Talitonuga o Isi

Hinitū

E manatu tagata Hinitū o mafatiaga, o iʻuga ia o gaoioiga a tagata na faia i le taimi nei, po o le olaga na i ai muamua. E mafai e se tagata ona ʻalofia le toe fanau mai i se isi tino pe a oti (moksha), e ala i le ola i se olaga e faafitia uma ai ona lava manaʻoga.

Musalimi

E manatu tagata Musalimi o mafatiaga, o se faasalaga mo agasala ma o se tofotofoga foʻi o le faatuatua. Ua faapea mai Dr. Sayyid Syeed, o le peresitene o le Islamic Society o Amerika i Mātū: O mea e tutupu i le olaga ua avea o se faamanatu, ina “ia tumau ona lotofaafetai i le Atua mo faamanuiaga ma ia lagolagosua i ē o loo manaʻomia le fesoasoani.”

Talitonuga faa-Iutaia

Ua faapea mai tagata Iutaia o mafatiaga, o iʻuga ia o galuega a le tagata lava ia. Ae ua faapea mai isi, o le a tauia i le toetū tagata lē sala ia na aafia i mafatiaga, pe a mavae le faamasinoga. E aʻoaʻo i le faa-Iutaia le talitonuga o le toe ola mai i se isi ituaiga meaola (Kabbalistic), lea e maua ai e se tagata le avanoa e toe faasaʻo ai ana mea sesē.

Lotu Puta

E talitonu tagata lotu Puta o mafatiaga e te maua i le tele o olaga e te ola ai, o se faataamilosaga o le toe fanau mai o se tasi pe a oti lea e faaauau seʻia oo ina faamuta ana gaoioiga leaga, faalogona ma faanaunauga leaga. E ala i a latou aʻoaʻoga, o galuega lelei ma le puleaina lelei o le mafaufau, o le a oo atu ai se tasi i le nirvana po o le tulaga ua mafai ona ia taofia mafatiaga uma.

Confucian

Ua faapea mai le A Dictionary of Comparative Religion e toetoe o mafatiaga uma e fesootaʻi atu i “mea sesē ma le lē taulau o tagata.” Ua faapea mai a latou aʻoaʻoga, e ui e mafai ona faaitiitia mafatiaga e ala i le ola i se olaga lelei, ae o le isi tele e māfua mai i “foafoaga agaga lea e sili atu le malolosi nai lo o tagata. Ona o lea tulaga, e ao ai i tagata ona talia e aunoa ma le faitio le talitonuga o le Tuupōina.”

Talitonuga faalotu a nisi o ituaiga

E manatu nisi ituaiga, e fesootaʻi atu mafatiaga i faiga faaagaga. E tusa ai ma nei talitonuga, e aumaia e tagata e faaaogāina agaga leaga le manuia po o mala, ma e faatonutonuina a latou gaoioiga i tū ma aga eseese. Pe a mafatia se tasi i maʻi, o vai ma fofō a fomaʻi faataulāitu, e aveesea ai aafiaga o gaoioiga a agaga leaga.

Kerisiano

E manatu Kerisiano, o mafatiaga e māfua mai i le uluaʻi tagata lea o loo taʻua i le tusi o Kenese. Peitaʻi, o le tele o lotu ua faaopoopo i ai a latou lava talitonuga e faatatau i lea aʻoaʻoga. O se faataʻitaʻiga, ua faapea mai nisi tagata Katoliko, o mafatiaga o le tagata o se taulaga lea e ofo atu i le Atua ina ia manuia ai le lotu, pe e mafai foʻi ona faaolaina ai se isi.