Fai Tavita ma Tupu

SA TOE taumafai Saulo e pue Tavita. Na ia ave ni fitafita lelei e 3,000 ma o atu e sue iā te ia. Ina ua iloa e Tavita, na ia aauina ni tagata faalilolilo e vaai po o fea o malolo ai Saulo ma ana au i le po. Ona fesili lea o Tavita i ona tagata e toalua: ‘O ai o oulua ma te o i le mea o loo malolo ai Saulo?’

‘O au,’ o le tali lea a Apisai. O Apisai o le tama a le tuafafine o Tavita o Seruia. A o momoe Saulo ma ona tagata, sa tolotolo lemu atu i ai Tavita ma Apisai. Na la aumaia le tao a Saulo ma lana fagu vai sa i tafatafa o le ulu o Saulo. E leai lava se tasi na vaaia pe na lagonaina foi i laua auā ua momoe gase uma i latou.

Vaai atu nei i a Tavita ma Apisai. Ua toe o ese mai i laua ma ua saogalemu i le tumutumu o le mauga. Ua valaau mai Tavita i le taʻitaʻi au: ‘Apineru, ai se ā ua e le leoleo ai i lou alii, le tupu? Vaai! O fea lana tao ma lana fagu vai?’

Ua ala nei Saulo i luga. Ua ia iloa le leo, ma fesili atu: ‘Pe o oe ea lena, Tavita?’ Pe e te iloa atu Saulo ma Apineru i lalo i ina?

‘Ioe, lou alii e le tupu,’ o le tali lea a Tavita. Ma na fesili atu Tavita: ‘Aiseā ua e taumafai ai e pue i a te au? O le a se mea leaga ua ou faia? O lau tao lenei, Le tupu e. Sau se tasi e avatu.’

‘Ua ou sese,’ o le tali lea a Saulo. ‘Ua valea lau mea ua fai.’ Na alu loa Tavita i lona ala, ma toe foi atu Saulo i lona aiga. Ae na faapea ane Tavita i lona loto: ‘E i ai se aso e fasioti ai au e Saulo. E tatau ona ou sola i le laueleele o Filisitia.’ Na mafai e Tavita ona faavalea Filisitia ma faatalitonu i latou nei o ia ua i ai i lo latou itu.

Na i ai se taimi na o atu ai Filisitia e tau ma Isaraelu. Na fasiotia ai Saulo ma Ionatana i le taua. Na faanoanoa tele Tavita i lenei mea, na ia tusia ai se pese manaia, na ia usuina faapea: ‘Ua ou faanoanoa iā te oe, lou uso e Ionatana. E pele oe i a te au!’

Na toe foi Tavita i Isaraelu i le aai o Heperona. Sa i ai le taua i le va o tagata na filifilia le atalii o Saulo o Isoposeta e fai ma tupu ma tagata na mananao e fai Tavita ma tupu. Ae mulimuli ane, na manumalo tagata a Tavita. E 30 tausaga o Tavita ina ua fai o ia ma tupu. E fitu ma le afa tausaga na pule ai o ia i Heperona. O ni isi o ona atalii o Amanono, Apisaloma ma Atonia.

Na oo mai le taimi e o atu ai Tavita ma ana tagata e faoa le aai matagofie o Ierusalema. O Ioapo, o le isi o tama a le tuafafine o Tavita o Seruia na taʻitaʻi o ia i le taua. O lea na tauia ai e Tavita ia Ioapo e fai ma taʻitaʻi o lana vaegaau. Ona pule ai lea o Tavita i le aai o Ierusalema.