaienisi, ua manatu tagata o na tala o ni uputuu po o ni talafatu. Ae o le mea e ofo ai, o le toʻatele o taʻitaʻi lotu e lē talitonu i le tala i le faatoʻaga i Etena. Ua latou faapea mai e leʻi iai se nofoaga faapena, ma o lenā tala o se talafaatusa, talafatu, tala faafagogo po o se faataoto.

E moni e iai faataoto o loo taʻua i le Tusi Paia. E sili ona lauiloa faataoto a Iesu. Peitaʻi ua faamatalaina i le Tusi Paia le tala e uiga i Etena, e lē o se faataoto ae o se tala moni. Pe afai e leʻi tutupu moni mea ua faamatalaina, e faapefea la ona talitonuina le Tusi Paia atoa? Seʻi o tatou iloilo le pogai ua lē talitonu ai nisi i le tala i le faatoʻaga i Etena, ma vaai pe saʻo o latou manatu. Ona talanoaina lea o le pogai e tāua tele ai lenei tala iā i tatou uma.