Ia Uigā i Lau Faiva

¹ Ua pogisa le lagi, ma ua faateleina se leo paū ma le gogolo tele ua tau tutuli ai ou taliga. Ua alu aʻe se ao e pei o se asu. O le ā lena mea? O se autau e faitau miliona o sē akerise ua ō mai e matuā faaumatia le laufanua! O lenei vaaiga na faamatalaina e le perofeta o Ioelu, e iai sona faataunuuga i aso nei i le galuega talaʻi a auauna faauuina a le Atua ma a latou aumea, le motu o tagata e toatele.

² Ua taʻua i Le Olomatamata o Me 1, 1998, itulau 11, palakalafa 19, e faapea: “Ua avatu e ʻau o sē i ona po nei a le Atua se molimau maeʻaeʻa i ‘le aai’ o Kerisinetoma. (Ioe. 2:9) . . . O loo faaauau pea ona latou feaei i so o se lavelave, ulu atu i le faitau miliona o aiga, faalatalata atu i tagata i magaala, talanoa atu ia i latou i telefoni, ma faafesootaia i latou i so o se auala e mafai ai a o latou folafola atu le feau a Ieova.” Pe e lē o se faaeaga sili ea le faia o se sao i lenei galuega ua tofia mai e le Atua?

³ I le lē pei o sē akerise moni e na o le pau lava le faanaunauga o le na o le aai, ae o i tatou o auauna a Ieova, e sili atu ona tatou popole mo ola o i latou o loo tatou talaʻi atu i ai. Tatou te mananao e fesoasoani atu i isi ina ia latou aʻoaʻoina upu moni mamalu o loo i le Afioga a le Atua ma uunaia i latou ia gaoioi e faia ni laasaga o le a iu ai i lo latou faaolataga e faavavau. (Ioa. 17:3; 1 Timo. 4:16) I lea, e tatou te mananao ai ia uigā i le auala o loo tatou faatinoina ai la tatou faiva. Po o ā lava auala o loo faaaogaina i le talaʻiga, e tatau ona tatou manatunatu po o tatou faatinoina i se auala ma i se taimi o le a maua ai ni iuga e sili atu ona lelei. Talu ai “o le a mavae atu le tu o le lalolagi nei,” e lelei la mo i tatou ona iloiloina a tatou auala ma a tatou faafeiloaiga ina ia faamautinoa ua tatou faafetaiaia le lui o le avea o se tasi e fua mai i le tele e mafai ai.—1 Kori. 7:31.

⁴ A o tatou taumafai e feiloai atu i tagata i le tele o auala, ae o loo tumau pea ona avea le galuega talaʻi mai lea fale i lea fale ma vala autū o la tatou faiva. Po o e matauina e masani lava ona lē maua atu tagata i aiga po o momoe foi ina ua e asiasi atu? Pagā se lē fiafia, talu ai ua lē mafai ona e tufa atu le feau o le tala lelei ia i latou! E mafai la faapefea ona e faafetaiaia lenei luʻi?

⁵ Ia Fetuutuunai ma Magafagafa: I le uluai senituri i Isaraelu, sa faia ai e tagata faifaiva a latou fagotaga i le po. Aisea e faia ai i le po? E ui lava sa lē o se taimi aupito sili lea ona talafeagai mo i latou, ae o le taimi lea sa aupito sili ona lelei e maua ai le tele o iʻa. O le taimi lea sa aupito sili ona fua mai. I le faia o se faamatalaga e uiga i lenei faiga, ua taʻua ai i Le Olomatamata o Oketopa 15, 1992, e faapea: “E ao foi ia i tatou ona tilofaia la tatou oganuu ina ia tatou ō atu ai e fagogota, i le taimi e toatele ai tagata e maua i aiga, ma e talilelei mai.” O le matauina lelei o tulaga masani o tagata, ua faaalia ai e faapea, i le tele o nuu tu lata i le aai ma vaipanoa e nonofo ai tagata, atonu e iai tagata i aiga pe a tatou asiasi atu i ai i taeao o Aso Toonai ma Aso Sa ae e masani ona lē tali fiafia mai i la tatou feau i lena taimi. I atumotu, o le toatele o tagata mai nuu i tua e ō atu mo a latou faatauga i le taulaga i le taeao o le Aso Toonai, ae o le Aso Sa o le aso lena e pisi ai e ō i lotu, fai meaʻai a o latou aiga, ma momoe ai. Afai e te fesagaia nei tulaga i lou vaipanoa, pe mafai ona fetuunai le taimi o lau asiasiga i se taimi mulimuli ane o le taeao po o le aoauli foi po o le afiafi? O se auala lelei lenei e faateleina ai le uigā o la tatou faiva ma faaalia ai foi le magafagafa mo o tatou tuaoi, o se faailoga lea o le alofa moni faa-Kerisiano.—Mata. 7:12.

