Ia Faia ni Suʻesuʻega Faale-Tusi Paia e Taulau Manuia
1. O le ā le tiute tauave ua iai i tagata talaʻi o loo faia suʻesuʻega faale-Tusi Paia?
1 E leai se tasi e mafai ona auauna i le Atua seʻi vaganā ua “tosina mai o ia” e Ieova. (Ioa. 6:44) E ui i lea, e tatau i tagata talaʻi o loo faia suʻesuʻega faale-Tusi Paia, ona fai la latou vaega o le fesoasoani i tagata ina ia mafuta vavalalata atu i lo latou Tamā i le lagi. (Iako. 4:8) O lenei mea e manaʻomia ai sauniuniga. E lē lava le tau ina faitau o palakalafa ma fai fesili, ina ia fesoasoani ai i tagata aʻoga e malamalama i le feʻau ma agaʻigaʻi i luma.
2. O ā vala e tatau ona ausia ina ia maua se suʻesuʻega faale-Tusi Paia e taulau manuia?
2 Ina ia faia ni suʻesuʻega e taulau manuia, e tatau i tagata talaʻi ona fesoasoani i a latou tagata aʻoga e (1) malamalama i aʻoaʻoga a le Tusi Paia, (2) talia aʻoaʻoga a le Tusi Paia, ma (3) faatatau aʻoaʻoga a le Tusi Paia. (Ioa. 3:16; 17:3; Iako. 2:26) E tele ni masina e faaalu ina ia aʻoaʻo ai se tagata i nei vala. Peitaʻi, pe afai e faasolosolo ona ausia nei vala taʻitasi, o le a iʻu ai ina atiaʻe e le tagata se la faiā ma Ieova, ma tuuina atu iā te Ia.
3. Aiseā e fai ai e faiaʻoga tomai fesili faatupu manatu?
3 O le ā o Loo Mafaufau i ai le Tagata Aʻoga?: Ina ia iloa po o malamalama le tagata aʻoga o le Tusi Paia ma talia mea o loo ia aʻoaʻoina, ia ʻalofia le fai uma e i tatou o tala o le talanoaga, ae ia faalaeiau le tagata e faailoa mai ona manatu. (Iako. 1:19) Po o ia malamalama i manatu o le Tusi Paia e faatatau i le mataupu o loo talanoaina? Pe e mafai ona ia faamatala mai le mataupu i ana lava upu? O ā ni ona faalogona e faatatau i mea ua ia aʻoaʻoina? Pe e talitonu o ia e talafeagai aʻoaʻoga a le Tusi Paia? (1 Tesa. 2:13) Po o malamalama e tatau ona suia lona olaga e tusa ai ma mea ua ia aʻoaʻoina? (Kolo. 3:10) Ina ia iloa tali o na fesili, e ao ona tatou fai atu ma le faautauta ni fesili faatupu manatu, ona faalogologo atu lea.—Mata. 16:13-16.
4. O le ā e tatau ona fai pe a faigatā ona malamalama pe faatatau e se tagata aʻoga mea ua ia aʻoaʻoina mai i le Tusi Paia?
4 E iai masaniga ma manatu ua matuā mautū i tagata, ma e manaʻomia se taimi umi ina ia aveesea ai. (2 Kori. 10:5) Ae faapefea pe afai e lē talia pe faatatauina e lau tagata aʻoga mea ua ia aʻoaʻoina? E manaʻomia le onosaʻi ina ia faaalu se taimi talafeagai, e galue ai le Afioga a le Atua ma le agaga paia i le loto o le tagata aʻoga. (1 Kori. 3:6, 7; Epe. 4:12) Pe afai e faigatā ona malamalama pe faatatau e le tagata aʻoga se aʻoaʻoga o le Tusi Paia, nai lo o le faamalosia o ia, e lelei pe a see i le isi mataupu. Atonu e iai se taimi o le a uunaʻia ai o ia e faia ni suiga manaʻomia, a o faaauau ona tatou alolofa ma onosaʻi e aʻoaʻo o ia i le Tusi Paia.