Ua Saunia le Toetū e Ala i le Togiola

O le taimi o le Faamanatuga o se taimi lelei lea e tatou te toe manatunatu ai i faamanuiaga e pei o le toetū, lea o le a maua i le lumanaʻi ona o le togiola. E leʻi finagalo Ieova e oti le tagata. O le māfuaaga lea ua avea ai le oti, o se tasi o faalogona e sili ona tigā ma matuitui pe afai e maliu sē e pele iā i tatou. (1Ko 15:26) Sa tigā le finagalo o Iesu ina ua vaai atu o mafatia ona soo i le maliu o Lasalo. (Ioa 11:33-35) Talu ai o Iesu e na te faaataina atoatoa mai uiga o lona Tamā, e mautinoa foʻi la o loo tigā le finagalo o Ieova pe a silasila mai o tatou mafatia ona o le maliu o sē e pele. (Ioa 14:7) E matuā tulimataʻia ma le naunau e Ieova le taimi o le a ia toe faatutūina mai ai ana auauna ua maliliu, ma e tatau foʻi ona faapena o tatou faalogona.—Iop 14:14, 15.

Talu ai o Ieova o le Atua e fai mea maopoopo, e tatou te mautinoa la o le a ia faatinoina le toetū i se auala maopoopo. (1Ko 14:33, 40) Nai lo o le auai i sauniga o maliu, atonu o le a tatou auai i ni sauniga e faafeiloaʻi ai i latou o le a toe faatutūina mai. Pe e te manatunatu loloto i le toetū, aemaise lava i taimi e te mafatia ai? (2Ko 4:17, 18) Pe e te faafetai iā Ieova mo le saunia mai o le togiola, ma lona faailoaina mai i le Tusi Paia e mafai ona toetutū mai ē ua maliliu?—Ko 3:15.

• O ai au uō po o tauaiga e sili ona e naunau e te toe fia vaai i ai?

• O ai le tagata o le Tusi Paia e sili ona e fia feiloaʻi ma talanoa i ai?