ʻAlofia le Mailei o le Taalo i Taaloga Faitupe

“E leʻi afāina loʻu soifua mālōlōina i le taalo i taaloga faitupe, ma ou te fuafua lava le telē o le tupe ou te faaaluina i taaloga faitupe. Peitaʻi, ou te taʻutino atu, i taimi uma lava ou te taalo ai i le loto, ou te filifilia lava le numera lea ou te manatu i ai o aʻu numera laki.”— Lina.

O LE toʻatele o tagata e taaalo i taaloga faitupe, e iā i latou le talitonuga i numera laki po o mana faamaneta. Atonu e latou te lē o manatu faapea, o loo latou manatu mamafa i o latou talitonuga faataulāitu, ae atonu o loo latou faaauau pea ona fai.

O nisi o tagata e taaalo i taaloga faitupe e tatalo i le Atua e fesoasoani iā i latou ia manumalo i a latou taaloga. Peitaʻi, o loo taʻusalaina i le Tusi Paia i latou o loo faapea mai e tapuaʻi iā te ia ae o loo “laulau le ʻai mo Kato (le atua o le Laki).” (Isaia 65:11) Ioe, e inosia e le Atua faiga e lagolagoina ai talitonuga faataulāitu i le laki. O le tulaga lava latou o le taalo i taaloga faitupe, e uunaʻia ai le faalagolago lē malamalama atu i lē ua taʻua o le Tamaʻitaʻi o le Laki.

O le taaalo i taaloga faitupe e uunaʻia ai ma le malosi le manaʻo i tupe. Ua leai se manatu mamafa o tagata i aso nei i mea faaleagaga, ua suitulaga le tupe e avea ma atua, ma o le taalo i taaloga faitupe o se auala lea ua masani ona tapuaʻia ai tupe. I olaga o tagata, ua suia e kasino tetele ia falesā mo tapuaʻiga, ma o manatu fou ua iai e lelei le matapeʻapeʻa. Ua mauaina e tagata suʻesuʻe e faapea, o le toʻatele o tagata o loo ō atu i kasino ua faapea mai, e lē o ō atu ina ia fiafia po o le siʻomaga foʻi o loo iai, ae ia manumalo i “se tupe telē.” Peitaʻi, ua lapataʻi mai le Tusi Paia e faapea: “O le manaʻo i tupe, o le pogai lea o mea leaga uma lava; ua mananaʻo tele i ai nisi, ona sesē ai lava lea o i latou i le faatuatua, ua tuia ai ua ati i latou e i latou i puapuaga e tele.”—1 Timoteo 6:10, LF.

I le 1 Korinito 6:9, 10, ua taʻua manino ai i le Tusi Paia e faapea: “Aua neʻi faasesēina outou; . . . o ē ifo i tupua . . . ma ē matapeʻapeʻa . . . e lē fai mo latou tofi le malo o le Atua.” O le matapeʻapeʻa ua lē na o se maʻi leaga i tagata; o se maʻi e mafai ona oti ai faaleagaga, ae e iai sona vaifofō.

Ua Latou Maua se Malosi e Suia Ai

“E tele taimi sa ou taumafai ai e taofia le taalo i taaloga faitupe,” o le faamatalaga lenā a Kazushige, e pei ona taʻua i le mataupu muamua. “Sa ou iloa o loʻu taalo i taaloga faitupe ma aʻu uō i malae tutuu na iai sona aafiaga i loʻu aiga. E masani lava ona toe maumau atu so o se tupe ou te manumalo ai. Na oo lava ina maumau atu ai ma tupe na teuina e laʻu avā pe a fanau mai loʻu atalii lona lua, ma sa oo lava ina amata ona ou taaalo i tupe a le kamupani sa ou faigaluega ai. O le iʻuga, sa matuā mou atu loʻu faaaloalogia o aʻu lava. Na masani lava ona tagi laʻu avā ma talosaga mai iā te aʻu e tuu loʻu taalo i taaloga faitupe, ae peitaʻi na lē mafai ona tuua.”

Ona amata lea ona suʻesuʻe e Kazushige le Tusi Paia ma Molimau a Ieova. Ua ia faapea mai: “O le tele o loʻu faitauina o le Tusi Paia, o le tele foʻi lenā o loʻu mautinoa o loo iai se Atua ma o le a ou maua aogā e ala i le faalogo atu iā te ia. Sa ou maumauaʻi faapea o le malosi e aumaia e le Atua, o le a mafai ai ona ou lafoaʻia le taaalo i taaloga faitupe. Ou te lē talitonu, ua lē gata ina ou tuua le taalo i taaloga faitupe, ae ua ou ʻinoʻino foʻi i ai. I le taimi nei pe a ou toe mafaufau i mafatiaga na aumaia e aʻu taaloga faitupe i loʻu aiga, e tigā ai lava loʻu loto. Maʻeu loʻu faafetaia o Ieova le Atua ona ua ia fesoasoani iā te aʻu e lafoaʻia le taalo i taaloga faitupe ma ua ia fesoasoani mai foʻi ina ia ou ola i se olaga lelei!”—Eperu 4:12.