⁶ I le Filipi 4:5 (NW), o loo faamanatu mai ai ia i tatou e le aposetolo o Paulo e faapea, e tatau ona ‘iloa e tagata uma lo tatou magafagafa.’ I le ogatasi ma lenei taiala faagaeeina, e tatou te mananao ai ina ia tatou paleni ma magafagafa i a tatou auala a o tatou faatinoina ma le maelega ma le aasa lo tatou tofiga e talaʻi atu. Tatou te lē mananao e ‘taofia i tatou mai le aʻoaʻo atu i le lautele ma mai lea fale i lea fale,’ ae tatou te mananao ina ia faamautinoa e mafai ona tatou faatinoina la tatou faiva mai lea fale i lea fale i taimi e talafeagai ma fua mai ai. (Galu. 20:20) I le pei o na tagata faifaiva i Isaraelu i le uluai senituri, tatou te manatu mamafa e ‘fagogota’ i taimi e mafai ona fua tele mai ai la tatou faiva, ae lē o taimi e talafeagai mo i tatou lava.

⁷ O ā ni fetuunaiga e mafai ona faia? O le tulaga masani lava, o faatasiga mo le auaunaga i le fanua, e faia i le 8:30 po o le 9:00 i le taeao o le Aso Toonai ma le Aso Sa, po o le taimi lava e maeʻa ai le sauniga i le taeao o le Aso Sa, lea e ō saʻo atu ai loa le autalaʻi i le galuega mai lea fale i lea fale i le oganuu. Ae peitai, o nisi autoeaina ua latou fuafuaina mo le vaega ina ia auai i isi ituaiga o faiva, e pei o le molimau atu i auala, oganuu o pisinisi, po o le faia o toe asiga, a o lei ō atu mai lea fale i lea fale i vaipanoa e nonofo ai tagata. O isi faapotopotoga ua faatulaga le taimi o faatasiga mo le auaunaga i le fanua i se taimi mulimuli ane o le taeao—i le 10:00, 11:00, po o le 12:00 i le aoauli. Mulimuli ane, ona ō saʻo atu ai lea o le autalaʻi i le galuega mai lea fale i lea fale ma faaauau ai pea seia oo i le afiafi. I nisi oganuu, atonu e sili atu ona lelei le faia o le faatasiga mo le auaunaga i le fanua i le aoauli po o le latalata i le afiafi, na i lo le taeao. O fetuunaiga faapena e ono sili atu ona lelei i le faateleina ai o ni iuga lelei e maua i le galuega mai lea fale i lea fale.

⁸ Ia Faautauta ma ia Atamamai: A o tatou feiloai atu i tagata mai lea fale i lea fale, tatou te fetaiai ai ma le tele o uiga eseese e faaalia mai i la tatou feau. O nisi tagata e ona fale e fia faalogo, o isi e lē āno mai, ma e iai nisi atonu e finau mai pe fia faamisa. E tusa ai ma le tulaga o le finau mai pe fia faamisa, ua faamanatu mai ia i tatou i le itulau e 7 o le tusi, Reasoning From the Scriptures e faapea, e tatou te lē o saili atu ina ia “‘manumalo i ni finauga’ ma tagata latou te lē faaalia le faaaloalo i le upu moni.” Afai e matuā lē fiafia lē e ona le fale, e sili ona lelei lo tatou ō ese loa. E lē tatau lava ona tatou faatupuina le ita o tagata i lo tatou taumafai pea ina ia latou talanoa mai ia i tatou pe ia latou talia mai o tatou manatu. E tatou te lē fai faamalosia atu la tatou feau i tagata. O le a lē o se uiga magafagafa lena ma e ono faapogaia ai faafitauli mo isi Molimau ma le tulaga lautele foi o le galuega.

