O Faapefea Mai Ou Uiga Faaalia i le Telefoni?
“E pito atu i le mafana faaleaiga, le soifua maloloina, ma le naunau i galuega, pe e iai ea se mea e sili ona saosaolaumea i le fiafia o le olaga, le faatumauina ma le siitiaina o lo tatou tulaga, nai lo talanoaga e faia ma le agalelei?”
INA ua fesiligia i lena fesili, na faatāuaina tele e le tusitala Amerika ua maliu ma o lē sa faiaʻoga o Lucy Elliot Keeler le lotomalie totino ma le taulau e mafai ona maua mai i le fetufaai o fesootaiga i faamatalaga, o se tomai na tuu atu ma le alofa i le tagata i le taimi na foafoaina ai o ia.—Esoto 4:11, 12.
I le 120 tausaga ua tuanai atu, e telē se sao ua faia e Alexander Graham Bell i le faalautele atu o le mamao o le talanoa a le tagata i lona uluai faia lea o le telefoni. I aso nei, mo le faitau piliona o loo aināina le lalolagi, ua avea le telefoni o se fesootaiga aogā i le va o tagata, pe mo le faaaogaina faapisinisi pe mo ni talanoaga fiafia faasamasamanoa.
Le Telefoni ma Oe
O le ā le tele o faaleleia ai lou soifuaga i le faaaogaina o le telefoni? Pe e te lē ioe ea o lau tali i lena fesili e faalagolago tele i tagata o loo aafia ai nai lo le telefoni lava ia? E mautinoa la, ua talafeagai lo tatou fesiligia o le fesili lenei, O faapefea mai ou uiga faaalia i le telefoni?
O uiga faaalia i le telefoni e aofia ai vala e pei o le uaʻi atu faalemafaufau, le tulaga o le tautala, ma le tomai e faalogo ai. E tāua tele foi le auala o faaaogaina ai le telefoni ma ala e faafoeina ai telefoni e faasoesa mai.
Manatu Mamafa i le Amanaiaina o Isi
E pei lava ona moni i so o se feutagaina faaletagata, e faalagolago le lelei o uiga faaalia i le telefoni i le manatu alofa i isi. Na tusi mai le aposetolo o Paulo: “Ia vaavaai i mea e taufai fiafia uma i ai ma le isi, ae lē na o mea e te fiafia oe lava i ai.”—Filipi 2:4, The New English Bible.
Ina ua fesiligia le fesili, “O le ā se mea ua e iloa ua avea ma faataitaiga masani o uiga lē lelei i le faaaogaina o le telefoni?,” na tali mai se tasi o talitelefoni ua iai le poto masani e galue i le mea e fetaulai i ai telefoni, fai mai a ia e maualuga i lana lisi le “tagata e telefoni mai ma faapea mai, ‘o Mele lenei’ (E fia ni Mele e te iloa?), a lē o lena foi, ua sili atu ona leaga le na ona faapea mai, ‘O aʻu lenei,’ ia po o le faapea mai foi, ‘Mate mai po o ai lea.’” O faafeiloaiga tuulafoai faapena, atonu o loo faia ma le loto mamā ae mafai ona tupu ai le masiasi ma le lē lavā onosai. Na faaauau mai le faamatalaga a le talitelefoni: “O le auala sili ona lelei o le amata mai o le telefoni i le faamanino mai po o ai oe ma e sili foi ona lelei, e faaalia ai lou magafagafa i lē o loo e vili atu i ai, fesili i ai pe o talafeagai ona fai se talanoaga?”
Manatua, e ui lava e lē o iloa atu ou foliga vaaia, e faigofie ona iloa atu ou uiga. E faapefea? E ala i le tulaga o lou leo. O le lē onosai, lē fia talanoa, ita, lē manatu mamafa, naunau faamaoni, sagisagi fiafia, fia fesoasoani, ma le mafana—e faaalia uma atu lava na uiga. E moni, o le lē fiafia o se uiga e masani ona faaalia pe a faalavelave mai se tasi i le telefoni. Ae ina ia tausisia uiga lelei, i tulaga faapenei taumafai e toʻa lelei ma faaali atu i lau tali lou leo “ataata.” E mafai lava ona e lē fiafia e aunoa ma le faaaogaina o le leo lē fiafia.
O le tuufaatasiga o le manatunatu mamafa i le amanaiaina o isi atoa ma le leo tauagafau o le a fai atu ai ni “upu lelei e ati ae ai” ma ni faamatalaga e “tupu ai le lelei i e faalogologo i ai.”—Efeso 4:29.
Tulaga o le Tautala
Ioe, e tāua tele le ituaiga o faamatalaga tatou te faaaogaina. Pe e te ioe ma mulimuli i taʻiala o loo taʻua i lalo? Tautala e pei lava ona masani ai, ia manino, ma malamalama. Aua le tautala faaseganui. Aua le avaavau—e tusa lava po o telefoni i atunuu mamao. Aua le faamotumotuina au upu. Alofia le talanoa augata e motumotu ai po o le misi atoa le faaleoina o au silapela; ia alofia foi “upu e lē manino” ma le tautala fefoifoiai, e tupu ai le lē mautonu ma le ita. Aua le tautala faatosotosololoa. Ia faamamafa saʻo le uiga ma fesuisuiai le leo e uigā ai le tautala, ma faafouina ai. Ia teu foi i manatu, o le ʻai a o talanoa i le telefoni e lē faaleleia ai le tulaga o le tautala pe faaali atu ai ni uiga lelei.
