Faasilasilaga

◼ Lomiga e ofo iā Mati: O ā Aʻoaʻoga Moni a le Tusi Paia? Ia taumafai malosi e amata ni suʻesuʻega faale-Tusi Paia. Aperila ma Me: Mekasini o le Olomatamata ma le Ala Mai! Pe a toe foʻi e asi tagata fiafia, e aofia ai ē na auai i le Faamanatuga po o isi sauniga faaleagaga, ae e lē o aufaatasi pea ma le faapotopotoga, taulaʻi atu e amata ni suʻesuʻega e faaaogā ai le tusi Aʻoaʻoga a le Tusi Paia. Iuni: O ā Aʻoaʻoga Moni a le Tusi Paia?

◼ Faasilasilaga Faapitoa: O loo iai se manaʻoga mo ni tagata talaʻi papatiso agavaa o ē e mafai ona tausia o latou lava manaʻoga tau tupe, ia pe iai foʻi so latou tomai faapitoa e fai ai se galuega, e auauna i vaipanoa o loo tele ai le manaʻoga i Samoa. O vaipanoa o loo iai le manaʻoga, o Aleipata ma Falealili i Upolu, ma Asau ma le Itu O Tane i Savaii. O i latou e fiafia i lenei avanoa e ao ona tusi atu i le Ofisa i Samoa, ma ia faaaofia ai ma se tusi mai i le Komiti o le Auaunaga a le Faapotopotoga.—Tagaʻi i le tusi Faamaopoopo itulau 111-112.

◼ Pe a talaʻi i se tagata e tautala i le gagana Saina, faaali i ai itulau o le tamaʻitusi Good News For People of All Nations, lea e iai le gagana faa-Saina (CH) ma le gagana Saina Faigofie (CHS), ina ia iloa ai po o fea le gagana e fiafia le tagata e faitau i ai. O le tulaga masani, e fiafia tagata mai Hong Kong ma Taiwan, e faitau lomiga i le gagana faa-Saina (CH), a o tagata mai i Saina, e fiafia e faitau i le gagana Saina Faigofie (CHS). A o lomiga i vitiō ma kaseti, vaai po o le ā le gagana e tautala ma malamalama lelei i ai le tagata e ona le fale. E masani lava e malamalama tagata mai Saina ma Taiwan, i le gagana Saina o le Mandarin (CHM), a o tagata mai Hong Kong, e malamalama i le gagana Saina o le Cantonese (CHC).

◼ O le a talanoaina i se Sauniga o le Auaunaga iā Aokuso, le ata vitiō Jehovah’s Witnesses—Organized to Share the Good News. Pe afai e manaʻomia, e tatau ona talosagaina nei loa ni ata vitiō e ala atu i le faapotopotoga.