⁹ A o lei amata galueaiina se oganuu, e atamai le siakiina o le pepa o le oganuu mo ni faaaliga o ni tuatusi o fale ua uma ona taʻu mai ia i tatou e i latou o nonofo ai e aua neʻi toe asiasi atu. Afai o iai ni tuatusi faapena, e tatau ona faailoa atu i tagata talaʻi taitoatasi o le a galueaiina lena auala, ia fale e aua le ō atu i ai. E lē tatau i se tasi ona asiasi atu i na fale i lona lava loto faitalia e aunoa ma le faatonuga mai le ovasia o le auaunaga ina ia faia faapea.—Tagai i le Pusa Fesili, La Tatou Faiva o le Malo, Ianuari 1994.

¹⁰ E mafai ona faateleina lo tatou uigā i le faaalia o le faautauta a o tatou galulue mai lea fale i lea fale. Ia vaavaai lelei a o e agaʻi atu i se fale. Po o tatoso uma ie faamalama po o pola? Po ua matuā leai se leo o se mea o paʻō mai? Atonu e faailoa mai ai o loo momoe tagata e ona le fale. I atumotu, e masani lava e mafai ona e iloa atu pe afai o momoe uma i latou o i le fale. E foliga mai o le a mafai ona faia se talanoaga uigā ma lē ona le fale pe a tatou toe asiasi atu i ai i se taimi mulimuli ane. Atonu e sili ona lelei pe a faamisi le fale lena mo le taimi lea, ma ia tusia se faamaumauga. E mafai ona e toe siakiina le fale lea ae e te lei tuua le oganuu pe faamau i lalo ina ia e toe asia atu i se itula mulimuli ane.

¹¹ E ono tulai mai pea ni tulaga e tatou te ono fafagu ai ma le lei fuafuaina se tasi pe faateʻia foi o ia. Atonu e oo ai ina lē fiafia pe ita foi le tagata. O ā ni o tatou uiga e tatau ona faaalia? Ua fautua mai le Faataoto 17:27 e faapea: “O le ua agamalu foi, o le tagata faautauta lea.” E ui tatou te lē faatoese atu i le faia o la tatou faiva, ae o le mea moni e mafai ona tatou faamalie atu ona o lo tatou asiasi atu i se taimi e lē talafeagai. E mafai ona tatou fesili atu ma le faaaloalo pe talafeagai pe a toe asiasi atu i se isi taimi, ma fai i ai e te toe foi atu. O se faaupuga faamaoni i se leo mālū e faailoa atu ai lou manatu mamafa ia te ia, e masani ona faatoafilemu ai sea tagata. (Faata. 15:1) Pe afai e faailoa mai e lē ona le fale ia i tatou o ia e masani ona faigaluega i sifi po, e mafai ona faaaofia ai se faaaliga puupuu i le pepa a le oganuu ina ia mafai ai ona asia lea tagata i se taimi talafeagai i le lumanai.

¹² E talafeagai foi ona faaalia le faautauta a o tatou taumafai e galueaiina maeʻaeʻa la tatou oganuu. Talu ai o le toatele o tagata e lē maua atu i fale i la tatou uluai asiasiga, e manaomia ai ona tatou faia nisi taumafaiga ina ia faafeiloaia i latou e tufa atu i ai le feau o le faaolataga. (Roma 10:13) Ua faaalia i lipoti e faapea, i nisi taimi e asiasi soo atu ai tagata talaʻi i le fale lava lea e tasi i le aso lava e tasi ona o le taumafai ina ia maua atu ni tagata i le fale. O lenei mea, e lē mafai ona ʻasa i le mātau mai a tuaoi. E ono faatupu ai ni manatu lē manuia e faapea, ua ‘asiasi soo’ atu Molimau i lo latou auala. E mafai faapefea ona alofia lenei mea?

