Sa Tepa i Tua le Avā a Lota

O LOTA sa ola faatasi ma lona aiga ma Aperaamo i le nuu o Kanana. O le tasi aso sa faapea atu ai Aperaamo i a Lota: ‘Ua le lava se laueleele i inei mo a tatou manu uma. Sei o tatou valavala ia. Alu ia oe i le isi itu ae ou alu i le isi itu.’

Sa filifilia e Lota le tasi vaega o le nuu e manaia tele e i ai vai ma e tele foi vao lelei mo ana manu. O le itumalo lea o Ioritana. Sa tapena loa i ai e Lota lona aiga ma ana manu i ina. Mulimuli ane ona fai ai loa lea o lo latou aiga i le aai o Sotoma.

O tagata o Sotoma sa leaga tele i latou. Ma sa le fiafia i ai Lota ma le Atua. Mulimuli ane, ona aauina atu lea i ai e le Atua agelu e toalua e lapatai i a Lota o le a ia faaumatia aai o Sotoma ma Komoro ona o ā latou amio leaga.

Sa faapea atu le agelu i a Lota: ‘Vave! Ia sosola ese ma lau avā ma ou afafine e toalua mai i inei!’ Sa fai si faiaga o Lota ma lona aiga, sa fetagofi atu loa agelu i o latou lima ma taʻitaʻi ese mai i latou i fafo mai le aai. Ona faapea mai lea o le isi agelu: ‘Tamomoʻe mo o outou ola! Aua le toe pupula i tua. Taufetuli i le mauga.’

Sa usiusitai Lota ma ona afafine ma tamomoʻe ese mai Sotoma. Sa latou le tutu ma tepa i tua mo sina minute. Ae sa le usitai le avā a Lota. Ina ua fai si mamao ese atu ma Sotoma, sa ia tu ai ma toe tepa i tua. Ona liu tupua masima ai lea o ia. Pe e mafai ona e vaai atu i ai i le ata?

E mafai ona tatou aʻoaʻoina mai se lesona tāua i inei. E laveaʻi e le Atua i latou o ē usiusitai iā te ia, ae o ē e le usiusitai e maumau o latou ola.