Se Gaoioiga Agalelei a se Kerisiano
I SE tamaʻi aai i Gujarat i Initia, na papatiso ai le tamā o John e avea ma Molimau a Ieova i le 60 tausaga ua teʻa. O John ma ona uso ma tuafāfine e toʻalima faatasi ma lo latou tinā, na avea o ni Katoliko Roma mapolotu ma na tetee i talitonuga o lo latou tamā.
I se tasi aso, na faatonu ai John e lona tamā e alu e ave se teutusi i se tasi o uō a lona tamā i le faapotopotoga. Ae i le taeao lenā, na matuā lavea leaga ai le limatusi o John ina ua taumafai e tatala se kalone ʻapa. E ui i lea, na manaʻo John ia usitaʻi i lona tamā, o lea na ia fusi ai lona lima o loo toto i se ʻieʻie ma alu loa e ave le teutusi.
Ina ua taunuu atu John i le fale o le uō a lona tamā, na iai le toʻalua o le tamāloa ma o ia foʻi o se Molimau a Ieova. Ina ua tago mai le fafine e avatu le teutusi, na ia mātauina ai le lima o John o loo lavea ma ofo ane e fesoasoani atu i ai. Sa aumai e le fafine lana pusa o mea e togafiti ai manuʻa, ua ia nini le manuʻa i se vailaau ma fusi i se mea faapipii. Ina ua uma, sa ia faia se ipu tī mo John. I lenā taimi atoa, sa ia talanoa iā John i se auala faaleuō e faatatau i le Tusi Paia.
O le gaoioiga agalelei a lenei fafine, na amata ai loa ona suia uiga lē fiafia o John i Molimau a Ieova. Sa fesili atu John i le fafine e faatatau i ni mataupu se lua sa eseese ai o la talitonuga ma lona tamā. Sa fesili pe faamata o Iesu o le Atua, ma pe e tatau i Kerisiano ona tatalo atu iā Maria. Sa iloa e le fafine le gagana a John, o le faa-Gujarati, ma sa ia faaaogā le Tusi Paia e tali ai fesili a John, ma tuu atu i ai le tamaʻitusi “Lenei Tala Lelei o le Malo” i le faa-Gujarati.
Mulimuli ane, a o faitau e John le tamaʻitusi, na ia iloa ai o lea faatoʻā ia aʻoaʻoina upu moni o le Tusi Paia. Sa alu atu i le latou patele ma fai i ai ana fesili e lua ia na fai i le fafine. E leʻi umi ae ita le patele ma togi mai le Tusi Paia iā John ma avaavau mai e faapea: “O oe o Satani! Faaali mai po o fea o le Tusi Paia o fai mai ai o Iesu e lē o le Atua. Faasino mai po o fea o le Tusi Paia o fai mai ai e lē tatau ona e tapuaʻi atu iā Maria. Faasino mai!” Na matuā faateʻia John i uiga o le patele ma fai atu loa i ai, “Ou te lē toe oo mai i le lotu Katoliko,” ma e leʻi toe alu lava i ai.
Na amata ona suʻesuʻe John ma Molimau a Ieova, na ia talia le upu moni, ma auauna ai iā Ieova. Mulimuli ane, sa faia foʻi faapea e nisi o lona aiga. O loo iai pea i le taimi lenei se maʻila i le limatusi taumatau o John mai i le mea lea na lavea ai i le pe ā o le 60 tausaga ua mavae. O loo ia manatua pea se gaoioiga agalelei a le tuafafine Kerisiano, lea na uunaʻia ai o ia e faaaogā lona ola e auauna ai iā Ieova.—2 Kori. 6:4, 6.