¹³ Ia faaaogā le faautauta. Pe a toe asiasi atu i se fale sa lei maua atu i ai se tasi, po ua iai ni faailoga ua iai se tasi i le fale i le taimi lea? Po o iai ni seevae i fafo o le faitotoa i luma? Po o matala le faitotoa i luma, po o tapuni ma faamau ai se loka? Po o lālā mai i fafo le meli mai le pusa meli? O le siakiina o nei mea, e mafai ai ona e iloa e foliga mai e lē o iai lava le tagata i le fale, ma o le a leai se iuga lelei e maua pe a toe asiasi atu foi i lena lava taimi. Pe afai e lē mafai ona maua atu le tagata ina ua uma ni nai taumafaiga e asia i taimi eseese o le aso, e pei o le afiafi po, atonu la e lelei pe a faafesootai atu lē ona le fale e ala i le telefoni. Afai e lē o iai, e mafai ona tuu ai ma le faautauta se sāvali po o se pepa valaaulia i le faitotoa, ae maise lava pe afai o se oganuu e galueaiina soo. Atonu e lelei pe a faafesootai atu le tagata i le isi taimi e galueaiina ai le oganuu.

¹⁴ E tatau ona tatou alofia talanoaga faaumiumi i le faitotoa pe afai o le a susū pe saviligia ai lē ona le fale i lea tulaga. Pe afai e valaaulia e ō atu i totonu, ia faaeteete ina ia aua neʻi soli atu le palapala i totonu o le fale. Ia faaaogā le faautauta pe a osofaia e se taifau o ou mai. Pe a galulue i fale mautotogi, ia talanoa lēmū ma aua le soona pisa e faalavelave ai i tagata o loo nonofo i le fale ma soona leotele ai le faailoa atu o lou iai i le fale.

¹⁵ Ia Maopoopo ma ia Mamalu: O le faamaopoopoina lelei e mafai ai ona tatou alofia le faia o ni faapotopotoga tetele, e iloagofie mai e tagata i le oganuu. E ono lagona e nisi tagata e ona fale le mataʻu pe a taunuu atu ni taavale se tele i luma o lo latou fale ma se autalaʻi toatele, po o se vaega toatele foi o le autalaʻi ua feosofi uma mai i lalo mai se pasi i se nofoaga e tasi o le nuu. Tatou te lē mananao e faaoo atu se lagona faapea ua tatou “solivalea” o latou alaalafaga. Pe afai e iai ni taavale a uso, o fuafuaga mo le galueaiina o le oganuu e sili atu ona lelei pe a faia i le faatasiga mo le auaunaga i le fanua. Pe afai e faimalaga atu le autalaʻi i pasi i le mea o iai le oganuu, e mafai la ona muai fuafua mo nisi ina ia amata i ni vaipanoa eseese. O ni vaega toaitiiti o se autalaʻi, e pei o se aiga, e sili atu ona lē faamataʻuina ai ē ona fale ma e itiiti ai foi ni faatulagaga e toe faia a o galueaiina le oganuu. E tāua faapitoa lava lenei fuafuaga pe a galueaiina alalafaga ina ia le mapuna aʻe ai ni teteega i la tatou galuega talaʻi.

¹⁶ O le maopoopo e manaomia ai i mātua ona vaaia lelei amioga a a latou fanau a o galulue i le oganuu. E tatau i tamaiti ona amio lelei pe a ō atu faatasi ma tagata matutua i fale. E lē tatau ona tuusaoloto tamaiti laiti e taaalo pe feoai solo, e tosina mai ai ma le lē tatau manatu o tagata e ana fale po o tagata fegasoloai.

¹⁷ E manaomia foi le paleni, pe a oo ina faia sina mapu mo se ipu ti po o se vai mālūlū. Ua taʻua i La Tatou Faiva o le Malo o Iuni 1995, itulau 3, e faapea: “Pe a tatou ō i le auaunaga i le fanua, e mafai ona leiloa le taimi tāua i le faia o ni inuga kofe. A e peitai, afai e matuā leaga le tulaga o le tau, o se malologa puupuu o le a faafouina ai ma fesoasoani ia i tatou ia faaauau pea. Peitai, ua filifilia e le toatele ina ia pisi pea i le molimau atu i tagata ma alofia ai le faatasitasi ma uso i le faia o ni inuga kofe i le taimi ua faatulagaina mo le faiva.” E ui lava o le mapu mo sina faamalositino o se filifiliga totino, ae ua matauina faapea, i nisi taimi, e faapotopoto ai ni vaega toatele o uso ma tuafāfine i se faleoloa po o se faleaiga. E lē gata i le tele o le taimi e faaalu i le tautuaina o i latou, ae o le iai o ni tagata se toatele e ono faamataʻuina ai isi tagata faatau. I nisi taimi, e talanoa leo tetele ai i mea na tutupu i le auaunaga i le fanua i le taeao, ma e mafai e lena mea ona taʻufaatauvaaina ai le mamalu o la tatou faiva ma lē maua ai ni iuga lelei. O le iai o le faautauta, e mafai ai e le autalaʻi ona alofia le soona tumutumu i se nofoaga ma faamaimau ma le lē tatau ai le taimi mo le faiva i le fanua.

