3. Aiseā ua Mafatia ai Tagata Lelei?
Le Māfuaaga e Tāua ai
O le mea moni, o se faiga lē tonu le mafatia o tagata lelei. O nisi e manatu e laʻitiiti le tāua o le avea ma tagata lelei.
Ia Mafaufau i ai
O nisi e talitonu o le tele o mea e tutupu e māfua ona o le tuupōina. O nisi e manatu o mafatiaga ua faaaogā e le Atua e faasala ai tagata leaga, ae tofotofo ai le faatuatua o tagata lelei. Ae ua faapea mai nisi e faigatā ona malamalama atoatoa i le māfuaaga ua mafatia ai tagata lelei. Peitaʻi, o nei ituaiga o talitonuga ua lāgā ai fesili nei:
Pe afai o le olaga e pulea e le tuupōina, aiseā la e taumafai ai ia soifua mālōlōina ma faia filifiliga lelei?
Pe afai e manatu mamafa mai le Atua i tagata, aiseā la ua ia faaaogā ai mafatiaga e tofotofoina ai i latou?
IA AʻOAʻO ATILI
Maimoa i le vitiō Aiseā ua Lē Taofia ai e le Atua Mafatiaga? i le jw.org.
Manatu o le Tusi Paia
O mafatiaga e lē o se faasalaga mai i le Atua.
I se faaeseesega, o le tele lava o mea e tutupu faafuaseʻi. E masani a ona o le iai o se tasi i se nofoaga sesē ma i le taimi sesē.
“E lē manumalo pea i le tausinioga o ē e saosaoa, pe e manumalo ē e malolosi i le taua, pe e iai foʻi i ē e atamamai meaʻai, pe e maua e ē ua malamalama le tamaoaiga, pe e aloaʻia foʻi i latou ua popoto; auā e tutupu faafuaseʻi mea iā i latou uma i le taimi e leʻi faatalitalia.”—FAILAUGA 9:11.
O tatou faanaunauga agasala e saosaolaumea i mafatiaga.
E masani ona faaaogā e tagata le upu “agasala” e faasino atu i gaoioiga leaga lea e faia e se tasi. Peitaʻi, e faaaogā foʻi i le Tusi Paia e faamatala ai le tulaga agasala ua tuufaasolo mai i tagata, e tusa po o se tagata lelei pe leaga.
“Na fanaua aʻu i le amioleaga ma le tigā, Na afuafua foʻi aʻu i le manava o loʻu tinā i le agasala.”—SALAMO 51:5.
Ua fai le agasala ma aafiaga mataʻutia i tagata.
E lē gata ua faaleagaina ai la tatou faiā ma Lē na foafoaina i tatou, ae ua faaesea ai foʻi i tatou mai i isi ana foafoaga. Ua iʻu atu ai tagata taʻitoʻatasi i le tele o mafatiaga, faapea foʻi ma le lalolagi atoa.
“Pe a ou loto atu e fai le mea lelei, ae ua iā te aʻu le leaga.”—ROMA 7:21.
“O loo ōi faatasi pea ma tigā faatasi foafoaga uma e oo mai i aso nei.”—ROMA 8:22.