O le Tusi Mai le Vaega Pule
A O TATOU matuā lalata atu i le oo mai o le faiga fou o mea, e matuā tāua lava ona tatou faatalitali atu iā Ieova. (Sefa. 3:8) Na taʻua e le perofeta o Tanielu e faapea: ‘O le Atua, o lē na te faaalia mea ua lilo, ma faailoa mai o mea e oo mai i aso amuli.’ (Tani. 2:28) Maʻeu se faaeaga i le ola ai i le iʻuga o lenā vaitaimi na valoia mai, ma malamalama i mea lilo ua faailoa mai e Ieova!
O loo faasolosolo ona faailoa mai e Ieova e ala i le “auauna faamaoni ma le mafaufau,” lana fuafuaga, o le aoaoina lea o se “motu o tagata e toʻatele” o tagata tapuaʻi mai atunuu uma, i nei taimi faigatā o “aso e gata ai.” (Mata. 24:45; Faaa. 7:9; 2 Timo. 3:1) O loo faamatalaina i le Isaia 2:2, 3 lenei gaoioiga o loo tupu i le lalolagi aoao i “aso e gata ai.” I tausaga taʻitasi, o loo faaauau ai pea lenei aoaoina e ui i tulaga faalētonu ma faiga sauā o loo faatumulia ai lenei lalolagi.
A o faagasolo le tausaga e 2004, sa matuā faamanatu mai iā i tatou le manaʻomia ona usitaia fetalaiga a Iesu: “Ia outou mataala . . . Ia outou nofo sauni.” (Mata. 24:42, 44) O le mea moni, o mea o loo tutupu i le lalolagi o loo iai se uiga tele mo Kerisiano o ē o loo iloa le “faailoga o tausaga” ma gaoioi e talafeagai ai. (Mata. 16:1-3) I le faataunuuga o ana Afioga, o le a faaauau pea ona faatasi Ieova ma ona tagata ua faamaopoopoina e fai lona finagalo e ui i so o se teteega e latou te fesagaʻia.
E ui lava i taumafaiga o loo faia e nisi ina ia faalavelaveina pe taofia foʻi le folafolaina atu o le Malo, ae o loo faaauau pea ona taʻutaʻu atu e uso le upu moni ma tauaofia faatasi. (Galu. 5:19, 20; Epe. 10:24, 25) I Rusia, iā Iuni i le tausaga e 2004, na lagolagoina ai e le faamasinoga o apili i Moscow se faaiʻuga a le faamasinoga maulalo ina ia faasā le galuega a Molimau a Ieova ma soloia faaletulafono la latou faalapotopotoga i Moscow. Ae peitaʻi, e lē o faavaivai ai uso; ua latou iloa le mea o loo manaʻomia e le Atua mai iā i latou, ma o loo latou anaana iā te ia o le Pule na i lo tagata. (Galu. 5:29) E matou te mautinoa o le a taʻitaʻia e Ieova ana auauna e ui i taofiofiga faalemalo o loo iai.
A o faagasolo nai tausaga ua mavae i le Malo o Georgia, na feagai ai uso ma tulaga e pei o le aveesea o a latou mea totino, pagātia i sauāga mai tagata faatupu faalavelave, ma molimauina le susunuina o a latou lomiga. Ae e leai se auupega na faatulaga e faasagatau iā i latou na taulau. (Isa. 54:17) I le tausaga faaleauaunaga e 2004, na toe aloaʻia ai faaletulafono Molimau a Ieova i totonu o Georgia. Sa faia tauaofiaga e aunoa ma se faalavelavea, ma ua saʻoloto le avatu o lomiga i totonu o le atunuu. Sa lipotia mai ni faatelega fou i tagata talaʻi ma ē na auai i le Faamanatuga.
I Armenia, Eritrea, Turkmenistan, Korea, ma Rwanda, sa faafalepuipuiina ai uso ona o lo latou faatuatua. E ui lava ina faileagaina i latou, ae na latou iloa lelei le māfuaaga faale-Tusi Paia mo o latou puapuaga, lea na fesoasoani iā i latou e tumau ai i le faamaoni a o latou vaai atu iā Ieova mo le faaolataga.—1 Pete. 1:6; 2 Pete. 2:9.
A o outou iloiloina le Lipoti o le Tausaga Faaleauaunaga o le 2004 i le Olomatamata o Fepuari 1, 2005 o le a outou olioli ai i le agalelei faaalia o Ieova. (Sala. 31:19; 65:11) E matou te faamoemoe o le a faalaeiauina outou i lenei lipoti ina ia faaauau pea ona savavali i le auala e fiafia mai ai le Atua.—1 Tesa. 4:1.
O loo faaauau pea ona faia le tele o taumafaiga ina ia oo atu ai le upu moni i so o se ituaiga o tagata. O se faataʻitaʻiga, o vitiō, DVD, ma isi mea i le gagana e faaaogā ai taga faapea ma lomiga, ua tusia i le auala e malamalama ai tagata ua pō le vaai, ua saunia e fesoasoani i le itu faaleagaga o tagata logonoa ma tagata tauaso. E tele tagata talaʻi o le Malo ua latou aʻoaʻoina gagana a tagata e faimalaga atu i o latou atunuu ma o loo nonofo i le oganuu a la latou faapotopotoga.
E lē gata i lea, ua faavaeina le faitau selau o vaega e mamao ese mai i faapotopotoga i oganuu e faigatā ona oo atu i ai. I se tasi o lālā, e silia i le 300 vaega e tumamao ese mai i faapotopotoga, lea o loo iai le silia i le 7,000 tagata talaʻi. O le mea moni, o loo faaalia ai le telē o le avanoa mo le iai o ni faapotopotoga fou! E lē gata i lea, o le 16,760,607 o tagata na iai i le Faamanatuga i lenei tausaga faaleauaunaga, e silia i 10 miliona e lē o ni Molimau. Ua matuā faaalia ai i lenei mea le ono iai o se seleselega e ao ona fai.
E tatou te faafetai ai iā Ieova mo lana faamanuiaga ma le auala agalelei o loo tausia ai i tatou mai lea aso i lea aso. (Faata. 10:22; Mala. 3:10; 1 Pete. 5:7) A o tatou agaʻi atu ma le autasi i luma i “aso amuli” lea ua tatou iai, e tatou te tuu atu lo tatou faalagolago ma le faatuatuaga iā Ieova. Po o ā lava faafitauli e tatou te fesagaʻia, ia tatou manatua pea le mau o le tausaga e 2005 e faapea: ‘O loʻu fesoasoani e mai iā Ieova lea.’ (Sala. 121:2) E matou te alolofa tele atu ma tatalo mo outou uma.
O outou uso,
Vaega Pule o Molimau a Ieova