¹⁸ E toatele ua tofo i iuga lelei e ala i le faafeiloai atu o tagata i so o se mea atonu o latou iai—i ala tetele, i nofoaga e paka ai taavale, ma isi lava nofoaga faitele. Tatou te mananao e avatu foi se molimau lelei iina, e lē gata i a tatou upu ae e ala foi i lo tatou magafagafa. O tagata talaʻi i faapotopotoga taitasi, e ao ona mautinoa le amanaia o tuaoi o a latou oganuu ina ia lē soona faalavelave ai i tagata fegasoloai i vaipanoa o pisinisi ma auala, po o tagata faigaluega i pisinisi, e pei o pamu penisini na e faigaluega mo le 24 itula. Ina ia faamautinoa ua faia la tatou faiva i se uiga maopoopo, ma mamalu, o le a tatou galulue ai i totonu o la tatou lava oganuu tofia, seʻi vaganā ua faia ni fuafuaga patino e ala mai i le Komiti o le Auaunaga a le isi faapotopotoga e fesoasoani atu ia i latou.—Faatusatusa i le 2 Korinito 10:13-15.

¹⁹ O nisi faapotopotoga e tele ni a latou vaipanoa e mafai ona molimau atu ai i le lautele, ua latou faatulagaina nei vaipanoa i ni oganuu. Ona avatu loa lea o le faafanua o se oganuu i se tagata talaʻi se toatasi po o se vaega. E sili atu ona faigofie ma uigā lenei faiga i le galueaiina o le oganuu ma puipuia ai mai le toatele o tagata talaʻi e galueaiina le oganuu lava lea i le taimi e tasi, i le ogatasi ma le mataupu silisili o loo i le 1 Korinito 14:40 e faapea: “Ia faia mea uma lava ma le matagofie ma le sauni lelei.”

²⁰ O o tatou foliga vaaia e ao pea ona mamalu ma avea o ni faifeau o loo tauaveina le suafa o Ieova. E faapena foi i meafaigaluega o loo tatou faaaogaina. O ato talaʻi ua masaesae ma Tusi Paia ua maanuminumi pito ma eleelea, e mafai ona lē uaʻi mai ai tagata i le feau o le Malo. Ua faapea mai se faaupuga, o laei ma teuga “o se auala vave lea e faailoa atu ai le tagata, e avatu ai i le toatele o tagata o loo siomia ai ni faamatalaga e uiga ia te oe, po o ai oe, po o le ā foi le ituaiga o tagata e iai oe, ma po o le ā foi lou tulaga i le olaga.” O lea, o o tatou foliga vaaia e lē tatau ona faatalale pe faainaelo i ai, e lē tatau foi ona soona feilafi pe soona papanu naʻuā, ae ia teu pea ia “tusa ma le tala lelei.”—Fili. 1:27; faatusatusa i le 1 Timoteo 2:9, 10.

²¹ I le 1 Korinito 9:26, ua taʻua ai e le aposetolo o Paulo e faapea: “Ua faapea ona ou momoʻe e le ma le faaletonu; ua faapea ona ou tuʻi, e le pei o se tuʻi le matagi.” I le faaaʻoaʻo ia Paulo, ua tatou maumauai ai ina ia maua se faiva uigā, ma fua mai. A o tatou faia se sao maelega i le galuega o le molimau atu e avea o se vaega o le “au o sē akerise” a Ieova i aso nei, tau ina ia tatou faaaogā le magafagafa ma le faautauta faa-Kerisiano i le faaooina atu o le feau o le faaolataga i tagata uma lava i la tatou oganuu.