Fesili Mai le ʻAufaitau
I le Salamo 12:7, pe e faasino atu le faaupuga “e te leoleoina i latou” i “ē ua mafatia” (fuaiupu 5) po o “afioga a Ieova” (fuaiupu 6)?
O faamatalaga o loo siʻomia ai lenei fuaiupu e foliga mai ai e faasino atu i tagata.
O loo faapea mai le Salamo 12:1-4, “ua mavae atu ē faamaoni mai i tagata.” Peitaʻi, ia mātau manatu o loo taʻua i le Salamo 12:5-7.
“ʻOna ua faileagaina ē ua mafatia,
Ona o le mapuitigā foʻi o ē ua matitiva,
O le a ou tulaʻi ai nei,’ ua fetalai mai ai Ieova.
ʻO le a ou faasaoina i latou mai i ē e faatauemu iā i latou.’
O afioga a Ieova e mamā ia;
E pei o le siliva ua faamamāina i le ogaumu, e faafitu ona faamamāina.
O oe Ieova e, e te leoleoina i latou;
E te puipuia i latou taʻitoʻatasi mai i lenei tupulaga e oo i le faavavau.”
O loo taʻua i le fuaiupu e 5, o le a faasaoina e le Atua “ē ua mafatia.”
O loo taʻua foʻi i le fuaiupu e 6, “o afioga a Ieova e mamā ia; e pei o le siliva ua faamamāina.” O manatu foʻi na o Kerisiano faamaoni e faatatau i afioga a le Atua.—Sala. 18:30; 119:140.
Peitaʻi, seʻi mātau le manatu o loo taʻua i le Salamo 12:7: “O oe Ieova e, e te leoleoina i latou; e te puipuia i latou taʻitoʻatasi mai i lenei tupulaga e oo i le faavavau.” O ai o loo faasino i ai le upu “latou”?
I le fuaiupu e 6, o loo taʻua ai “afioga a Ieova.” E ono manatu la nisi e faasino atu le upu “latou” i afioga a Ieova. Ua tatou iloa na faasao e Ieova lana afioga tusia le Tusi Paia, e ui i taumafaiga a ē tetee e faasā ma faaleagaina.—Isa. 40:8; 1 Pete. 1:25.
Ua tatou iloa foʻi e tusa ai ma le fuaiupu e 5, e fesoasoani Ieova i “ē ua mafatia,” ma o le a faaauau ona ia fesoasoani i ʻē ua faileagaina.’—Iopu 36:15; Sala. 6:4; 31:1, 2; 54:7; 145:20.
O lea, o ai e faasino i ai le upu “latou” i le fuaiupu e 7?
I le iloiloina o lenei salamo, ua manino ai o le upu “latou” e faasino i tagata.
O loo taʻua i le Salamo 12:1, 2 le pelogia o “ē faamaoni” e tagata amioleaga. I le fuaiupu e sosoo ai, o loo taʻua ai le tulaʻi o Ieova e vavaeese laugutu faaʻoleʻole uma. Ua faamautinoa mai i lenei salamo, e mafai ona tatou maufaatuatuaina le Atua e gaoioi mo ona tagata, ona e mamā ana afioga.
O lea, i le fuaiupu e 7, o loo taʻua ai o le a leoleoina ma puipuia e Ieova i “latou,” po o ē ua mafatia ona o tagata amioleaga.
O le upu “latou,” o loo faaaogā i le faaliliuga faa-Eperu a le ʻau Masoreta. I le faaliliuga faa-Eleni e taʻua o le Septuagint, e faalua ona taʻua i le fuaiupu e 7 le upu “tatou,” lea e toe faasino atu i ē ua mafatia ma faileagaina. O loo taʻua i le fuaiupu e 7 o le a puipuia tagata faamaoni “taʻitoʻatasi mai i lenei tupulaga,” po o i latou e faasilisilia le amioleaga. (Sala. 12:7, 8, NWT) I le fuaiupu e 7 o le faaliliuga o le Aramaic Targums: “O oe le ALII E, e te puipuia le tagata amiotonu, e te leoleoina i latou mai lenei tupulaga amioleaga e oo i le faavavau.” Ua faamaonia atili mai i nei faaliliuga, e lē o faasino atu le Salamo 12:7 i afioga a le Atua.
O lea, ua faamamafa mai i le fuaiupu e 7 se faamoemoe mo “ē faamaoni,” e lē tuulafoaʻia e Ieova i latou.