O Ioane e pei ona taʻua i le mataupu amata, na faapena foʻi ona suʻesuʻeina le Tusi Paia. Na ia taʻua e faapea: “O loʻu suʻesuʻeina o le Tusi Paia ua fesoasoani iā te aʻu e toe iloilo ai loʻu tulaga o iai. O le taimi muamua lea ua matuā pupula ai oʻu mata i le leaga ua faapogaia e taaloga faitupe iā te aʻu ma loʻu aiga. Na oo ina ou malamalama faapea e faaauilumaina e taaloga faitupe le manatu faapito ma le matapeʻapeʻa i tagata, o uiga ia e inosia e Ieova. A o faaauau laʻu suʻesuʻega, o loʻu alofa mo Ieova na mafai ai ona ou maua le malosi e tuu ai le taalo i taaloga faitupe. Na amata ona ou taalo i taaloga faitupe ona sa ou moomoo e mauaina ai se olaga e sili ona lelei. O lea la ua ou lē toe taalo i taaloga faitupe ma o loo oʻu auauna nei ma le fiafia iā Ieova, lea ua faataunuuina ai lenā moomooga.”

Sa filifili foʻi le avā a Ioane o Lina, e tuu le taalo i taaloga faitupe. Na ia faapea mai: “Sa lē faigofie, ae ina ua amata ona ma suʻesuʻeina ma laʻu tane le Tusi Paia ma Molimau a Ieova, sa ou aʻoaʻoina ai le taulaʻi atu i mea e sili ona tāua i le olaga. Sa ou aʻoaʻoina ai e lē gata ina ou fiafia i mea e fiafia i ai le Atua ae ia ʻinoʻino foʻi i mea e inosia e ia, e aofia ai ituaiga uma o matapeʻapeʻa. Ua lē gata ina faamalieina i se olaga o loo iai se faamoemoe, ae ua sili atu ona tele tupe i laʻu ato tupe.”—Salamo 97:10.

E ala i le atiina aʻe o se faiā ma Ieova le Atua, o le a e mafaia ai foʻi ona maua le malosi ma le atamai e ʻalofia ai le mailei o le taalo i taaloga faitupe. O le faia faapea, o le a faaleleia ai lou tulaga tautupe, taufaalogona, ma le mālōlōina faaleagaga. O le a oo ai iā te oe le fiafia i le iloaina o le moni o upu o loo faamauina i le Faataoto 10:22: “O le faamanuia a Ieova, o lea e faatamaoaiga aʻi; na te lē faaopoopo i ai se tigā.”

[Faamatalaga faaopoopo i le itulau 11]

O le matapeʻapeʻa ua lē na o se maʻi leaga i tagata; o se maʻi e mafai ona oti ai faaleagaga

[Pusa/Ata i le itulau 9]

Taaloga Faitupe ma le Malosi e Sili Atu i Tagata

I se lipoti i le National Gambling Impact Study Commission, na faasino tuusaʻo atu ai e tagata suʻesuʻe i le Iunivesite o Duke se sootaga i le auala e faasalalauina ai taaloga faitupe ma le talitonuga i le malosi lea e sili atu i tagata. Ua taʻua i le lipoti e faapea: “O le tele o faasalalauga o loto e taulaʻi atu i oloa ma meafaitino . . . Peitaʻi e lē o le matapeʻapeʻa i le mauaina o le tamaoaiga lea e māfua ai ona faigaluega mamafa, ae o le faamoemoe atu i se malosi e sili atu i le malosi faaletagata e faia mea e latou te mananaʻo i ai, lea e faavae mai ai faamoemoega, moomooga ma talitonuga. E iloa lelei e so o se tagata o loo pulea le faiga o loto, o le toʻatele o ana tagata e faatauina pepa loto e faavae a latou peti i talitonuga i aitu, siata vāai fetu, tagata e faia valovaloga, ma ‘tusi o miti’ o loo lisiina ai numera e fetaui atu i igoa, aso, ma miti. Na i lo le faamamafaina faapea e mafai lava ona filifilia o so o se numera, ma o le faaaogāina o numera iloga o le a faaitiitia ai se tupe o loo faatalitalia e le tagata mai lana peti, ae ua faalaeiauina e faalapotopotoga o loo faatulagaina ia taaloga e filifili (ma tausisi pea) i numera o loo iai a le tagata lava ia.”

[Ata i le itulau 10]

“O loʻu alofa mo Ieova na mafai ai ona ou maua le malosi e tuu ai le taalo i taaloga faitupe.”—Ioane

“Ua lē gata ina faamalieina i se olaga o loo iai se faamoemoe, ae ua sili atu ona tele tupe i laʻu ato tupe.”—Lina

[Ata i le itulau 10]

“Ou te lē talitonu, ua lē gata ina ou tuua le taalo i taaloga faitupe ae ua ou ʻinoʻino foʻi i ai.”—Kazushige