Faamamā e Iesu le Malumalu

E FOLIGA ita Iesu i ina, a ea? Pe e te iloa ai se ā ua ita tele ai o ia? Talu ai ona o le matapeapea o tamaloloa o i le malumalu o le Atua i Ierusalema. Ua latou fia maua mai ni tupe se tele mai tagata o loo o mai e tapuai i le Atua.

Pe e te iloa atu na povi poa laiti, ma mamoe ma lupe? O loo faatauina atu e tamaloloa na mea ola i ina i le malumalu. Pe e te iloa ai se ā? Talu ai e manaomia e Isaraelu ni manu ma manulele e osi ai taulaga i le Atua.

O le tulafono a le Atua, afai e fai e se Isaraelu se mea sese, e tatau ona fai se taulaga i le Atua. Ma e i ai foi isi taimi e fai ai taulaga a Isaraelu. Ae o fea o le a maua ai e Isaraelu ni manu ma ni manulele e fai ai le taulaga i le Atua?

O isi tagata Isaraelu e i ai a latou manulele ma manu. E mafai la ona latou avatua na mea. Ae o le toatele e leai ni a latou manu po o ni manulele. Ae o isi e nonofo mamao ma Ierusalema ma e le mafai ona o mai ma aumai ni a latou mea ola i le malumalu. E o mai la tagata i inei ma faatau ai mea ola po o ni manulele latou te mananao ai. Ae sa faataugata tele mea a na tagata. Ua faimamago i latou i tagata. E le gata i lena, e le tatau ona faatau atu a latou mea i ina i le malumalu o le Atua.

O le mea lena na ita ai Iesu. Ona ia fuliina lea i lalo o laulau a tamaloloa ma salalau solo ai a latou tupe. E le gata i lea, na ia faia se sasa mai le maea ma tutuli ese ai mea ola mai le malumalu. Na ia faatonuina le au faatau lupe: ‘Aveese nei mea mai i inei! Aua tou te faia le fale o loʻu Tamā ma mea e sue ai a outou tupe e tele.’

O loo faatasi Iesu ma isi o ona soo i le malumalu. Ua tetei i latou i le mea ua fai e Iesu. Ona latou manatua lea o le isi vaega o le Tusi Paia o faapea mai e uiga i le Alo o le Atua: ‘O le alofa mo le fale o le Atua o le a mumu i totonu o ia e pei o se afi.’

A o i ai Iesu i ina i le Paseka na ia faia ni vavega se tele. Ina ua uma ona tuua ai lea e Iesu Iutaia ma toe foi atu i Kalilaia. Sa ui atu o ia i le itumalo o Samaria. Sei o tatou vaai po o le a ua tupu i ina.