O le Galuega Talaʻi ua Matuā Ese Mai ai i Tatou
1 E toʻatele tagata ua fesili mai, “O le ā le eseesega o Molimau a Ieova mai isi lotu?” O le a faapefea ona e tali atu? E mafai ona e faamatalaina nisi o o tatou talitonuga faale-Tusi Paia. Ae po o e mafaufau foʻi e faasino atu i ai le telē o le eseesega o i tatou mai isi lotu, ona o la tatou faiva i le lautele?—Mata. 24:14; 28:19, 20.
2 I aso nei, e iai lava nisi tagata mapolotu e naunau e fia tufa mai i isi o latou talitonuga faalotu. Latou te ono manatu faapea, ua lava ma totoe le usiusitaʻi i tulafono a Kaisara, le ola i se olaga mamā, pe faia galuega agalelei mo isi. Ae lē o ia i latou se lagona faapea o so latou tiute tauave le fesoasoani atu i isi ina ia aʻoaʻoina mea o fai mai ai le Tusi Paia e uiga i le mauaina o le faaolataga. Ua faapefea ona ese mai ai i tatou?
3 O la tatou faiva maelegā e matuā matilatila lava le ese mai gaoioiga a isi lotu. Ua silia i le 100 tausaga, o naunautaʻi pea Molimau i ona po nei e talaʻi atu le tala lelei i tuluʻiga uma o le lalolagi, a o latou faataʻitaʻi atu i uluaʻi Kerisiano. O lo tatou sini i le faia faapea, ina ia fesoasoani atu i ni tagata se toʻatele e mafai ai, ina ia faaōgatusa o latou olaga ma le finagalo o le Atua.—1 Timo. 2:4; 2 Pete. 3:9.
4 O le ā Lou Talaaga? Po o lauiloa ea oe o se tagata talaʻi maelegā o le Afioga a le Atua? (Galu. 17:2, 3; 18:25) Po o faigofie ona iloa e ou tuaoi le eseesega o a latou tapuaʻiga mai lau tapuaʻiga, ona o lau galuega talaʻi? Po o lauiloa oe o se tasi e tinoū e tufa atu lona faamoemoe i isi? Po o iai sau faasologa faifai pea o le auai i le faiva? Ia manatua, e mafai ona tatou faamatilatilaina atu le tū ese o i tatou lava, e lē gata i lo tatou igoa, ae i lo tatou faia foʻi o mea o loo faamatalaina e lena igoa—le molimau atu e faatatau ia Ieova i se tele e mafai ona tatou faia e tusa ai ma o tatou tulaga.—Isa. 43:10.
5 O le alofa mo le Atua ma tuaoi e uunaʻia ai i tatou e auai i le galuega talaʻi. (Mata. 22:37-39) O le pogai lena, ua tatou pei ai o Iesu ma le ʻau aposetolo, tatou te mananaʻo e faaaogā tatau avanoa uma e tufa atu ai le feʻau o le Malo i isi. Tau ina ia faaauau pea ona tatou maelegā e talaʻi atu le tala lelei ia i latou e naunau e faalogo mai. O le faia faapea o le a fesoasoani i tagata loto faamaoni ina ia latou ‘iloa e eseese . . . lē ua auauna i le Atua, ma lē ua lē auauna ia te ia.’—Mala. 3:18.