Faalavelave i le Aiga o Tavita

INA ua pule Tavita i Ierusalema, ona tuuina atu lea e Ieova le manumalo tele iā te ia i ona fili. Na tauto Ieova na te tuuina atu le nuu o Kanana i a Isaraelu. Ma ua fesoasoani nei Ieova i le tuuina atu o laueleele uma lava na tauto atu ai e avea mo i latou.

O Tavita o se e pule lelei. E alofa o ia i a Ieova. O lana mea muamua lava na fai ina ua uma lona pueina o Ierusalema, o le avatua lea o le atolaau o le feagaiga a Ieova i ina. Ma na manaʻo o ia e fausia se malumalu e teu ai.

Ina ua matua Tavita, na ia faia se mea sese toe leaga. Ua iloa lelei e Tavita e leaga ma sese le aveina o se mea a se isi tagata. Ae i le isi afiafi po a o i ai i le pito i luga o lona maota, na ia tepa mai ai i lalo ma iloa mai se fafine aulelei lava. O lona igoa o Patesepa, a o lona toalua o se fitafita e igoa i a Uria.

O le manao tele o Tavita i a Patesepa na iʻu ai ina aumai o ia i lona maota. O lana tane o loo alu i le taua. Sa alofagia o ia e Tavita ma mulimuli ane na ia iloaina o le a i ai sana pepe. Ua popole tele Tavita ona ia taʻu atu lea i a Ioapo e faapito i luma Uria i le taua ia fasiotia ai o ia. Ina ua oti Uria ona faaipoipo atu lea o Tavita i a Patesepa.

Ua toasa lava Ieova i a Tavita. Ona ia auina atu lea o Natano e taʻu atu lana agasala. E mafai ona e vaai atu i a Natano o loo talanoa i a Tavita. Ua faanoanoa tele Tavita i lana mea na fai, o lea na le fasiotia ai o ia e Ieova. Ae na tulei mai Ieova: ‘Talu ai ua e faia lenei mea leaga, o le a tele ni faalavelave i lou aiga.’ Paga ni faalavelave na oo i a Tavita!

Muamua na oti le tama a Patesepa. Ona toso lea e le ulumatua a Tavita o Amanono lona tuafafine o Tamara. Na ita tele le atalii o Tavita o Apisaloma ma ia fasioti i a Amanono. Mulimuli ane, ua toatele tagata ua mananao i a Apisaloma, ma ua fai o ia ma tupu. Ma mulimuli ane ai, na manumalo Tavita i le la taua, ma ua fasiotia Apisaloma. Ioe, o le tele ia o faalavelave na oo i a Tavita.

Sa fanaua foi e Patesepa se tama e igoa i a Solomona. Ina ua matua Tavita ma maʻi, ona taumafai lea o Atonia lona atalii e fai o ia ma tupu. Ona fai atu lea o Tavita i le faitaulaga o Satoka e liligi le suāuu i le ulu o Solomona e faaalia ai o le a fai o ia ma tupu. Mulimuli ane ona oti ai lea o Tavita i le 70 o ona tausaga. Sa pule o ia mo le 40 tausaga, ma ua avea nei Solomona ma tupu o Isaraelu.