O Pā o Ieriko

O LE ā ua mafua ai ona solo pa o Ieriko? E foliga mai sa pa ai se pomu telē. Ae o aso la sa leai ni pomu; leai ni fana. O se tasi foi o vavega a Ieova! Sei o tatou aʻoaʻoina pe sa faapefea ona tupu.

Sei faalogo i le upu a Ieova i a Iosua: ‘O oe ma ou tagata tau ia savavali solo i le aai. Ia savavali faataamilo faatasi ai mo aso e ono. Ia outou ave le atolaau o le feagaiga ma outou. E toafitu ni ositaulaga e muamua atu i luma ma ili a latou pu.

O le aso lona fitu ia outou savavali faataamilo faafitu ai le aai. Ona ili faaumiumi ai lea o le pu, ma alalaga loa tagata uma i le alaga o le taua. Ma o le a solo ai loa i lalo pa!

Sa faia e Iosua ma ona tagata mea na fai atu ai Ieova. A o latou savavali, sa leai se tasi e pisa. Na faalogoina na o le leo o pu ma le paʻō o vae. O fili o tagata o le Atua atonu ua matuai fefefe. Pe e te iloaina atu lena maea mumu o loo tautau mai i le faamalama? O le faamalama o ai lena? Ioe, sa faia e Raava le mea sa taʻuina atu e tagata matamata na te faia. O loo matamata uma mai ai lava lona aiga ma ia i totonu.

Mulimuli ane, i le aso fitu, ina ua uma ona faataamilo faafitu i le aai, sa ilia loa pu, sa alalaga tagata tau, ma sa solo loa pa. Ona faapea atu lea o Iosua: ‘Ia fasioti tagata uma o i le aai ma susunu. Susunu mea uma. Faasao na o ario, auro, apa memea ma uamea, ma ia ave i le mea o teu ai oloa a Ieova i le fale ie.’

Sa faapea atu Iosua i tagata matamata e toalua: ‘O atu i le fale o Raava, ma aumai o ia ma lona aiga uma.’ Ua faasaoina nei Raava ma lona aiga, e pei ona tauto atu ai tagata matamata iā te ia.