Pusa Fesili

◼ Aiseā e aogā ai mo le aofia le suʻeina o mau pe a valaaulia e le failauga e faia faapea a o faagasolo lana lauga?

O vala e pei o le mataupu o loo talanoaina ma po o aofia ai i le lauga le talanoaina o fuaiupu taʻitasi o se vaega o le Afioga a le Atua, o le a iloa ai le aofaʻi o mau e ono valaaulia le aofia e suʻeina.

E tāua le manatua e faapea, o se tasi o māfuaaga e faitauina ai mau ina ia faamautinoa o mea ia na fai mai ai e mai le Tusi Paia. (Galu. 17:11) O le isi sini, ina ia iloiloina ai faamaoniga faale-Tusi Paia e lagolagoina ai manatu o loo talanoaina, ina ia faamalosia ai le faatuatua o tagata uma. O le iloa o le mea o fai mai moni ai le Tusi Paia a o faitauina se mau autū, o le a avatu ai se faamaoniga malosi i manatu o le aofia. E faaopoopo i le suʻeina o mau, o le faia o faamaumauga ma tausisi e mulimuli atu i le faasologa o manatu o loo faaalia, e maua ai aogā.

E ui o loo taʻua i le auivi mai le Sosaiete le tele o ni mau faale-Tusi Paia i le fauina aʻe o se lauga, ae ua saunia nei mau mo le failauga, e fesoasoani ai ia te ia i ana sauniuniga. E ono maua mai i nei mau ni faamatalaga o le talaaga o se mataupu ma fesoasoani foʻi ia te ia ina ia matuā malamalama i mataupu silisili o loo iai ma ia malamalama foʻi i le fafauina aʻe o le mataupu. E filifili e le failauga po o fea mau e tāua mo le fafauina aʻe o lana lauga ma valaaulia le aofia e mulimuli mai i a latou mau faatasi ma ia a o faitauina ma faamalamalamaina na mau. O isi mau e lagolago ai le mataupu, e mafai ona taʻua ma toe faaupu, ae i na tulaga e lē tau manaʻomia ona faitau e le aofia na mau.

Pe afai e faitauina e le failauga ia mau ua filifilia, e na te faitau saʻo mai lava i le Tusi Paia, ae lē o ni pepa na lolomiina mai le komepiuta. Pe a valaaulia e le failauga le aofia e mulimuli mai i a latou tusi a o faitauina mau, e tatau ona ia taʻu manino mai le tusi o le Tusi Paia, le mataupu, ma le fuaiupu po o fuaiupu. O le mānava teisi ina ia fai atu se fesili pe e fai atu foʻi se faaopoopoga puupuu i le māfuaaga o le a faitauina ai le mau, ua ia tuu atu ai i le aofia se avanoa e suʻe ai le mau. O le toe taʻua o le mau o le a fesoasoani ai i le aofia e manatua le faasinoga. Ae peitaʻi, e lē o fautuaina atu le taʻua o le numera o le itulau, ona e eseese ia Tusi Paia o loo faaaogā e le aofia. O le suʻe o mau pe a valaaulia e faia faapea, ua fesoasoani lea i le aofia e maua aogā mai le mana o le Afioga a le Atua e pei ona faamatalaina mai a o faagasolo le lauga—Epe. 4:12.