O ai na foafoaina le Atua?

Seʻi faaāta i lou mafaufau se tamā o loo talanoa atu i lona atalii e fitu ona tausaga. Ua faapea atu le tamā, “I aso lava ia ua leva, na faia ai e le Atua le lalolagi ma mea uma lava o iai, na ia faia le lā, le masina ma fetu.” Ua mafaufau le tamaitiiti i le tala ona ia toe faapea atu lea, “Tamā, a o ai la na faia le Atua?”

Ua tali atu le tamā, “E leai se isi na faia le Atua. Ua leva lava ona soifua mai o ia.” O lenā faamatalaga faigofie na faamalieina ai o ia. Peitaʻi, a o tuputupu aʻe, e toe mapuna aʻe foʻi lenei fesili iā te ia. E faigatā i le tamaitiiti ona malamalama pe faapefea ona iai se tasi e aunoa ma sē na faia o ia. Auā e oo lava i le vateatea e iai foʻi sē na foafoaina. Ua tau mafaufau o ia, ʻO ai la na faia le Atua?’

O le ā le tali a le Tusi Paia? E mautinoa e talitutusa ma le tali a le tamā o loo taʻua i le faataʻitaʻiga. Na tusi Mose e faapea: “Ieova e, . . . a o leʻi fanaua mai mauga, e te leʻi aumaia foʻi ma le tigā le lalolagi ma le laueleele, o oe lava o le Atua e mai i le vavau e oo i le faavavau.” (Salamo 90:1, 2) Ua faapena foʻi upu a le perofeta o Isaia: “Pe e te leʻi iloa pe faalogo foʻi? O Ieova o Lē na foafoaina tuluʻiga uma o le lalolagi, o le Atua e soifua e faavavau”! (Isaia 40:28) I se tulaga taitutusa, o loo faasino atu foʻi le tusi a Iuta i le Atua o sē “e mai i le vavau.”—Iuta 25.

O nei mau faale-Tusi Paia ua tatou iloa ai o le Atua o le “Tupu o le vavau,” e pei ona faamatalaina mai e le aposetolo o Paulo. (1 Timoteo 1:17) O lona uiga o le Atua e mai i le vavau, e tusa lava po o le ā le mamao i tua e mafai ona e mafaufau i ai, ma o le a soifua pea foʻi o ia e faavavau. (Faaaliga 1:8) O lea, o lona soifua pea e faavavau o le pogai autū lea ua avea ai o ia ma Lē e ona le malosi uma lava.

Aiseā e faigatā ai ona tatou malamalama i lenei manatu? Talu ai ona o le puupuu o le umi tatou te ola ai, ua matuā eseese ai lo tatou iloa e faatatau i le taimi pe a faatusatusa atu iā Ieova. Talu ai e soifua o ia e faavavau, ua pei ai le afe o tausaga o se aso e tasi iā te ia. (2 Peteru 3:8) Seʻi faataʻitaʻi: Faamata e mafai e se sē e 50 aso lona matua, ona malamalama i le umi tatou te ola ai lea e 70 i le 80 tausaga? E leai! Peitaʻi, ua faapea mai le Tusi Paia e pei i tatou o ni sē pe a faatusatusa atu i Lē e Sili na Foafoaina i tatou. E oo lava i lo tatou tomai e malamalama ai i mea, e matuā lē taitai ona tutusa ma le silafia o Ieova. (Isaia 40:22; 55:8, 9) O lea, e lē o se mea e faateʻia ai, le iloa e iai mea e faatatau i le tulaga o Ieova e lē mafai ona malamalama atoatoa i ai le tagata.

E ui lava e lē faigofie ona tatou malamalama o le Atua e mai le vavau e oo i le faavavau, ae ua tatou iloa le talafeagai o lenā manatu. Pe ana faapea e iai se isi na foafoaina le Atua, e taʻua la o ia o Lē na Foafoaina mea. Peitaʻi, ua faamatala mai e le Tusi Paia, o Ieova o lē na “foafoaina mea uma lava.” (Faaaliga 4:11) E lē gata i lenā, ua tatou iloa na faatoʻā faia le vateatea i se taimi mulimuli ane ai. (Kenese 1:1, 2) O ai la na faia? O lē na faia le vateatea e ao ona muaʻi iai. Na muaʻi iai o ia a o leʻi taitai iai isi foafoaga atamamai, e pei o lona Alo e toʻatasi ma ana agelu. (Iopu 38:4, 7; Kolose 1:15) Ua manino mai la, na iai lava na o ia mai le vavau. E leʻi foafoaina o ia ma e leai sē na soifua i tua atu na ono foafoaina o ia.

O lo tatou ola ma le vateatea aoao ua faamaonia ai le iai o le Atua mai le vavau e oo i le faavavau. Na tatau ona muaʻi iai Lē e faagaoioia lo tatou vateatea telē, ma faataatitiaina tulafono e pulea ai. E na o ia foʻi na mafai ona foaʻiina atu le ola i ana foafoaga faiola uma.​—Iopu 33:4.