E tāua foi ona manatunatu i upu e te faaaogā. E manaomia le uta mamao. Faaaogā upu faigofie, ma manino e malamalama gofie. E iai uiga o upu. E mafai ona agalelei po o le sauā, e mālū po o le matuiā, faalaeiau po o le faalotovaivai ai. E lē gata i lena, e mafai e se tasi ona fia mālie e aunoa ma le faatiga ai o le isi, tautala saʻo e aunoa ma le ita ai o le isi, uta mamao e aunoa ma le faatiga atu. O faaupuga faaaloalo e pei o le “faamolemole” ma le “faafetai lava” e talia i taimi uma. O upu e agaalofa, e manatunatu i isi, ma logo lelei sa i le manatu o le aposetolo o Paulo ina ua ia tusi mai: “Ia le aunoa a outou upu ma le alofa, ia faamāi i le masima, ia iloa e outou ona fai faatatau se tali i tagata e taitoatasi uma.”—Kolose 4:6.
Ia Avea ma Sē e Faalogologo Lelei
E iai se tala e faatatau i se alii talavou o lē na fesili atu i lona tamā e taʻu atu ia te ia le ki i le mauaina o se talanoaga sologa lelei. “Faalogo mai, loʻu atalii e,” o le tali mai lena a le toeaina. “O lea ou te faalogo atu,” sa tali mai ai le talavou. “Faamatala mai atili nisi mea.” “E leai se isi mea e toe faamatala atu o le ki lena o le faalogologo lelei,” sa tali mai ai le tamā. O le mea moni, o le avea ma sē e faalogologo mai ma le naunau moni, ma manatu mamafa mai o se mea tāua tele i le mauaina o uiga lelei faaalia i le telefoni.
O le lē taulau ona amanaiaina o se taʻiala faigofie e mafai ona iu ai i le lē fia talanoa o se tasi ia te oe i le telefoni. O le ā le taʻiala? Aua e te fao uma le talanoaga. Aua e te taamilomilo i le mea e tasi, mo se faataitaiga, o lea tala ma lea tala e faamatala ai se mea faatauvaa lava na tupu ia po o se faamatalaga umi lava e faamatala ai sina faaletonu laititi lava o le soifua maloloina. I lenei tulaga, o loo iai se tulafono manino a le Tusi Paia, tatou te ono faatatauina, o le faamatalaga lenei a le soo o Iakopo. “Ia taitasi le tagata ma faataalise ona faalogologo, ia faagesegese ona tautala atu.”—Iakopo 1:19.
O Mea Mulimuli e Manatunatu i Ai
Seʻi o tatou uaʻi atu nei loa la i fesili mulimuli e lua o loo aofia ai i uiga faaalia i le telefoni. O le ā e ono fai atu ai i le auala o loo faaaogā ai telefoni? Pe e iai ni taʻiala e ono fautuaina mo le taulimaina o telefoni e tatou te lē fia talia?
A o e talanoa i le telefoni, pe e te mātauina le leo i le isi itu e fai ma tau lē lagona atu? E tatau ona faamanatu atu e lenei mea ia te oe ia e tautala saʻo i le telefoni, fua le va pe inisi mai lou fofoga. E faaopoopo atu i lena, o le magafagafa foi le pulea o le pisa po o le paʻō i tafatafa o le mea o fai ai lau telefoni. Pe a fai sau telefoni, vili ma le faaeteete ina ia alofia ai le vili o le numera sese; ma pe a uma lau telefoni, tuu atu ma le faaeteete le vaega o le telefoni sa e tautala ai i luga o le telefoni.
Pe ua e taliina ea se telefoni e faatiga ma faasoesa mai ia te oe? E faanoanoa, ona ua mātauina le faateleina o na ituaiga telefoni. O telefoni e lē logo lelei, taufaaosooso i amioga lē mamā, pe faaaogaina gagana masoā e tasi lava le tali e fetaui i ai—faagata le talanoaga. (Faatusatusa i le Efeso 5:3, 4.) O le mea foi lena e tatau ona fai pe a musu le tagata o loo vili mai e taʻu mai po o ai ia. Afai e te masalosalo po o ai o telefoni mai, ua fautua mai le tusi How to Write and Speak e faapea “aua e te tali atu pe a fesili mai se leo ese, ‘O ai lea e tautala?’” ma e lē tatau ona lua talanoaina ma se tagata ese au fuafuaga.
Maeu le lelei i le iloa e faapea o le tulaga tonu lava ia e tatau ona iai, e lē tau manaomia ai se lisi umi o ni tulafono ma ni faatulagaga ina ia faatinoina ai uiga lelei i le telefoni! E pei lava ona iai i feutagaina uma o loo faia e tagata, e maua faiā mafana ma tauia i le faatatauina o le mea o loo masani ona taʻua o le Tulafono Faaauro. Na fetalai mai Iesu Keriso: “O mea uma foi tou te loto i ai ia faia e tagata ia te outou, ia faapea lava ona outou faia ia te i latou.” (Mataio 7:12) Mo se Kerisiano, o loo iai foi ma le faanaunauga e faafiafia Lē na ia tuuina i le tagata le meaalofa o le tautala. Na tatalo le faisalamo: “Ia mālie foi ia te oe upu a loʻu gutu, ma mafaufauga o loʻu loto, Ieova e, loʻu papa ma le na te togiolaina aʻu.”—Salamo 19:14.