Ua Toe Pipisi le Fatafata Vaivai!
TALU mai vaitausaga e amata mai le 1950, na faaitiitia ai le aofaiga o ē na maua i le fatafata vaivai (TB) i le Iunaite Setete i le tusa ma le 5 pasene i tausaga taitasi. Ae peitai, talu mai le 1985, ua iai se faatelega e 18 pasene na lipotia mai ua aafia i le fatafata vaivai. Ae ua sili atu foi ona faapopoleina ona o le iai o se isi ituaiga fou o lea lava faamaʻi e lē o mafai ona iai sona togafitiga tau i vailaau. Ua iai nei se faatatauga e tolu miliona tagata ua maliliu i le fatafata vaivai i tausaga taitasi. Aisea ua lē taulau ai tauiviga ina ia togafitia le fatafata vaivai?
O se tasi o mafuaaga ona o le toatele o gasegase e faatamala i le inuina o a latou fualaau mo le vaitaimi o loo manaomia ai—e masani e ono i le iva masina. O se faaaoaoga, i le aai o Niu Ioka, na faaalia ai i se tasi o suesuega e faapea e 89 pasene o se vaega o ni gasegase e 200 sa aafia i le TB na lē maeʻa lelei ona fai o latou togafitiga. Ua faapea mai Dr. Lee Reichman o le peresitene o le American Lung Association: “E matautia tele lena mea, auā o na tagata o le a oo ina (a) lē manuia, ma (e) atonu o le a oo ina latou maua ai i le TB lea e lē o aogā i ai fualaau ia e masani ona faaaogā.” Ae o nei tagata ua feaveaia le TB e mafai ona latou faaaafiaina soifua maloloina o isi e ese mai i o latou lava soifua maloloina. Ua faapea mai atili Dr. Reichman: “Ona o le lē inumia o a latou fualaau, e mafai ai ona aafia isi tagata ia i latou.” E mautinoa o se tasi lenei o mafuaaga ua faaopoopo atu i se faatatauga e valu miliona o tagata fou ua aafia i le lalolagi aoao i tausaga taitasi.
Ua iloa lelei e tagata aʻoga o le Tusi Paia, o ‘faamaʻi i lea mea ma lea mea’ o se vala lea o le faailoga e iloa ai o loo tatou ola nei i “aso e gata ai” o lenei faiga o mea. (Luka 21:11; 2 Timoteo 3:1) O le ā o le a sosoo mai ai? O se lalolagi fou, lea “e le fai mai foi se tasi ua mau ai, Ou te maʻi.” (Isaia 33:24) Ioe, ua folafola mai e Ieova le Atua, e lē o se mapusaga mo sina vaitaimi, ae o le saʻolotoga e faavavau mai i le maʻi ma le oti.—Faaaliga 21:1-4.